Hong tung takpi, hong kheng vangvang:

Christmas i ngakngak, i mitmul bang saulua liang man, kumbei ding cih ciang hong tung pan, hong tung panpan maw i cih leh hong kheng kik vangvang, hong tun hakhak tawh tawmvei beek tam teei lo a, zong ki-awi sa vanglak ing. A kham hetlo, a cilphulsak ciang ding bekin hong nawk a, hong nusia kik pah hi. Leitung i nuntakna ah nuam isak peuhmah i ut tan, i deih tan kizang manlo, i deihloh i ut loh tata in sawt hongdiah, hong taampih, hong nusia ngeilo tawh kibang hi. Bang hanga hunin mihing nuntakna zong themkhat beek hong khuallo ahi tam maw? Na ngaihsun ngei hiam??

A damlai sunsun mihing te adingin kum thak maitai takin i dawn a, lungdam in i kipak hi. Kumtawp masi hong tun ding ngim khol in mitkha ah i koih teta a, tua hun tung dingin i ngim ciat hi. Masi ciang bel tua hih ning, masi ma in tua hih ning, masi zawh ciang tua hih ning, kumbeima in tua sem ning ciin i gel khol a, ahizongin tua geelna mu manlo in tampi in leitung nungngatsan hi. Mihing gelna leh Topa gelna kibanglo hi.

Kumthak tuunga i lungdamna te khuakhal nisa ah buhpho bangin gamtakin hong kipho sak a, i luzang natawm pan khua-ul kai in i nawkto hi. Nisa khempeuh thuakta hang maw cih zawh ciangin tuuk guahpi in hehpihna neilo in i luzaang pan hong buaksuk kik a, i khepimuk tan in kawt dikdek in, lukhu khu taleng kidaal zolo, tuipuan silhta leng kituam zolo, insungah kibu taleng ki keuzolo in inpua pial peuh leeng a nuam hetlo buannawi lak ah hawktui tawh i tonkhawm hi. Ahi zongin kumkhat hunsungah mittang in mualmong gamla penpen a galmuh theih hun hi a, khuadak theih hun hi. Hih hun nuam aam in zu leh va in zong bu sep in ta nei a, no khoi in a limlim nekpih in mun tuamtuam ah leeng kawikawi uh hi. Zu leh va adingin zong khuado hun sung mahmah bangin a muk uh a nel hun laitak hi.

Hong Kong te in 'guah zu in thupha hong puak hi' a cih mah uh bangin khuadak theihna leh singteh keu singsiang te a malh kikna, khuakhal keu vengveng a no suah kikna ahih manin i kiim i kianga sing leh gua te bek hilo in mihing leh haici khempeuh leh zu leh va adingin zong thupha hi mawk hi. Nek ding singgah leh theipuam hong sel in, singteh hong vul kik a, nisa hanga singteh hulte thelbang thosak maitai sak hi. Phalbi khuakhal nuamsa lo a kibucip vot (leech) natawm hong tho khia in ama nuntakna ding nek hong zong hi. Nuntakna nei khempeuh lungdam in nuamsa uh a, leitung limci in khuahek nuam hi. Kumkhat sunga gahpha tampi a suanna ding a hun kilumlet laitak ahih manin tuukpi sung pen kumlaizang ah kikoih hi.

Luidunga theipi hong min in a khum zuun laitak, zu leh va leh mihingte in nuamsa panpan maw cih laitak in thakhat thu in huihvot in hong nawk hiauin khua hong kidanga, guahtui hong puak meiipi te mualmong lamah mutsiangin khua hong siang sinsen a, phialphiah hong kilaak in, vasa tuamtuam in vantung hoihna leh huihsiangtho diik in kilaam diaidiai uh a, lo lam buh paak leh anthul pak ziziai te in leitung etlawmna kimsak in vantung lam pan a suk etpa adingin zong a kilawm laitak hi ding hi. Lengtong hoih paak leh mehnal pakte, maisan pak leh zozam pakte, ..... 'Aw leitung hoihna.... ' Khuado kha hi a, khuado hun hiven....

Zomi kumkhen kizo a, khuado pawi ningzu ne a, muknel kam nailo in phalbi khuavot in hong nawk to kik a, mut cihtak mut a, nawk cihtak a nawk khit ciang Khuado vawkthau zong thuakzo nawn sam lo in hong bei a, muk puakkham in, khe puakkham a, khut leh khe keu in mukvun natawm kiliakmalh zolo hi. Ahi zongin a tuahun laitak mah i Topa pianna hun a lungdam huai penpen, i khantawn nuntakna dinga hun hong kipia hi a, zang panpan hang ei cih ciang lah hong kheng man zel hi.

Kumbul pan i ngak a nuam a nuamlo thuak keikaai a i ngak tantan pen hong tun taktak ciang hong kheng kik pah lel ahih manin a ngaihsut dan siam leeg, a maleep dan, a khekleh dan tawh thuah in hi leh i kawkkawk, i gal etet hi buang a hih ciang themkhat a phadawm zaw deuh tam. Milian khualzin banga hong tam sung sang i ngaksung a sawt zawk den mawk leh a huthe hiam aw i ci kha ding hi.

A taktak in eima lungsim ciat hi a, eima saan dan ciat hi. I lungsim ah sawt i tamsak leh sawt kikhom dinga, sawt i thaamsak leh sawt i ngawih ding hi. I lungsim mun i piak zahzah aman zong luah dingin hong pai a, lian i piak leh amah lian dinga, neu i piak leh amah neu ding hi.

Na lungsim bawngbuk bangcia na pia a, na lungsim ah amah a lianbel hiam? Hong kheng vangvang hiam, ahih kei leh a tawntungin na taamsak hiam. Na lungsim ah amah na teeng sak hiam? Khualzin bangin a pian sung bek na omsak a, a zing ciang na khakhia kik zaw kha hiam?

Hau Za Cin
Phuitong Liim