Aizawl bang' ding hi:

Aizawl Zomi te i etteh ding hi a ci nuam ka hi hi.

Zomite thukizakna ah mun nih pan a kihal kimin thuthak hong kipulak zel a, khat pen Zankong pan "Zangkong khuahun" cih hi a, khat leuleu pen Aizawl pan "Mizogam Zomi New" cih hi. Hih te nih i etkak ciangin khat in a nunung zaw pen ah Aizawl Zomite Biakin 3 ah kikhawm mah le uh hun pawimawh, thu pawimawh khat peuh ah semkhawm, om khawm, kimukhawm uh hi cih kiza a, i tawldam in i om nuam hi. [Hih mun nihte a genteh nuam sese ka hi kei a, gentehna in ka zatpak hizaw hi].

Hih dan Zomite kalsuan khopna pen leitung neucik i tenna ah, i omna munmun ah i zat theih ding i etteh theih ding thupi kasa mahmah hi. Zogam khuapi te ci a laphuakpa khat in a gen mah bangin Zomi a tamzaw i tenna Lamka bangah kisam pha diak ka sa hi. Khoppi khat neih leh kisiim, zangkhawm, ki uap cih bangin semkhawm in, lungdamna khat a om leh ki uap, dahna khat a om leh ki uap (tua ci kei hang cihna hilo in uang zaw sem leng cihna hi), tua bang hi leh i minam pen hong kinaih semsem dinga, mimal khensatna tawh i zuih Biakna pawlpi pen a pai ngeingei in pai ta leh minam khat banga i kalsuanna pen hong hat deuhdeuh ding, hong kihual semsem ding in ka um hi.

Tua ahih manin a diakin India gam khuapi te ah - Delhi pan panin, khuapi dangte ah zong tua bang mah in kihawhtuah kimuh tuah kiveh tuah hau in, kikholhna tamsak sem dingin makaite in vai hong hawm siam leh a kumkum in mai i nawt hanhan mai ding in ka um hi. Kumkhata khat vei nihvei kimuh khopna ZOMI NAM NI leh KHUADO PAWI cihte bek hilo in, Biakna lam zong hun zat khopna vaihawm thei leng a manpha dingin ka um hi.

Kumlui a kigen khat ZOMI CONCERT cih bang khat khawng nei leng zong i vekpi in paikhawm in khutbengin thapia ziahziah leng "Ngaih Anglai Ah" te bangin "Lungsim lam ah zong kinaih semsem ding hi."

Zomi te Nation building pen U Zauva in ah 'Overnight chemical reaction banga piang pah ding hamsa hi, a process bangtan hiam ngai hi' ciin vision mu khin ahih manin, tua danin pan leng....... nungak helna, tangval helna khawng zong hong taizai dinga, tate zong KAHBIA hipeuhmah loin "Zomi sit", ahih kei leh 'Zomi ciik', aktuiciik banga ciik 'tui helloh' mah hi ven.

Aizawlte cih dan mah etteh ni. Zomite khuapi lak pan a etlawm penpen hiven [Khuazin zawh ciang Zemabawk lampi pan leh-et lecin, a etlawm dan na thei ding].

Hau Za Cin
Phuitong Liim