Zomi bek gambel i hi hiam?:

Hilo hi. Kumthak tawh EU ah a thak khawm pen Romania gam ahi hi. Mihing tulza 200 (200 lakhs, 20 millions) pha a, tulza 20 (20 lakhs, 2 millions) gamdangah nasem in omkhia uh hi. Amau pen gambel hilo in, sum zong hi uh a, agamsung vuah sum zonna ding omlo ahih manin Spain, etc ah mi inteeng, mi inzut, mi naukem, mi huan cing leh lambawl, lamto, insa cih bangin a sem khia uh hi. A inkuanpihte uh, a zi a ta uh inn ah nusia uh a, sum khak uh hi. Kumkhat in Romania mite in innlam ah a sum khak uh 2 billion pha hi kici hi. Na theilai diam kumlui in Phillipines mite in 1 billion khak uh hi cih i gen zo hi.

Romania ah nasem thei khempeuh gamdangah khhualzin mang, khua ah pitek putek leh naupang nasem theilo teng nusia uh a, a tek a huai cihtak mah ana sisi in, khua sunga teng ding om nawnlo, khua muih cih khawng om hih tuak hi.

Naupang gamdanga sum thalawh a om nu leh pa aneite pen sanginn ah zong a kilawmzaw in kizem in, sangsia te sangin zong kizem hoih zaw uh, sum hauzaw uh ahih manin a siate uh zong zahtak lo phial uh hi ci hi. Tua banga nikten puansilh hoih a neizolo, a nu leh pa a zinkhia zolo te in eng mahmah a, a nei leh neilo kikal guam thukpi om hi ci uh hi.

Phillipino te leitung bup ah om cih i thei a, Japanese te leitung bup ah kithehthang uh a, Chinese te leitung bup ah om in, a diak in Africa ah tam mahmah uh a, India mite zong gam tampi ah om hi. Gam zawng leh haksa bek zinkhia i sak leh US leh Australia, UK, Germany cih khawng pan zong mi na zinkhia uh a, amau gamlo ah mi na pempem uh hi. Leitung pen nuamsakna lamlam ah a kiteng kawikawi na hi mawk hi. Judah mite leitungah kithehthanglua ahih manin Israel gam ah ciah kik ding kihong a, mi tampi ciah kik ta hi (Judah mi ahi khin duam thei kei hang!).

Tua manin tu laitak a Zomite gambeel, gam dang zin sum leh pai zong a zinkhia cih pen a pan masa i hi kei a, a nunung pen i hi kei a, minam khangto masasa kalsuan dan hi. UK te in India leh Burma hong zinsuk uh a, hong uk in, sum bawlna lianpi hong nei uh a, a gam hauhna tampi a nek zawh ciang a ciah uh hi. Kumpinu lukhu tunga suangmanpha zong India pan a puak hi kici hi.

Zomi te a zekai kei a, a masa pen zong hilo hi. India ah Chinese te a tam dan, Restaurant bawl a tam dan. A tamzaw in Chinese restaurant ahih leh a lim ding sa in neksawm teitei cihkhang zong om hi.

Tu laitaka i zin khiat, leitung tuancil dinga i kalsuanna pen i hai man hilo a, i pilma hi zaw hi. I hamsat man (thukhat ah ahih tei hang) i khantoh man hi. I khuamuh man, i mitkeuh man hi. Tua manin a ut ut, ahi theithei hanciam ding hi a, ahi zongin gamdanga om meltheih nei leh neilo kikhaihna lahna a innlam ah naupangte puansilh kibanglo hanga kideidanna om ding ahih leh bel a kitona khanna dan zong i ngaihsut hong kisam ding hi mawk hi.

Minam pil masa sa in leitung pen a khualu mual pan a muh theih ciang bek hilo cih thei uh a, a khanglo masasa in gamkuan khia in zin khia uh hi. Zomite zong tua hun sungah lut i hih manin a pil khom veve ta i hi hi. I khuak leh lungsim pen tei mawk cihna hi. Kidem ding hi leng leitung minam i demlah ding omlo a, i zoh loh ding zong a omlo na hi mawk hi. Tua theita i hih manin Zomite zong kumthak hong tung zel bangin leitung khantohna tawh kal a suan khawm, a ton khawm, a kiton toto hi mawk hang.

Ahi zongin, ahi zongin cih khat om hi. Judah mite amau gam pan gam khempeuh ah a kitheh thang hangin amau pau, a mau ngeina leh a laiuh na mangsak lo uh hi. Mizogam pan Israel pai dingte zong Hebrew kisinsak ngekngek uh a, Judah ngeina kihilh uh hi. Chinese te in a pau uh mangsaklo uh a, India te in zong a pau uh na kem uh hi. Zomite zong tua i maban ah hong kilui hi. Tua ah zong gualzawhna i ngah diam? Eima tung ciat ah kinga hi. I nunglam ah kumpi in hong gak kei, i khua leh tui in hong lencip theikei, i pi i pu in hong pattah tawntung thei kei, eimah ciat kep dingin i mawhpuakna hi.

US in kumthak a dawn nunung hangin a zekai ahih loh mah bangin Zomi te in leitung pilna laisim leh siamna sinte i nunung hangin zekai lo in ahun i lapin tu hun a mite pilna leh theihna ciang i thei veve a, zekai lo hi. Mi theihzah thei theilo in, mi siambang siam thei kei leng a zekai hi dinga, a nunung hilo ding hi. Hong kisinsak bangbang midang tawh siam khawm, ei mai ah minam pil masa te tawh siam khawm thei khawm pil khawm toto ihih manin i nunung hang zekailo hi hang.

Africa pan Spain ah lutsawm (a gukin) tembaw tuahsia kumlui in i za a, France footballer tamzaw Africa pan a pem hi cih i cih thei a, England Footballer pawlkhat zong ei mah banga zinkhia, a tamsuakte hi a, leitunga steel industry lian pen nei Mittal zong india pan London ah pem khat hi lel hi. Tua manin Zomi te adingin i tenna ding, i khanna ding, i nuntakna ding, nek zonna ding ciangtan omlo a, i gam lian mahmah hi, leitung khempeuh hong kipia a, Joshua kianga kigen mah bangin 'i sikna ciangciang i gam hi a, i tenna ciangciang i khua hi lel hi'.

Zomi aw, kalsuan suan lel in, Zomi move on..........

Hau Za Cin
Phuitong Liim