Banghangin i zawlla te guallelh la hong kicih sak hiam?:

Christmas gim lah kinam theilo ahih ciangin i maban mah zomzom lel ni maw. Christmas nuamtaka zang dingte lah na nuamsa uh henla.....

ZONET Lawmte khat in, "guai min i Zomi love songsa, zawlla te mi'n guallelh la hong cihsak uh hilo maw" hong ci hi. Ka lungsim hong vut hiau a, ka ngaihsut kik leh ana hi thei mah ding hi. Hih la enpak leeng:

Vana tung solkhapi a taan laitengin
Hong ngilh ngei kei ning e
Meitei gun a tui a luan lai tengin
Lailungah hong ngilh kei ning e

Inn leh lo sum leh pai bangmah neilo in
Nek ding bangmah nei lo zong
Ngaih nang tawh om leng munkhem peuh nuam e
Kei kiang pan pai khia nawnken aw, ngaih aw!!

Dawng 2-na leh dawng 3-na omlai.

A dawng 1-na, 2-na, 3-na teng hoih mahmah hi. A sakkik ah themkhat hong niamsuk pian ahih manin i koisan hiam khat nuamlo hi. A hoihna tampi kaiiniam ahih manin a hoih mahmahna tawmcik eukha hiam cih theih hi. Ahi zongin hih la pena hoih hi.

Hih dan ahih manin min tua hong cih sak hi maithei. Ahi zongin mi cih khempeuh zong va zui den leeng, pata sakol zuak ding mah kibang ding ahih manin ei cihna lam zong i thupi sak zel bel a hi ding mah hi. Ahi zongin tawmkhat behlap lai leeng:

La phuakte in pen na khat a muh uh, a mitkha ah thaam den pen thu in genkhia in a aw bulh in la suaksak thei uh hi mawk a, a lungsim mitkha leh a la lungsim uh pen a bulh ziauziau thei hi mawk hi. Eng huai phial mawk hi. Pasian talent piak tektek ah minthang baih deuh uh, min mangmawh pah a, hampha se uh hi. La hoih khat a phuak uh pen minthang pah lian uh a, lasa te mah bangin la hoih khat a sak uh pen minthang pah lianlian hi. Britney Spears zong Baby One more Time cih bek mah a aminthang kipatna hi mawk hi.

Thugen siamte khatvei thugen twh minthang lo hi. Lai at siamte khatvei lai at tawh minthang lo uh hi. Billy Graham a khantawn maha thugen siam hi a, a minthanna thuthak thulian thu dang khat a gen kik zel kei leh khanglo hiam cih ding zah in mipi bil ah lutlo mawk hi. Lai at siam minthang Tolstoy te, Shakespeare te zong Lai Siangtho bu zaha sah ding lai a at dimdem uh ciang a minthang pan hi a, laimai khat leh nih at pakna tawh minthang mawk lo uh hi. La phuakte hampha se uh hi, zong ollo, kisin tawm theih loh, a pianpih talent neite phuakte mah ngaih deuh se a, a phuak khempeuh la ngaih tuanlo hi.

Zomi la phuakte:

Laphuakte cih hang a la phuak dan uh a gen nuam hizaw ing. Ahihna bang a phuak vive ahi hangin a laigil tak mah phuak ngam leeng, a diak in zawlla ah (love songs), a itna tak mah, a ngaihna laitak mah phuak giap ngam, zumpih ngam leng a thupi ding hi. A kikhen zawh ciang a kingaih lai thu uh phuak cih pen nunglam etkik bang hi a, zekai pian hi. A kingaih laitak mah, a kingaih tung lai a ki zawlmit hiauhiau laitak khawng mah phuak suk in hi leeng tuasangin hoihzaw laiding hi. Tu laitaka i zawlla te tua banga ki phuak cip ngam tamlo hiam cih theih hi. Mi hong gen ding zum huai sa i hiam?

Naubang kap ci napi in, naupang kap banga lah a itna taktak a hun lai in genkhia ngamlo ihi tam maw ka ci hi. Itna mah pulak beba in, ngaihna mah awtpih buabua mai leeng.... luseite bang tuaci giap giap uh in, a la phuakte adingin zumpih huaisi e, tua nu/pa lawmlawm ngaia hizah awtpih thapai cih nop huai phial hi. Ahi zongin la pen ciik sak hi. A tak suaksak hi.

A kikhen zawh, a tul zawh, a bei zawh cianga kong ngaih dan, kong it dan, pammaih kong sak dan cih te nungphuak hilo in, a hunlai mahin sapah dampdamp leng thupi zaw hilo hiam.

La bek i ci diam? Thu zong e:
La phuakte bek cih theih tuanloh a, lai atte zong hong kikik veve hi. Koi sung magazine hiam khat ah a tangval laia zawl ngaih thu kum 20 valta pen a thak mahmah banga gelh, luikhia phiing cih om hi. A thu a hoih mahmah hanign dau hi. Ciil nawnlo hi. A gen teng zong dik zong hi mah, ahi zongin a hun laiin tua bangin at leh HIT a kaiding pen zekai hi.

Tua manin nungak ngaihna, hoihsakna, itna khawng gen nuam, sa nuam ihih leh a hunlai mah in hihsuk pah lel leeng ciik penpen hilo hiam ciin ngaihsun ing.

I nungakte khawng i phat deuh ngai a, i tangvalte khawng i suan deuh ngai hi. I tangvalte i muan theih kei leh i hangsan sak theikei ding hi. Nungakte bangin tangval itna khawng a at ngam om nailo i hi tam maw, tangval it om nailo ihi tam maw. Ahih kei leh lai ah at ngamlo, guk ngaih, guk khen kik....cih dan te in.... minam dangte in a nungakte uh phat in pahtawi uh a, ngaihbang mahmah sak zo uh hi. A tangvalte uh hangsan sak in, thupi sak uh a, muang mahmah in koih uh hi. Zomi te zong tua stage i tun ding ka ngaklah hi.

Zawlthu gen pen a zum huai leh a haihuai a sa zong om inteh, ahi zongin minam khantohna dingin zong role lianpi play hi. Ei a te thupi i sak kei a, ei a te i pahtawi kei a, ei a te i phat kei leh kuan hong phatsak ding ahi hiam?

Lastly, hi bang ka at ciangin pawlkhat in a zi deih a awngawng hi hong ci om maithei hi. Phamawh sa kei ing. A tua bang hang hilo cih a theisiam zong (Baal maia kun ngeilo khangno 7000 om cih bangin) mi om veve hi. Lai lam khantohna ding minam khantohna ding i lunggulh dan kibanglo hi zaw hi. Pawlkhat in politics tawh sem a, pawlkhat in biakna tawh mipi pattah a, pawlkhat in lungsim khantohna ding Lai leh Pau tawh sem hi. Tua teng lak pan (Thau - Thugenna - Thugelna) mipilte in Idea rules the world na ci uh hi. Thu mah in thu uk a, thu mah in leitung uk hi zaw hi.

Genkhial a om leh kimaisak ni.

Hau Za Cin
Phuitong Liim