Sin in, Pil in, Zang in.

ZOMI SIAMSIN Magazine, Vol.1 (February 2006) lemsuk zuaizuai leeng - III :

.....a ban zom leuleu leng .........

Lasam 2 (Poem) hoih ka sak mahmah hong tuangsak nuam ing.

1. KE'N ZAHPIH KE'NG by Boy Hope

Ka mi Zomi
Ka pa Zopa
Ka nu Zonu
Ke'n zahpih ke'ng

Ka khua Zokhua
Ka inn Zoinn
Ka an Zoann
Ke'n zahpih ke'ng

Ka ngeina Zongeina
Ka pau Zopau
Ka lungsim Zolungsim
Ke'n zahpih ke'ng

Ka lai Zolai
Ka la Zola
Ka laam Zolaam
Ke'n zahpih ke'ng


2. ZOGAM TUUNNU'N NAUBANG SAANG LEENG by Ngalliam Vontawi

Tuunnu Zogam mimbang pianna,
Lamh gil kiatna, Lamh puan zawnpih,
Zosuan vontawi, Lia leh Taang aw,
I pian gamlei galin don ni.
Gamlei tawh lawm Zolawkta tau,
Thulguah luang ding Lummei kisung,
Phalbi daidam huihkhi laan dang,
Tang khuakhal ding tung Lengthe khuang,
Pianna gamlei Lo bang tulta,
Giabang zuunin zu bang puah leeng,
Lungtup gamlei kilbang khang ding,
Zogam tuunnu'n naubang saang leeng.

Tuunnu Zogam kilbang kha'nna,
Tangbang kholhpih laizom teng aw,
Khuaheek siamin lungngai dih ni;
Taikhuaval ding gil buh-al khuang,
Khangtheilo in zuang hong tho vaw,
Pian gamlei zil, gamlei pianzil,
Siingta'n nuih ciam hong leel zongin,
Eimau khangsawn siamsin momno,
Thalbang khat in maciang suan leeng,
Zehzum loin paaibang pom leeng,
Lungtup gam ngei phuhbang kho ding,
Zogam tuunnu' naubang sang leeng.

NB:
1. Magazine a kigelh tawh na enkak in.
2. "Siingta'n nuih ciam hong leel zongin" cih dan kammal te pawl tawm zat thei leeng bang aci tam?.


Keima muhna tawm kuppih nuam ing (short comments and suggestions) :

Hih Magazine pen a thu te hoih kim mahmah hi, hici zaw deuh leh cih tam kei. Zomi te khuak in thu ngaihsun zo mahmah, thu bun mahmah, kamsiam mahmah hi hang ci kimu hi. Thu lui or khanglui thu pan tulai thu, pilna thu leh kikholhna thu, lunglen thu leh ki itna thu, biakna thu leh ngeina thu tampi zuun zo mahmah hi hang cih hong musak hi. A thu leh la te kammal zatte hoih.

Ahi zongin lai at dan leh laimal gawm leh 'punctuations' pen kipuah thei lai ding khat hi. [Tu laiteng punctuations thu ZONET ah hong thang mahmah hi...ha ha....] Gentehna in a tunga lasam (poem) te bang a kigelhna ah comma tam kizat lua hi. Lai at ciang khawlna (comma) tam zatlua, ahih kei leh umna (bracket) tam zat lua cih pen a sim nawngkai, hamsa hi. Tua manin a kisam mahmah na lo te ah punctuations zang kei leng, a laimal mah gelh suak lel leeng hoih zaw hi.

A thumna ah English spellings pen tam kikhial deuh. Ahi zongin English pen eima pau hilo ahih manin pha dawm. Zolai siam mahmah peuh leng English ah khialhna te pen ki maisak thei hi.

Ali na ah documentation article cihte pawl tam deuh hong tuang lai henla, phawkna - khualui phawkna, lawm leh gual tawh nuamtak a kikholhna phawkna, lawm ngaih nu/pa phawkna, nu leh pa phawkna, etc. leh hun nuamte phawkna cihte zong kihel zek leh bang aci tam.

Zomi sungah milian leh mi thupi te thu khat leh nih khawng a tuangsak uh hoih sa ing. Laisiam (All-D ngahte tawh holimna), tu laitak mi minthang (lasiam, music siam, kimawl siam, ulian, Pasian thugen minthang, etc) leh hunlui a mithupi te cihte thu zong tha hong pia mahmah hi.

Bangbang hi leh mailam ah hong hoih toto dingin ka lamen hi. Volume 1 na hipan dingin thupi mahmah hi.

Zomi Siamsin aw - Sin in, Pil in, Zang in.

Hau Za Cin
Phuitong Liim