Thursday, March 8, 2007

Zomi bangzah pha

Kuppihna:

Chin State sungah mihing tul zali val deuh om ci leeng (4,39,096), Zomi teng khutlam ci leng a lam ding sehthum suah sehkhat khawng hi dinga (supposition) , Laimi teng khut lam ci leng bangzah in a lam tam, Haka tengin khutlam, Falam tengin khut lam cikiik leng.... tua te thudang in koih phot ni.

Manipur Zomi te tenna gam Churachandpur district ah singtangmi tul sawmguk (60,000) pawl om cileeng, Mizogam ah Zomi tua zah om zolo ding a tam pen leh tul sawmli (40,000) pawl hi inteh. Tua ahih leh Zomi kici pen leitung ah a kithehthang dang omlai ci ni (approx. 10,000). A vekpi gawm leng = tul zanih (2,00,000) pawl khawng bek pha dingin up huai hi. Tamzaw thei, tawmzaw thei.

Tua mihing tul za nih, 0.2 millions khawng pen minam min tuamtuam tawh kikhensuk ut lai, minam khat ah mihing bangzah taktak i om tam cih pen kisim leeng hamsa hetlo ding hi, tamlo lua ahih manin (khuapi khat mihing zah zong phalo hi).

A tam a tawm thutuam hi, a mihing khanna pen kiam deuhdeuh lai hi.

China gam ah tuma kum 100 hun lai in khangno kum 20 cing peuhleh zi leh ta nei uh a, tuma kum 50 hun pawl pan in kum 26 khawng ah khangto in, tu hun ciang kum 30 pha lo in zi leh pasal nei nungak tangval om nawn mello hi. A career uh nakpi in sangsak uh a, innkuan bawl manlo uh hi. Neih leh lam a kicin ciang ciin a hun uh khangkhan toto uh a, tuhun ciang tuabang a tungto to hi ta hi.

Pawlkhat a kipelh suak om a, a khasum tampi leh a liatna, a nopsakna amah bek mah in nuamtak in zang suak lel uh hi. Leitungah a khatbek a nuamsak cih zong nopsak dan bel kibanglo cihna hi sam inteh.

Mailam a gen kikna vuah, tun zong hi toto ta, kuaman zi leh ta deih nawnlo a, lawm (boy friend, girl friend) nei lel uh a, tua tawh nitum tum lel uh hi. Kiten ding, ta neih ding cih pen gimhuai, buaihuai, nasep tam, nasep hamsa in tuat uh ahi tam. Ahih kei leh nasep ding haulua in tuate buaipih manlo ahi tam maw. A kigen dan in Japan te na limsep lua in inn ciah manlo in a nasepna ah giaksuak den pawl zong om hih tuak.

Leitung pen a kiheihei hi mawk hi.

Tua manin tu in zong kumkhat sunga naungek piang pen tawmlua ta a (low birth rate), khangno te zi leh pasal nei a, ta nei dingin kumpi in cialpi khawng bawl liang hi. Hamphatna ding tampi bawlsak uh a, ahi zongin khangno te mit ah sum leh pai leh career mah lianzaw tawh kibang hi.

Zomi te zong tua lam i manawh kha tam cih lauhuai hi.

I population pen tawm lai mahmah in, khan lam sangin kiam lam manawh lai leh kilawm hi. Bang hangin. Leitung khantohna tuamtuam hang, a tunga Sente i gen tawh kibang to deuhdeuh leh gamdangah pai in innlam te tawh kigam la lua, a hun a thu piang khin theilo, "tuni na hih theih zingcianga dingin siit kei in" cih pen thei ta leeng aki zui zolo hi to to phot hi.

Tua manin Zomi te pen i suakta zo takpi tam cih ngaihsut huai mahmah hi. Can a half million population survive as one nation in a globalized world? This is no politics, it is a fact, rather a reality.

Hau Za Cin
Phuitong Liim

No comments:


Blog Archive