Thursday, March 8, 2007

Zomi paunak:

Sia Thang Kim [Thawthawn, (tawmvei), Malaysia] in kicing tak in hong gelh zel a, sim nuam kasa mahmah hi. Ka theihsa ka phawk kik om a, ka theih nailoh khawng zong na om hi. Mikang pau bek tawh a om kasak paw om a, Luseite pau bek tawh om kasak pawl zong om hi. Thudik leh thuman pen koimun peuh ah kibangin 'universal' hi cih hong lak hi.

Paunak i cih pen bang hiam? 'Tomcik a thudik genna leh kikamhilhna; kampau khat tawh thudik genna leh kikamhilhna' cih danin a khiatna tampi om thei ding hi. Online free English Dictionary: "A short pithy saying in frequent and widespread use that expresses a basic truth or practical precept." Oxford Dictionary: "a short saying stating a general truth or piece of advice."

'Boih in ka mei a tun teh tong ning ci, a mei tom semsem' bangin ka hauh ciang, ka pil ciang, ka sep theih ciang ciin siitsiit leng siatlam, huailam, mong lam, beilam kimanawh thei ahih mihing kihih manin siam bangbangin a gensa thute gensawm dih ni. Aisa nuta kikamhilh bang bek i bat khak ding zong lauhuai ven, ka khialh leh hong huh zel unla, Lampam sikkhiallo omlo kici sam hiven e, ahi thei tantanin zuun kik sawm dihni i paunak te, bangzah i thei taktak hiam aw. I theihloh te zong gen lel ni, i theih loh pen i zat ngeiloh man i zak ngei loh man hi kha thei hi.

Neu thumang mawh a ka theih Zawngin ama tawkheng muloin midang tawkheng ko cih khawng, lei leh ha zong kipet kha, LianDo leh Thang Ho in zong tangtang phelhawm, Akta duhgawl kilawh khuh cihte, mui zanglua kipeisat, khausaulua ki awk thei, meima lo ah tho tulo, nekloh buanlawh, nahtang bul ah khuaiphul lo, sakhi sansa vomlo cihte ka phawk kik kik hi.

Ka theih ngeiloh, ka zak ngeiloh zong tampi hong om mawk in, Si leh ihmu hamsia cih ahi zong, numei sutpom a val omlo, pasal khualzin mualmong en, pu lo a han kitang lo (ken ka theihdan: pu te leh lamphung kineh zolo), putu kiciam in dai ah vagil khei, uimei kawisa kawi veve, zusa banga phih tuam nei, vahui suklen sakhi totai, bokthok kawla talah, beli thoknawn gahzaw thei, cinglo selua a bel a but, ak op leh mikhual in ankham hun neilo, ak khaguh a sai man, bangkua kanzo gatang thawl, gitta tuktun, etc...

I tenna mun a kilamdan ciangin i zat dan zong akilamdang pawlkhat om leh kilawm. Sia Thawn in hong atte pen original mahmah hi.

Hau Za Cin
Phuitong Liim

1 comment:

Unknown said...

Dr Cin,
Na blog na hawh zo pan zen ing. Thupi le sim nop huai vive hi. Adiak-in tunai na laibuthak bawl"ka laikung mukpan" hong suakkhia taktakta ahih manin lungdampihna leh i tangthu ah a ngalhat tangval pilna sang nei na hih manin zahtakna hong pia ing. Taipei ah nang guak tungkik mawk!!! hidingin hong thei ing. Kakhial hia? ahih keh hoouh zuthol piak ding koihsa peuh anusia a hong kuankhia kik nahia? ...Taiwan: 2nd impression hong dong nuam ing, hpntawh na manteh dawnna hong nei in. Na laibu,Lamka a ka meltheihte Malaysia hongkhak dingin ka vaikhak hi venn, K.L puakding thusai lamte'n geelna anei uh hia? Kei ngah dingin ( no'ng muan uh leh ) hong puak/khak uh leh ka khootsiang dong hong zuaksak ding hi'ng.Sia PLMangno' Ngimna tawsawn Nuntakna, RM 15 aakizuak kideih ahih man thakhatin RM 20 in Zomi ansai kizuak va leikha ing. [RM 1 = Rs.10++]
Lungdamna tawh,
Nunpi
ZONET Menber
Kuala Lumpur


Blog Archive