Zi nusia a gamdang pai:

Youtube.com ah Zomi cih ka zonsak leh la khat ka ngai kha a, a thu ka tel khit loh hangin 'bang hangin na zi nusia in gamdang ah pai na hiam, na zi nang ngai a na inn ah hong bel hilo hiam' cih dan khat a gen nuam hi in thei ing. Hih bang la ka khatvei zakna hi a, hoih kasa a, thupi kasa hi. La phuakpa in a ngaihsut tawm a phuah hi lo dingin ka um a, a muh, a theih, a zak tektek mah pan a phuah khiat ahih ding ka um hi. Tulai Zomite nuntakna hong kikhek ah i tuak thu khat hong genkhia ahih manin 'thupi' 'hoih' a ci ka hi hi. Tuma kum 10 tan in zong hih bang laphuak ding ngaihsutna a om ding ka um kei hi. Lasa pa zong siam kasa hi.

Hih la ka ngaih cianga ka lungsima hong suak thu pawlkhat hong gen nuam ing.

Khasiat huai kasa hi. A zi a ta inn ah nusia in amah gamdangah om a, sum leh pai a khakzo den hangin inkuan a lungnuam taka kikhawlh khawm diamdiam neilo ding, teek hiaihiai ding cih ka ngaihsun hi. A ta sanga a kah leh laitan zototo dinga, a nu lungleng veve mawk ding hi. Inkuan nopna leh mikangten 'life' acih uh, 'nuntakna' pen a omlo hi mawk cihna hi, khasiat huai hi. Sum leh pai i deih tei hang, kisam i sak tei hang it leh ngaih tawh omkhawm lo, nekhawm lo hi leeng leitung a nopna dau mahmah ding hi.

A tonpih thei te in tonpih teitei dingin hoih kasa mawkmawk hi. 1880's laiin Zogam ah missionary hong kuan peuhmah in a zi tawh hong ton pahpah hi. Ei zong tu in gamdang zinta ihih manin i tang lenkhiat vutvut ding kilawmlo tawh kibang hi. Laisim sangkah, a hun man ciang ciah kik dingte bel thu tuam hi a, a omsuak ding bang a hih leh ngaihsut huai mahmah, laisimte in zong scholarship ngah sam ding ahih cianga tonpih, paipih hi leh a siatna om ding hiam cih ka ngaihsun mawk mawk hi.

[Hih pen minam sangin mimal vai hi zaw deuh in, genkhial a om leh hong maisak un]. Ahi zongin tua la pen hoihsa mawk ing. http://youtube. com/watch? v=3p7cJ8iVHz4&mode=related&search=

Hau Za Cin
Phuitong Liim