Huih thawllo:

Ka pa pen khutsiam hi a (Carpenter/Mistiri/ Lettamah) khatvei kawllam pan ka u Vial Khan Do hong zin in ka pa singkuang bawl, a tutphahsau bawl, a dawhkan or sabuai bawl cihte huh in seppih thapai hi. Tuate zawh ciang ka inn uh lam ding kipan a, innkhuam peh pan a banban in sem uh hi. Kei zong ka sangkhak sung ahih manin ka seppih a (singpekte singnawtna tawh nawtpih, a langkhat ah letsak cih khawng hi), tua banga nikhat ka sep uh pen ka u Do zong gim kisa sim ahi diam maw, a deih banga zo mengmeng lo, ka pa lah a kilem ding a kimat hoih ding deih, a kipelem ding deihvetlo, compromise lo, a kituak mateng bawlpha den ahih manin u Do in sun ann nek laitak, "aman huih thawllo bek deih hi" hong ci kheh demdam a, sun-ann nek zawh na kisem thei nawnlo hi (nuihna tawh ka thapai uh hi).

Singkuang bawl nasep pen a ol hetlo hi a, tutphah leh dawhkan, lupna leh inlam cih khawng a sep baih hilo hi. A hoih a deihte adingin gimna ding khop mah om hi.

Nasep khat peuh ah pelem hetlo in sem in, a hoihpen, a to pen, a kilem pen ding hih kankan leng a sawtna ciang a sep sung a sawt hangin a kizatna nuam in to a, a man a tam hang a sum piak tak hi. Tua hilo a, lokhawh nunung phuaisiat banga i zulh toh mengmeng leh a zat nuamlo in, a na to lo a, a kizat sung sawtlo hi. Nasep khat peuh cihtakna tawh sep huai mahmah hi.

Zomite kizopna NET sungah khat ah tuni ka sim khak khat pen (kiteng thak om hi ding hi ven), na zi dingin nungak hoih khat na khemkhe zo a... cih dan khat om hi. Zi ding zong khemkhiat hi ta zen a, kikhemna tawh bulpan hi mawk maw ciin ka ngaihsun hi. Maban zong kikhemna mah tawh zop tohtoh kisam mawk ven cia maw ciin ka na ngaihsun hi.

I nuntakna pen a taktak mah hi thei leh, hanciam kankan leng, kikhemna, zulhtatna, zawh pahpah utna cihte nusia in, hahkat tantanna, a hoih pen ding delhna in zang thei leng, i mi masa te leh mi etteh tak akigente zong phawk zel kawm in kalsuan leng cih ka lunggulh mahmah hi. Kuamah a siamsa a piang omlo a, a kisin tawm vive hi hang kici hi. I phakna ciangah a hoih, a to, a kilawm pen mah ngim teitei leng.

Zomi te i tai hat deuh kei leh minam dangte in hong pha kha ding uh hi. I khantohna a kip dingin muanhuaina mah masuan kankan in sem ni. Kuamah ngak man ding hi khang, ei pai in pai ni, miten hong delh zel hen.

Hau Za Cin
Phuitong Liim