Banghangin gamdang ah teengsuak:

Tensuak mah lo a, i tenna ciangciang i gam hiven! ha ha..

India gamah zunbuk peuhmah hiing ding cih ngaihsutna om hi. Lamdang kisa lo hi. Lampi peuhmah vuikhu ding cih pen a hi ding sa in kituat hi. Mipi paikhawmna khat om peuh leh sound system a ging theithei kizang nuam a, sum leh pai haute kiliansak pah in, zum nasem thunei khat na hih leh kiliansak pah, maibiak pian kei leh pau nuam pha lo cih bang hi pah se hi. Zakdah huai mahmah a, namtui lo hi. Gimhuai a, i nuai vang hi leh kitumtum nuam hi. Ki om peihlo, kimu peih lo hiven.

Shillong ka omlai gamdang zinsa khat hong ciah in 'amau kisil buk te ah maan kila leeng innlam studio sung sang hoihzaw' ci keei hi. Tua ci khin cihna hi tuanlo in, migam leh ei tenna gam a gentehna hi. Muh ding tamlai, theih ding tamlai, sep ding tamlai cih hong lak hi.

Nikhat nasep tektek gamdangah thaman sang zaw a, an nek khat tektek gamdang ah an hoih zaw hi [an lim zaw ci kei ni, an hoih thupi zaw]. Nungak tektek zong - i Zolia te mahmah zong gamdang ah etlawm pah zaw uh hi, tangvalte zong hi sam. Nasep puan tektek siangtho zaw deuh a, nasep tektek khua ul kai dan phadawm hi. Tua te hangin mi khatvei gamdang tung peuh leh ciah kik ding hamsa hi. Taamsuak ding olzaw hi kha inteh.

A biakna, a Zo ngeina leh a minam itna mangsak kei henla hi leh nikhat ni ciang 'Zogam hong paal dinga' tua ciang ei zong i gam deihtak puah in leitung level in i zeem dinga, tua ciang kuamah gamdang lunggulh nawnlo ding hi.

Hau Za Cin
Phuitong Liim