"A lum lai, a lum lai":

Kumlui bei kuan, kum thak hong nai hiaihiai cih lai in a kuama peuh kilawp in Zeisu pian hun leh kumthak muak dingin lungsim in it leh ngaih omna galdon vangvang tek hi. Khuado Pawi mun tuamtuam ah kizang in Zeisu suah pawi leh kumthak kumkhen zat dan tuamtuam tawh tukum thak i pan hi. Kumthak hong tun ma in ngaihsutna thak tampi kigen khia a, tuate lak ah Zomi te in kum thum hal in khatvei ta -

1. Khuado Pawi zang khawm leng;
2. Zomi Nam Ni zang khawm leng;
3. Tukpen suih kidemna nei in kimu khawm leng;
4. Pasian Biak piak khoppna kikhoppi khat nei thei leng....

cih te kigen khia hi. A dang zong omlai in teh, tuate khempeuh a tangtung thei hi a, a tangtung ding hi a, a tangtung sak ding eiteng mah i hi hi. Ahi zongin tu in i bawhpah kei a, i diah cip khak leh a tawlam ah zung na kha dinga, bohkhiat kik thapai kisam ding hi. Tua manin koi sung lawmta holim te gen bangin "a lum lai, a lum lai" ci a i bawh pah sasa kei leh zekai deuhdeuh kha ding hi hang.

A sawt lo in Zomi Nam Ni hong tung dinga, a khua khua, a gam khenkhen in, a gamkhatkhat ah cih bangin zat dan ding kigelgel ta ding hi. Ahi zongin leitung bup Zomi huap a zatkhop dan ding zong tua kawmin i lungngaih ngaih ding, i mangngilh loh ding hoih kasa hi.

Khanglui te in Simbeng zong kim citciat tangzang kiguan ci a, a sem ding a kitangzang sak om in, miksi zong lubawk kiguan uh ahih mah bangin amin a makai ding kiseh tawm in a bul panpan ta leng, tu kum a hi thei nai kei zongin maikum, kum kik ciangin hong piang takpi dinga, a kigenzah val a hamphatna leh kimuan ngamna zong hongpiang zaw tham lai ding hi. Tua hi lo a, i thugente singtung kah banga a bul ah i kumsan kik zel leh a ging maimai zam leh khuangte tawh kilamdang lo ding hi.

Khuado Pawi kha 10 bek in hong halta a, Zomi Nam Ni kha khat val deuh bek omlai hi. Biak piak khoppna khat pen Zomi te nasep tawlngak laitak [tawlngak lai bel nei kei hang, ka cih nopna in anlak khit leh lo pawi kik kikal khawng] mah in hanciam leeng... kum beisa lama Zomi Festival of Praise a khatveina pen mah zom to kik in a lianzaw sem a behlap toto in hih leng... ngaklah huai sa ing.

Tua ahih manin, min kum nga kum sawm a gel kholh uh hi a, en zong kha 10 bek a om ta Khuado Pawi pen bangci zat khawm thei ding i hi hiam cih geel hun ahi diam ci ing. "A lum lai" mah hi pah lo hiam ci veng aw.

Nektawm leh mimal lungkimna bek zong ding i hiam, gualnopna pawipi te zong lunggulh lo ding i hiam?

Hau Za Cin
Phuitong Liim