Nungak i hel ciangin:

I lungleng ahih ciangin a ban zomzom lel ni maw.

Tukpeng suih ciangin a kimawlte sangin a kimawllo, a gei pana ente a suih dan ding siamzaw hi kici hi. Khuttawh beng leng zong a beeng te sangin a ente a bet ding dan siamzaw zel hi kici hi. A tawp ciang. Tua mah bangin nungak a helhel te sangin a hel ngei mello te a hel ding dan siamzaw a, a ho ding dan siamzaw in, nungak lungkimna ding theizaw uh hi. Ahi zongin kimawl ente mah bangin a sungah lutsak taktak leng a upmawh uh na bang lo ahih manin amau leh amau lamdang kisa in, a sunga kimawlsa te natawm in zong lamdangsak pih hi. Tua ahih manin i thulu gen sawm pen i bulh liauluau pong hangin a gen dingpa pen Zolia te tawh a khawlkhawm loh ut in ut kei leh kha giat bang cingta ahih manin a practical sangin a theory in hong neel zaw maithei hi. Lamdang i ut leh sakpih ciat leng, aman zong lamdang sa ding ahi cih kithei khol ahih manin!! he... he....

Nungak i hel ding ciangin, zangdawng tunga nungak hel ut si, hel ngam ciah nai si lo, lah gal nuihsansan ngamta, nungakpi (nungak senior ka cih mai uh mizogam ah) te khawngin 'tleirawl khemzawh ding i muh leh pasal kimu ven cin, tua ahih kei leh tangval ngeina hamsa pianta' a cih laitak hun khawnguh i tun toh laitak, mikang ngiaknguakte in 'teenagers' hong cih ningniang laitak khawng uh, i mukmul Zolawkta mulmul banga hong vom pian hiuhiau, mukmul kiatna tawh kiattak nai si lo, kiat loh dinga lah mukmulsiavom po meeimaai ta si, i aw hong thum daldal pian, i gawl hong lawk hiam cih ding hun laitak ding khawng hun lai bangin i mai a zum mahmah hang a nervous lo dana om kenkan ding hi mai ding hi. Hih bang ka ngaihsut ciang tan 8 exam zawh a tan 10 ute in nungak helna ah hong lut masak sak sawm uh, thakhata kong kiu ding kimlai sakhi phawn banga ka lehtai kik thapai uh, hong delh phak zawh loh uh hang hostel pan punishment ka pelh loh veve thu khawng ka phawk hi.

Pai veve dingin, i diip a phut litlit hanga kingaihsutna ding hun kipia lo dingin a kongkhak uh kiu suak pah lel ding. Khatvei kong khak kiu khin leng bangzah ta in i maizum in i khosa a luan litlit hangin kilehkik pen hi thei nawnlo, kilawm nawn vetlo ahih manin a ban kizomzom thei hi. Kong khak hong kihon tak ciang Zolia in towel hong tawikhia lo ding ahih cianga lungdam ci a lutsuak lel dingin aman zong lumsa hi maw, hong paina gim hi maw ci dingin tuivot hong suah pah ding hi. Lumsak man, gim man ahih loh hangin tuivot pen haikhat dawn khin pah lel dingin hainih ding taang khua-ul hong luang lai ding cih thei gige ding. Tua ciang i hawhna te in zong khualum man bek hilo cih theita ding ahih cianga kiseel ngai nawnlo, i nervous thei uh ahih cianga i nervous lohna dingin hong hopih masa ta ding uh hi. (hih pen bel i nervous khak leh cih man hi in, a nervous lote adingin kisam kenteh).

Pa deuh a lut dingin zateep bungkhat khawng i 'look naughty' nop leh ipsung ah kuah ding. Za bel teep sese lo dingin a teep nuam dan a, na insung vuah za ka tep thei diam ci dingin ahi zong a teep lo ding. Ni khat in tawn nih khawng ka teep ci dingin nungak in zong a lungsim ah 'hih pah ki control zo tuak mah e', 'he knows the limit' cih khat ngaihsun dingin, zu ka dawn ngei kei cih pen gen ngai nawnlo, 'na dawn leh zong tam dawn kei in, tu lai zu dawnlo om dingin ka um kei' ciin ki Christ sak deuh mai in aman hong behlap ding hi lai hi. En zong ka dawnloh zawh sawt takta mah e, ci dingin i dawn ngei kei zong khatvei hawhna ah i hihna kigen khit pah ding hi sam lo pi maw. Save the best for last.

Ka genzom zel ek ta de aw.... themkhat behlap lai ni aw....

Tua tak ciang bel nungaknu lungdamna ding lam gen kipan pah carcar mai ding hi. A kizep dan a vallua hilo, a simple but smart, a insunga a lep dan, a insunga kep siangtho dan khawng phat phot ding e, tua zawh ciang a nek theih duh lamkhawng dong ding, ama maingal theihtheihna ding genpih phot ding. A an duh dan, nuam a sak, a lawmte tawh a kikhawl ciang nuam a sak khawng uh dong dingin tua ciang a gen ut hong phul ta ding, phulum phul bangta dinga hih cianga, inn ceiling puakkham phialphial hong nui khia buabua dingin a pi meilum awi natawm in hong khuaheek phei vangvang ding. Tua pan nai khat sung peuhmah ei pau kisam nawnlo ding aman a gennop a bul pan hong zialta ding ahih manin en na ngai dingin, aw, aw, aw, aw, na ci ci lel ding.... be a good listener kici khat om hi ven.... a niangtui awm ding mangngilh liangin a gen ding hong beilo ding hi.

Tua banga a thugenna pan nang hih nu in bang lungsim nei hiam, a kampau dan leh a gen ut thute koi lam hi hiam, a holim ut dan koi bang hiam cih na ciamteh dingin mi picing ahi hiam, mi khuaval a hi hiam, ahih kei leh amah kithei cian mi, a biakna theician mi, a minam theician mi ahi hiam cih na thei toto ding hi. Ama in kuan sung a thei cian hiam. Ama nu leh pa leh sanggam te a thei cian hiam. A ni ding a gang ding a thei hiam. A pi ding a pu ding a thei hiam? A inlak sanggam te a zong tawm thei hiam, a meltheih te a sap ding dan a bulh tawm ziau ziau thei hiam cih na tel ding hi. A migit, a gitloh cihte sangin tuate poimawh zaw ahih manin na nungak hel pen lawmte khat cih danin "Top Ten ranking" ah rank bangzahna tang thei ding hiam cih na telpah ding hi.

A dang tuamtuam gentehna dingin - a insung dinmun uh sangin a nuntakna ki standard sak nuam zaw cih hiam, a neih mahmah uh tawh tehna in kiniam khiat hit hiat na e cih ahiam aw, a pil mahmah tawh mi honuam pi khat hi mawk veh e cihte pawl pen na ciah kawm in lampi ah Town Bus ngak kawm in na nung ngaihsut kik thei lel hi. A kisam mello pop songs leh actors te tangthu peuh a tam gen zawk ut mi ahih leh ahihna a ki thei khawlkei cihna hi cih na theihsa hi pah hilel a, hamsa takin na va hawhhawh kik man kei zongin kimuh kik ciangin pelh bawl a, kimuh loh khembawl ding pawl hi pah tuanlo cih bel na theihsa hi..........

Tu lai ciang leitung kilam dang ta in nungak kihel nawnlo cih hi lo a, kihel hun ding kihau nawnlo, hun awng kimuhna ding ki tam neih lo cih bek hita hi. Tua manin a tam zaw kihawh dingte kitheih khawl sak ngai. Khanglui lai dana sun a nasem a, zana lupma tan nai 3 sung khawng kihel theih cih hi nawnlo a, nasep loh kal, khawlni, Ninoni leh Nipini khawng bek kihawh theihna hun hi ta mawk hi. Khanglui lai in bel zansim kihawh thei uh a, sun simin nasem in kikhen uh hi zaw hi ven maw. Kal khat ni nih sung khawng bek hun neih ah utna khempeuh ah kihawh man nawnlo ahih manin kuahiam cih danin 'selective deuha vaak ngai'....... ....

Ha!.... gengen ni ci leng bei ngei lo dinga, tua zah tawh hunsak nuam mai ta ing, phot in ah..... ka tawpna dingin --------- immagination is greater than reality... ciin lawm Thang Za Lun in hong remind zota ahih manin a dik takpi mah hiam cih bel prove nuam veve mawk ing ei......

Hau Za Cin
Phuitong Liim