Thursday, March 8, 2007

Hong tung takpi ta - Kumthak, kum 2007!!

I ngakngak, i gal etet, kumlui kumbul pan i delhdelh kumthak, kum 2007 pen Topa in cidam in hong musaka, lungdam in kipak ni. Na inkuan sung vuah lungnopna leh thupha hong tung ta hen. Nopna hong piang hen. Bangci'n kumthak i dawn a le?

Kei, Grace Baptist Church, Taipei "New Year Service" ah ka kihel a, Senior Pastor Stephen makaihna tawh second 10 a om panin lehsim suk in, "10, 9, 8, 7, 6, 5, 4, 3, 2, 1, 0, Happy New Year" ciin ka kikhutlet naunau uh hi. Chinese nungak keisanga a din sangzaw khawngtawh kikhutlet kha gawp in, a mel uh hoihta buang, khah nawnlo dinga pha hi a,.... kumthak kipat dan hoih mawk ei!

Taipei mipi tulza nga (5 lakhs, half-million) ding khawngin Taipei 101 ah firecrackers show en dingin nitaktung pan kigual uh a, lasa siam minthangte in concert nei in, khuasung khempeuh lungdamna awging tawh kithawn hi. Moto tai muh ding omlo a, subway leh Bus tawh mihing kinawn mai uh hi.

Hunthak, kumthak muh ding mi khempeuh kilawp a, ngaklah in lungdam uh hi. Ahi zongin kumthak dawn dan kibang lo hi.

Pawlkhat in dahna kahna tawh muak dinga, pawlkhat in natna thuak in Hospital ah lum dinga, pawlkhat Jail sungah, pawlkhat in kumthak hong tung cihzog theilo in ihmu hithiat ding uh hi. Pawlkhat in concert ena a aw tawp uh tawh kiko a, awsuah laitak in pawlkhat Christian biakna zuitein Biakin sungah Topa tawh kikhawl in hunlui a hong makaihna lungdam ko in hunthak hong kepna leh makaihna ngenin hun na zang uh a, ngaihsutna, deihna, thupi sak dan, nuntakna zat dan kibang lo hi.

Taiwan a kumlui 2006 nitum nunung pen en dingin mi tampi in Pacific Tuipi gei zuan in car tawh kidelhsuk uh a, pawlkhat a kikawi, pawlkhat akap khitui luang, a tuamtuam om in, kumlui khak dan kumthak muak dan kibang lo hi.

Leitung in meihalpuak (fire crackers) kidemna om hi leh a khatna a ngah tawntung ding Sydney Opera House ahi hi. Hia laia meihalpuak banga kilawm leh etnop leitungin a ki mu ngeilo hi. Millenium thak i muak lai in Sydney meihalpuak kigen vungvung a, Sydney Olympic kipatna leh khakna zong firecrackers minthang hi. Ahun hun a, hia lai a fireballs tuamtuam leh design tuamtuam a kilakte thupi a, et nuam in hun ciamtehna khat lungsim ah hong neisak hi. Tu kumthak zong amau a thupi mahmah kik hi.

The Tallest Tower in the world a firecrakers zong a thuneu hi tuan lo hi, kumthak muakna pawlkhat na etnuam leh:
http://www.youtube. com/watch? v=ox309sPLqoQ&mode=related&search=

London ah kumthak muakna, NY times square ah muakna, etc cih bangin nisuahna pan nitumna gam tan in kumthak kimuakta a, hunthak sungah kilutta hi.

Kumthak hunthak ah Topa in hong makaih zel hen.

Hau Za Cin
Phuitong Liim

No comments:


Blog Archive