Itna kicing:

Max Lucado in 'Nisim Topa Tawh Tonkhawm' cih a hawmkhiat sungah 1 Korinth 13:8 siksan in, Itna Kicing (Love never fails) cih khat hih bangin at hi:

"Mi pawlkhat hih lunggulh uh hi. Itna a kicing, a mong neilo. Hong it dingte in hong it lo hi. Hong it theite in zong hong it lo hi. Kuama itna ngahlo in Zato ah na lum a, kuama it loh in Biakin ah thu na ngen a, kuama it loh in lupna tungah nang bekin na lum hi. Na lungsim kitamzaan in, "kei hong it omlo hiam?" ciin na khuangai hi. “Does anybody love me?”

Vantung pan in aw khat hong ging kiau a, "Pasian in nang hong it hi" ci hi. Amah mah in hong it a, it cih takin hong it hi. Ngaih cihtakin hong ngai a, khual cihtak in hong khual hi. Midang ten hong it ing ciin hong kamciam a hong it taktak kei uh hi. Pasian in 'kong it hi' ci a, hong it takpi hi. A itna kiam ngeilo tawh hong it hi. "Aw" ciin tua itna na saan nak leh Amah hong sungtum in nang zong midangte itna lak thei dingin hong na lungsung ah hong teng ding hi.

Tua ahih manin a dangtak mi khempeuh aw hong pai unla Topa itna lungtai takin dawn un. Na dangkeu kik kei ding hi."

Lengtong Pauno in 'Hong it ding na deih bang, nang zong it masa in, Nang tung hong bawl ding na deih bang midang tung zong bawl in' ciin siamtaka awi in la tawh Zomi khempeuh zak dingin hong tangko zo hi. Kum sawm bang val ta tham in ka um hi. Ahi zongin tuni tanin itna thukkik lo, itna lak lo mihing tampi lak ah Zomi te zong i om zeuhzeuh hi.

Na pianna na nu na pa na it pen a hi ding mah hi a, a thukkik hilo hi. Na tavuan, na duty, na sep ding mah ahi. Thukkikna hi lo a, i hih ngeingei ding hi. Tua mah bangin nu le pa in zong tate pattah pen itna lahna hilo a, a sep ding leh leitung ah a pian cianga a tavuan hipah a, mihing bawlpa piansakna hang leh deihna ahi hi.

Ei tawh a kisai kha vetlo, nu leh pa zong hilo, tate zong hilo pen lawm leh gual leh meltheih u le nau te ahi hi. I pianna nu leh pa lo peuh, i khanggui lo peuh pen hong huh, hong panpih ahi uh hi. Tua te itna thukkik ding kilawm hi. Itna lah kik ding ahi hi. Amau tawh i om khop kei a, amau i lah theih kei leh zong 'a kisam khat kiangah huhna na piak pen Kei hong pia na hi uh' a cipa gen bangin zuih dingin kilawm hi. Itna laklo, itna a laktheilo, a lak nuamlo, kisam a sa lo te bang hilo in, itna a thuk kik, ei tawh kisai vetlo hi napi midang i va it pen "Itna kicing" a hi hi.

Na sangkahna ding sum leitawi hong pia, na khualzinna ding sum leitawi hong pia, na nuntakna ann leina ding sum leitawi hong pia cih bangin, sum, van, thuhoih, na hoih hong sepsak - tua bang mite tungah lungdam na ko khial kei in, itna na lak khialkei in ciin hong kideih hi. Ei itna lo hangin a zawngkhal ding ahih loh hangin i nuntak a nopna ding leh ki it semna aomna ding, a nopsemsem na ding in a kiphamawh thu ahi hi.

A langkhat ah na lametna pan itna na ngah kik kei leh khase kei in, aman zong a mangngilh hilo a, a sem nuamlo hi lel hi. Amah na huh khakna hanga itna na ngah kik kei leh lamdang sa kei in amah Pasian hilo hi ven. Pasian in bel i lamet leh zong hong it a, i lamet kei leh zong hong it veve hi.

Itna pen hong itte kiang bek ah zat ding hi lo a, hong galbawl leh hong hua te, hong langpang leh hong phawkkha lo te kiangah zong zat ding ahi hi. Thei napi Zomi lakah zong pawlkhat in a hih ngeingei ding na tawm ahih lo om theih hi. Ngaihsun kik thei leeng nuntak laiteng hun kikhel cih om hi tuan lo a, zekai lua cih itna in neilo hi. I piak hunhun in kisang a, i zat hunhun in kizangthei hi.

Love never fails.

Hau Za Cin
Phuitong Liim