Zomi tawh kisai holimna khat:

Aizawl na tungto maw. Nuam na sa hiam. Ko tua Tribe, no tua tribe, ..... tuate, tuate cih omlohna a nop dan na ciam kha ding na hi ve, hoih mahmah ei. Shillong khawng banglo in i vek a Mizo kihi khin mai hi, nuam mahmah hi. Shillong ah bel Zomi mina nasepna sang, tribe min tuamtuam a nasepna tam in, a kizang nuamte adingin bel kizatna ding tam mahmah mah hi. Nang zong tribe level a thupi sim mahmah pawl hi vanglak in hong thei ing, Zomi min ah na kizatna thei kei ing. Zomi leh Mizo ah ka kihel zahin a dangte ah bel kihel khin zo kei mah ing. Tribe min level a kizat pen Zomi min a kizang kici theilo hi.

Kei ngaihsutna mawltak leh hoih kasak dan ah bel, a thupi, gen tak khollo a hih hang gen maimai leeng - tribe tuate tuate cih om sese lo in i vek in min khat - Zomi cih bek mah paipih leng, tua pen phungvuh leng, i tribe minte i phungvuh zah in phungvuh leng i minam min dinga i deih mahmah, zong i thupi bawl ngiat ahih hang ei leh ei kicihna dinga i zat nop hetloh pen mikhual den lo dinga, Nation min hong suak taktak thei ding hi. Tua dingin Zomi Nami Ni khawng pelh lo in bawl teitei in, Zomi Convention khawng zong nei zel in, recognition khawng zong India govt. ah nawt vutvut mai in, ei zong tua tribe ka hi cih sang Zomi ka hi mah kici pah lel leng, thupi zaw kasa hi. A min lah deih mahmah in lah zang het kei leeng, ei tungah kibulh nuam het kei leeng - bang phattuam ding.

Zomi thu pen i tenna gam a kibat loh mah bangin i theih dan, i lak dan, i saan dan kibanglo hi. Manipur lam ah theih dan tuam a, Mizoram ah tuam a, Kawlgam ah tuam a, Bangladesh ah tuam dinga, gam dang a om te muhdan zong tuam ding hi. Tua ahih manin mun khat bek a te ngaihdan zong dik khin kici theilo dinga, kikupkup, kikholhkholh, kiho lim zel zong kisam ding hi. Hih gam tuamtuam ah panlakna paito ciat a, tuate bangciang tunga, bangciang maban om lai hiam cih khawng zong mipi ading ahih leh mipi in i theih zel zong a hoih mahmah dingin ka um hi.

Critic tampi kinei leh a hoih ding hi ven, kuamah tua bang omlo hi mawk lai - a koikoi ah - Manipur ah, Mizogam ah, Kawlgam ah, Bangladesh ah, mun dangah - a dah huai i ci diam, a hoih ici diam, a lungdam huai i ci diam, mipi ngaihdan bang, gam tuamtuam ah Zomi makaite te ngaihdan bang cih khawng theih ut huai, zak uthuai hi; mipi ngaihdan zong khatveivei a haihuai mahmah a bat hang thu hoih pipi om hi. Aizawl newspaper te ah critic sim ding om den hi. Pu R. Vanlawma thugelhte bang na sim lecin zaknuam thei mahmah hi. Ahih hang amau tungnun kituh pahpah lo uh hi. Debate or kinial uh, kitawng uh, ahih hang tungnun kituh lo uh hi.

Gamdang pai cih ah bel gamdang paite in policy lianpipi hong puak thei tuan dingin um kei ing, thei sam kei ing, mipil tampi pai ding ahih manin tuate ken thei kei ing. Kei bang bel a thupi kong gen ding zong a thei tuanlo hi ing. Ka ngaihdan mawltak tawh 'minam min ki ciamteh leh' (Zomi recognition) cih ka ngaihsutna a kum hi lel ing, thupi a salo zong tampi om inteh. Policy hoih guang ding pen ami tawh kisai in um ing. Gamdang pai mana policy hoih pipi guang khia thei ding hileh, kei a pai nunung pen hi ing, kei mai ah mi tampi pai, ka pianma pan mi na paipai khin zo hi, kei bangmah hilo hi ing.

Gamdang pai man hi lo in, minam it na leh phawkman, holimna ding space leh internet a om man a kiholim thei hi zaw a, ngaihdan mawl cikcik haihuai pipi kong kum maimai hi, kuamah kup nawnloh thu hizaw in thei ing. [Kum lui in U Zauva tawh ka holim uh a, ahi zongin tun kizom nawnlo hi, amah lah peih nawnlo hi inteh, kei zong peih nawnlo hi ning. A ban kuan zom ding cih zong kithei nawnlo hi. Midang zong a kikum tampi om, gentehna in kong gen pak hi lel].

Zomi te pen thu kikum thei khollo in, tungnun kituh pahpah in thadah huai thei dingin ka tuat takpi hi. Thu hoih pipi zong tungnun kituh pah in, dotna khel pipi khawng kithusim saklo in nuaisiah suk pah sawm in, lungduai tak a kinialnial cih omlo in khuttum lik pahpah. A kup peih nawnloh ciang a bei mai, thuhoih ding pi mualsuah loh a kholsan tampi om ding hi.

ZONET leh SSPPNET sung bang i et leh tuma kum beisa te ah mi na kikum gawp khin ta hi. Kei kup ma in mi'n na kum khin uh hi, ahi zongin tuate in zom nawnlo hi phot hi. Pha tuam salo uh hiam, ahih kei leh mi tawh tungnun kituhna maimai ding ahih leh ci-a hun leh sum pammaih sa a kum nuam nawnlo hiam ka thei hi.

Mailam ah zong a phur khat in hong kum kik dinga, a peih tawp ah a bei kik mai ding cih a lauh huai hi. A tua bang a hun a beibei laitakin Zomi pawlkhat - vai suak, kawl suak, mikang suak, etc. etc. cih khawng om hi.

Tua ahih manin ei pau kithei teng a manlang theithei a ikigawm kei leh i pau i ngeina a mangthang dinga, i minam min zong History book bek ah a om mai ding hi cih keisang a theizaw vive hi hang.

Tua manin kikum in gen khawm zel in a hoihzaw ding, a thupizaw ding lam mainawt to khawm zel leng hoih ding hi. Zomi promote ding maw, Tribe minte promote zaw ding cih khawng zong e.

A theizaw te in hong kuppih ding lamen ni.

Hau Za Cin
Phuitong Liim