Lai i gelh ciangin:

Kei ngaihsutna tawm hong gen leng. Lai i gelh ciangin Zomi te hoihna tam gen in, a hoih lohna (a om khak zenzen leh zong) tawm gen in, pulak lak se dah leng, bang a ci dam ciing. Minam dangte a hoih lohna uh i muh theih hetloh pen tung et lua hi kha thei ding hi. Amau sang kiniam koih zaw den hi kha ding hi.

Lai at cih pen ngaihsutna gen khia hi a, thu i ngaihsut ciang cihna tawh kibang hi. Mikangte pen kum 18 a cin ciang insung pan paikhia in amah bek in tuamteen ta a, amah leh amah kikem hi cih i thei hi. A vekpi un a kikem zo hi pah lo a, a kikem zolo, a phengvaak, a gilo, a ginalo, a cimawh zong na om veve zel hi cih i mangngilh loh ding hi. A ci thei zong om a, a ci theilo zong om veve hi. Zomi te zong tua bangin kipan ding hi leng, a hih zo ding nu leh pa om dinga, a hihzolo ding nu leh pa mah na om ding hi. Zomi te in hih zolo ding, mikangte bek in hih zo ding cih dana ngaihsut khit dingin ka tuat kei hi.

Nu leh pa leh tate kikal, inluahza leh teek leh mo kikal zong Zomi te bek in hamsa asa ihi kei a, Zomi te a buai vetlo a akicing lua zong om veve hi. A hamsa khat leh nih om manin minam bup tua bang cihna hi cih pah dingin ka tuat kei hi. Ei muhna ciang leh ei theihna ciang ah tua bang hi kha dinga, i gen khak loh zong om thei hi, mit langkhat bek hak lela in thu gen kei thei leng, merits and demerits, a hoih lam pan etna, a sia lam pan etna, cih bangin a kikim in buuk tangtang phot in, tua ciang gen khia leeng.

Guai kei bel Zomi in Pasian in hong piangsak ahih manin ka it mahmah mai a, Zomi a guallel sak den te bel ka pakta het kei hi. Zomi zong gualzo sak zel sam leng ut ing. I gualzawh na zong tampi omsam hi.

Inkuan i ki huai dan, nopni dahni i veh dan, meigong tagah i huh nop dante i gualzawhna hi. Mo leh teek kumkhat kum nih insung khat ah teeng khawm, mo in a teek a zahtaak mahmah, teek in a mo a huai siammah thu hong kigen izak zong om hi. "Ka pa in ka zi nau haih an ne zolo a nek theih ding zonsak un ci" cih khawng Testimony hi a, mo it teek khat hi pah hi. Tua bang a tetci, witness nei tampi om ni. Ei tangthu zong gen ni. Mikangte in ci, mivomte in ci, cih bekbek thupi sak den nawnkei leng. Ei sung pan zong gentehna ding a hun khop nisim in thupiang omsam hi. I theih loh, i muh loh, i galzak leh laibu pan i sim tawm khawng sangin ei innsunga thu piang, ei khuasunga thupiang, ei gamsunga thupiang For Example a i zat theih ding tam hi. Tua te enkaai ta leeng e.

Ka pianna sisan Zomi ahih manin ka pianna zong ka pahtak (appreciate) ngai hi veh e ka ci hi. "Self appreciation" pen kisam veve mawk hi leitung ah. Taiwan ah a kigen minthang mahmah "cold spring" ci uh a, tuivot a kisilna ci uh hi. Sum 100 kipia ta zen hi. Ka kisil uh ciangin suangsung pan tuiphul khat hi lel a, ko khua luitui a kisil mah tawh kilamdang lo hi. Ahi zongin gengen uh a, gen minthang uh a, a thupi kisa in sum 100 kipia tanghial hi. Shillong ah Bishop Falls, Elephant Falls, Cherrapunji Falls ciin tuizeu (water falls) nih leh thum a minthang om hi. Nikhat thapai in ka et uh leh ko khua nawl a luineu tuizeu mah bang bek na hi mawk a.... ka thangpai phial hi.

Min a mau van phat siam a, a thupi mahmah lo zong phat in a thupi suaksak uh hi maw. En a thupi mahmah zong phat lo in a thupina lakzolo hi mawk hi hang maw ka ci hi. Mi'n i sum neih sunsun thupi mello in hong nekpih ziauziau uh a, zatna ding a theihloh zah dong un ei neih sunsun i lotlot mawk (suak) hi.

Tua manin self - appreciation zong uang bawl ka sawm mahmah hi. Uang bawl ci a, uanglua hi tuanlo in, a hihna bang tak zong i hihsak zawh loh omte pammaih hi.

Tua manin lai i at ciangin ei leh ei zong ki sangsak deuh in, kiliansak hi lo in ki neusak tuanlo in, ki tungsak hipah tuanlo in ki nuainung sak denlo in, mi dang mudah hilo in midang zong eisanga hihkhial zaw tam hi cih thei in, mi kilailai ei kiliakliak cih dan hi tuanlo in, i ki itna te zong gen siam leng, mi hong muhna sangin, ei kimuanngamna (self confident) lian dinga, i khantohna manlang zaw lai ding hi cih ka um hi.

Deihluat mana gen khial a om leh hong maisak un,

Hau Za Cin
Phuitong Liim