Malaysia Zomi Restaurant Lungdampihna in:

Hih thu lungdam huai hangin a sai Tg. Suanbawk lungdam pih ing.

Kumpi nasem in, khasum sang te a sum saan zah ding ciangtan om lianlian a, summeet bawlte adingin sum ngah ding ciangtan om lo hi. Khasum hih zah sang tawmzaw theilo ding, hih zah sangin tamzaw theilo ding cih hi lian mawk a, kha khat sung na nasem in na sem kei zong tua zah lian hong kipia ding hi mawk hi. Semlo in ngawl hen cih kizang theilo a, zinga kuan leh nitak a kuan a thaman kikim lian mawk hi. Tam semta leh khang tuanlo a, tawm sem taleh kiam tuanlo hi. Anngawl lo dingin hong kivaak a, a haulo dingin hong ki hencip hi. Kumpi nasem tawh a hau theite pen 'miracle' hi. I Topa hong kumkik ciangin zong lamdang a sak ding ka um hi.

Sum meet bawl leuleu pen a sumpi ding ciangtan omlo a, pek khat bek pan zong kipan thei in, leiba tawh zong kipan thei ding hi. Nobel Prize ngah Younas in USD 27 tawh a pat pen tuni in a pung, a meet pen a hawm ziahziah hi ta a, kiamlo in khang khang lai hi. Bem pan na pan a, ba pan na pan zongin sum meet bawl pen a khang khang hi mawk a, sum in no a keuhkeuh hi mawk hi. Ko khua nupi khat a pasal in vom man in sum ngah den a hih manin a lawmte kiangah 'ka sum puakna ka kawngvun pol' ci liang hi. A tak a zuau thei khang, sum kibehlap cihna hi.

Na khut sep thaman hong kipia ding hi cih bangin nisim a zing na thawh baih man, zan na lup hak man, khua ul luanga na sep gimna, maizum gensiat pawisa lo a na thatang tawh na sepna pen hong ki behlap sak dinga, na ansaal a dimlet in hong luang ding hi.

Cold drinks (but hot inside later) te pawl tawh na kipan kei peuhmah phot leh i pi i pute, i ni leh gangte, i tanau bek hilo i minam leh makai tein zong hong pakta dinga, Christian principle tawh a ki bulphuh nekzonna hi ciin hong zahtak sakin na kipatna a neu hangin na tunna ding mun lian hi cih Job nuntakna hong bangsak ding hi. (adivisor hi kei ing, a siangtho a limci in zong ki hau thei lua hi aci nuam hizaw ing).

Topa thupha hong tung ta hen.

Theihnop pong pong:
Taungzalat cih pen bang cihna a hia? Mi min, mun min, khua min.....

Hau Za Cin
Phuitong Liim