Dear,

Kong kupma in dotna khat: sanggam pasal neilo ten a nu le pa deih khat tawh kiteng leh bangci ding?

Kuppihna:

Thu 1-na: Liangko kikim ding thu: Numei leh numei liangko kikim ding, pasal leh pasal, tua zawh ciang numei leh pasal na cih pen bang cihnopna hiam? Pasalte a kikimsa, numeite a kikimsa hi a, numei leh pasal zong kikimsak thei leng cihna hilo hiam?

Numei zong mihing hi a, pasal zong mihing hi. Pasal sung pan kisuak lo a, numei sung pan kipiang hi. Numei bek pan kipiang theilo a, pasal mah kisam zel hi. A ki bukimsak, a ki compliment tuah ahi hi. A kikimhel ciang mihing a piang pan hi. Tua manin numei pen pasal sangin kisam kei zaw, thuneuzaw cih khit theih tuan loh hi. Pasal septheih zah numei in sem theilo cih man bek hi a, mihing hihna ah a kilamdanna om ka sa kei hi.

Pilna siamna leh nasep theih tan gen ding ihih leh zong pasal zah a pil, a siam om thei veve ahih manin tuate pasal zah maha zahtakna piak ding kilawm hi.

Numei a panpih nuam ka hi tuan kei a, zawhthawh thu bek tawh pasal in zong hamphatna khempeuh i bup luak ding hi tuan ka sa kei hi.

Thu 2-na: Nu le pa deihsak pasal in nei pah ding: A piang thei thu a hi tam maw? A piang thei takpi hi leh zong bang hiam a meetna. Amau deihsak tawh kiteng leh inluahsak pah ding cihna hiam? Tua ahih leh justified theih loh hi. A deihsak uh ahih mana inluahza pia, a deihsak loh uh ahih mana inluahza sut, thumaan hilo hi. Tua ahih ding leh tapa inluah ding ten zong nu le pa deih a tenpih kei leh inluahza taan leh hilo ding maw, a thumang lo ciat pen thukhenna zong kibang leh hilo diam?

Ka kupnop zawk tak pen numei in pasal a neih cianga midanga cihthu hi. Nu le pa in a neihsa uh midang khutsunga atung ding a lauhman hi ding hi cih thu hi.

Tanu te pen midang in kingaihsun thei mawk ding hiam? Pasal a neihma teng ei a, pasal a neih ciang mi-a cih bang hikhin thei ding hiam? A nu leh pa sisan a pianpih pen a beithei ding hilo a, a nuntak laiteng a nu leh pa ta mah ahi veve hi. A nu leh pa in zong tanu it bangin it dinga, a tanu in zong nu leh pa it lai veve ding hi (a pasal it kei inteh ka cihna hi lo hi, pasal in zong a zi it kenteh ka cihna hilo). Ki it tek ding hi.

A pasal neih dan ah nu le pa a lungkimsak man bek in tanu te thusim ding leh hamphasak ding ahih leh tanu ahihna thupi hetlo cihna hi. Ta ahihna sangin a gamtat thupi zaw cihna hi dinga, gamtat tawh teh ding hi leeng tate sanga gamtat hoihzaw mi' ta om thei ding hi. Tua te va phungvuh ding hong hi thei lo zel sam hi.

Thu 3-na: Van zuak loh ding thu: Hih pen ama sa ah ka ngaihsut khak loh hi in hong kumkik nuam ing. Zudawn thaikapna, ama pumpi noptaalna in a zat leh ama tenna hi phot hi ven, phamawh ding hiam. Ahi zongin zuak khiat pen phalloh hi henla, ama nuntak sung pen a ut bangin a om zong a tenna dingin zangsak leng sia lawmlawm ding hiam??

Ngaihsutna thak hong piang zel in, kikum toto ni ei.

Hau Za Cin
Phuitong Liim