Tuesday, March 6, 2007

Ka theih ka theihloh:

No tua bang na nei uh hia? Kei pen ka theihloh pipi ka theih mahmah a ka zatzat om mawk hi. Theih lah thei, ahi zonga theilo hi si, hai mana theilo hi hetlo, pilna tawh theih zong hituan lo. Ka theih ahih hang ka theihloh pawlkhat hong gen nuam ing.

'Phanat' a kicih ciang tua kammal khiatna ka theih loh hangin khenuaidap genna kaihseeng hi cih ka thei hi. Pha + nat = a pha leh a na kigawm cih ding hi leh cina, damlo, natna thuak cihna lam hi dinga, ahi zongin khenuai ah a belh lengleng thei leisiik dapphah, leisiik ciang kheguak tawh leitang kisuk khaklohna ding dalna, leisik taang in tua tawh akisiikna buangnai lomthaw khutpeek cia khat genna hi cih ka thei hi. Ahi zongin a khiatna ka thei kei hi. Zopau hi lo dinga, Zomi te zatmasak hilo dingin ka um hi. A kammal ka zak ciang a gennop ka theih, ahi zongin a kammal khiatna ka theihloh hi. Midang kammal pan i tawk, i kawm, i laklut, i senlut kammalte lakah khat ahih ding ka um hi. Slippers aci zong om a, tua a kicih leuleu ciangin a kitolh, a kitholh, a kitalkhia pahpah cihna hi a, khenuai dap hiam, khedap genna ahih ding lam kingaihsun masa lo hi. Kitolhna, kitholhna cih ding hi leh kilawm hi. Ahi zongin mikang diakduakte in khenuai a tholh ziauziau cih genna in na zang uh hi. Zomite kammal zat tangzang khat hong suakta hi.

'Bombi' cih leuleu ciangin kawngnuailam tuamna puan 'pheituam' zong aki ci zaw, mikang pau a api english in a tupa kiangah na 'long pant' tawkeek kong khuisak ding a cih vangvang pen hi cih ka thei hi. Ahi zongin 'bombi' cih pen a khiatna ka thei kei leuleu hi. A kizatna gam leh khhua ah lah a dangin kisam hetlo in kawngnuailam tuamna puan 'pheituam' genna in kilim zat bek hilo in kizang hi zaw hi. A gennop ka theih, a kammal khiatna ka theih loh khat hi mawk ei.

'Tavuan' cih ka zak leuleu ciangin 'sepding mawhpua', mikang pau in responsibility, duty, etc. cih genna hi cih ka thei a, ahi zongin ta + vuan in bang gen nuam hiam cih ka thei kei hi. Ta, gamta, gamsungah gamsa te ta cih a ta pen hilo a, vuan, vuan cih kammal Zopau ah a om lam ka thei kei hi. A khiatna ka theih, a kammal bulpi ka theih loh hi a, Zomi te kammal import lak ah khat mah hi kik dingin ka um hi.

'Puanak' cih ka zak ciangin puansilh genna hi cih ka thei hi. Ahi zongin 'ak' cih pen va-ak lah hisam lo, a khiatna a gennop ka thei kei hi. Puansilh a kicih ciang puan pen puan cih ka thei a, silh cih ciang khuh, tuam, seel, liah cihna hi cih ka thei a, ka tel pah hi. Ahi zongin puanak akicih ciang puansilh genna cih ka theih hang a kammal bulpi ka thei kei hi.

'Letsong', et mai in mikang pau ding tawh kibang hi. Ahi zongin Zomite in a lim zatmahmah 'thaman, pahtawina kipia genna hi mawk a, hi zong a kammal in Zopau in khiatna nei hi. Zomite in mikangte mah bangin mikammal i tawk, i lak, i zuih, i zat, i import, i zattpih tampi om hi cih ka phawk hi. Zolai ah a ki at ngei kei a, Zokam ah i lim zat loh a tangzang zaw ahih leh i pau i lai khansakna hi zaw ciin mipil te in na ciamteh uh hi.

Tua bangin i kammal zatte a khiatna leh a bulpi kan takpi zel leng upmawh sangin thei i kisak leh kithei hetlo thei hi. Laibu i cih ciangin lai pen laidal genna hi a, bu cih pen vasa bu, zusa bu, miksi bu, inlawibu, ganhing bu, cih bang a tuamtuam genna hi. Laidal gawmkhop, khilkhop, kilhkhop, heenkhop, zialkhop, cih bang genna hong suak kik hi.

Moto i cih ciang i gen i thei a, moto khiatna i thei kei hi. Ahi zongin motor cih mikang kam pan kila, a kipei, a kikhuk genna hi a, a khiatna i theih loh hangin 'khawl' (khawl i cih pai hi, engine, pawlkhat in set cih hhi zel....), ahih kei leh a kigawi, akiphul, a kisawn genna hi. Siklom kigawi, siklom kisawn tuah tek in tua a kikhuk, a pai, a taang, a hat pai ciang a taai i cih hong pianga Mawtaw, moto i ci suk mai hi. A taktakin a kisawnpai tawm siklom, buangnai khauh, sing, etc genna hi.

Leeng or Sakolleeng i cih ciang sakol kithei a, leeng cih pen bang genna hiam cih ka thei kei hi. Ahi zongin a gennop kithei hi. Sakolin vankaih ding guanna a kilam, a kibawl nuai ah a pei, akipei thei a bem, a pum kibulh a, tua a kaih ciang olno in kikhin in gimlo in lam a paipih hi. Muileeng i cih leuleu ciangin Nupi te in khau a khek uh ciang a khaukheekna uh, a khauzialna uh a kipei velvel ding 'mui' genna hi a, tua mui kipei tawh a kibang pen leeng tawh kibulh hi cih genna hi. Muitung, muiphei genna kammal pen leeng tawh a kibulh ciang a lianzaw a tangzai zaw 'muileng hong suak a nasep theih zong lianzaw in thupi zaw hi.

Mikangte khawngin zong hih bangin a kammal uh na gawmgawm uh a, kammal thak na suahsuah lel uh hi ding hi. Biak + inn = Biakinn = biakpiakna inn......... ..

Nang zong na theih na theihloh a om hiam?

Hau Za Cin
Phuitong Liim

No comments:


Blog Archive