Switzerland ah zin, hong hilh lo

Amasa in thai mah ciang hong tung takpi ta ding i Topa pianni Lungdambawl Pawi nuam tak in na zang un. Kei zong na cih bangin i 'laigui zom' te ahi kei ding cih theih vet loh lak ah na kibual hanhan sam ing. Christmas concert ka neih zawh uh kal khat kizom ta a, English, Chinese, Bilingual, Children program, youth program, adult choir cih bangin kizom ziahziah hi.

A music tum uh, a lasak uh, a thugen uh na khat peuhpeuh pen eilam bang hetlo in professional mahmah vive hi uh a, lasak a nop deuh leh zong laam gawp, awng gawp, hawk gawp ci zaw ni, tua dan om hetlo in Pasian zah siam takin, Sakhi singgah zuan bangin gamta khiankhian uh hi. Khangluite in 'Pu te leh lamphung kinawk zolo' a cih bangin, i pute pen i phakna ding hamsa lai veve mawk ding hi. Ahi theilo ding bel ci ngam nai kei hang, na khempeuh ahih thei Pasian bia i hih manin. Nang zong na khualzinna lam nong gen nailoh hangin na lungsim ah 'ei zong hi bang i hih hunding ngaklah huai si e maw' ci a gual na eng ngaungau hun om saam in um ing.

Vai polhteh te kiangah i ten khak mawk hangin ei tenna teng beek mi gam bangin siangtho sak, puah in keem leng cih om hetlo a, amau ngeina hoihlo tampi ki adopt (kizui, copy) mawk pen dah huai mahmah hi.

Switzerland ah zin, hong hilh lo:

Nang Swiss watch kizuakna ah pai a, hong hilh lo, en zong leitunga Nai (watch) hoih pen kideih tak hi ven. Na zinna report leh na lungsim a na ngilh theih loh thu pawlkhat koi hiam ah hong at khia lecin kiza nuam mahmah hi. Tu'in hih ka kiangah Vaphual Magazine (2004, Delhi) copy nih leh Leivui Panin copy 2 tawh ka tu a, na article Some Words Worth Knowing na cih khawng ka na simsim hi.

[Hih Vaphual magazine ah Rev. Khup Za Go a damlai in hoih a sak pen article ka dot leh Pasian leh Pilna by Zam Khai, D.Min., US gelh teel hi. A thusuut dan pen systematic sa mahmah a, researcher lungsim, scholars lungsim ciimtak nei hi ci-a... lai at hi bang ding hi ci hi - kong behlap pak hi, amah lian kua hi hiam cih keibang a thei pak lo hi ing, Pa Khup in zong a theih leh theih loh dong tuan kei ing.]

Na zinthu nong gen ciang, a minthang vangvang Frankfurt Book Fair khawng ah a pai zo tangtang Zomi i om hun ding ngaklah huai tak ven, Effil Tower lawmte in amaan a lak uh ka muh thupi zeza sa mawk ing e (zuning bang lian, make up omlo, professrional photographer te in a zeem uh khatzong om vet lo).... Nu Buangi tawh zin thei na hih man in hong lungdampih ing....

Laitui papi khat in 'Leitung pen ka lamet bang kei' a cih hang, leitung pen khatbek a muh ding, khat bek a zinna dingin a pammaih lua mun om zeuhzeuh sa mawk ing, kei muhna neucik sung bek ah zong.

Joshua zong tangval ta lo ding hiam Pa Chin? Kimuh loh kum 10 bang hong naih nuam hiam ci veeng aw...

Lungzuan zatam meiibang theng tuam!!

Lawm Thang Za Lun kammal kawm pak leeng, ka singdang Cingno in 'keima khut mahmah tawh ka bawl' acih ngaungau liang, a ki lawm mahmah Christmas Card, tu nitak Christmas concert ka etkhop zawh uh cianga a bag kaang sungpan hong lakhia a hong piak, tuni tana Christmas Card ka ngah om sun ka mai ah tunga en hithiat kawma kong mail hi ei. Ka lamet loh pi, hongpiak ka saan ciang' 'Lungzuan zatam' meiibang theng tuam hi!!

Hau Za Cin
Phuitong Liim