Korea Khuado Pawi Video

Kuppihna:

Kei zong hih Video ka et ciangin a video ling ngakngak, lapawl sate kikawi loh a tangtat valval pen sang a hun uk, a thugen, a mailama ding peuhmah in kam gial bualbual a zat pen uh ka mit kham ngaungau liang hi. A gen uh ka theih vet loh man hi kei, a mite ka muh nop hang ka thadah suak ngaungau hi. Amau ka mawhsak kei hi. Bang hangin Zomite hi ci lawmlawm a hong kineng cip hiam, hici lawmlawm a lauhnei ihi hiam cih khawng peuh ka naupang lungsim in ka ngaihsun a, ka tangvalno lungsim peuh hong suak in, ka hehtha peuh hong suak dekdek hi. Eh, ka galzak bang lo in, a sung taktak ah ka mipihte Faro kumpi nuai ah kawltang zah mah hilo maw cih ka phawk a, ka ngaihsutna in a bat phak ngeiloh thu khawng peuh ka phawk zanzan hi. ZONET a lai gelh mai leh galkhat pana uipi ham bang naak ngakngak bek tawh piangkhin thei leh kilawm hilo peuh ka ci mawkmawk hi.

Gandhi in india suahtakna ding a sep laiin, "India mite aw, mikang kumpi nuai pan suahtakna kisam hi. I suahtak kei leh sila nuntak tawh nungta dingin hin man om tuan lo hi. Tua manin suahtakna ding i sem dinga, a kisap leh zong i sihpih zaw ding hi 'karenge na marenge' (Do or Die)" na ci hi.

Dawilawkna leh Galvan geel bek teel ding hi leh (Cowardice and Violence) galvan ka tel ding hi. Pasal lauhuai khat a tuak phul ngamlo pen simbeng tawh a kilamdanna omlo hi. Ahi zongin non-violence pen violence sangin tungnung zaw hi, mi dawilawk kiangah non-violence kigen theilo hi ci hi. A ban sim ut te adingin, tampi te lak ah khat:
http://www.mkgandhi .org/nonviolence /phil8.htm

Zogam aw na pang teeiteei in aw, hong kuan ding hi ung. Na tate hih zah lawmlawm a kol kibulh hi mawk maw, a muk uh kikhuicip in, a khut uh kihencip a, a khe ah sikkhau kikhih hi tazen venn. Hong hun dingin hong kuan ding hi ung, khangno lia leh tang hong kuan ding hi ung. Na pang teeiteei in aw. Khasia ken, dah ken, gimna na thuak pen sawt nawnlo ding hi. Na pau zang lo dinga kua hiam hong kaan, na hihna lak lo dingin kua hiam hong khak, thauvui, thautang maw, sisan naisan maw, pilna hauhna maw..... tua te na kisap leh nei ung. Thungetna bek a kisap leh tua zong nei ung. Zogam khuavak ding hi.

Hau Za Cin
Phuitong Liim