Zomi leh Beh min tawh kisai

Themkhat kei zong hong kum kik nuam ing: A family name, surname, or last name is the part of a person's name that indicates to what family he or she belongs kici hi.

1. Min i cih bang hiam?:

Kisapna ding, kiciamtehna ding bek ahi hiam. Leitung mun tampi tua aci om dinga, a ut peuh phuak lel ding uh hi. Ahi zongin Zomi te'n min a deih peuh uh phuak ngei lo a, ahihna ciang bek uh phuak ahih manin Inkuan tangthu gelhna laibupi ahi hi. Family Record book ahi hi. Zomi Inkuan khat min a tupa pan a pa a pu, a pusawn ah lehkan toto leng (or vice versa, asuk lamin zong) amau inkuan tangthu khempeuh na kiciamteh dinga, sihzawh mualsuang leh vanneih te tawh gawmkhawm leeng tuate inkuan i thei ngei het kei zongin thupi uh hi, thupi lo uh hi cih khat tangthu, behkhat tangthu pen kim mahmah ding hi. Tua manin min pen Zomi te adingin 'kisapna ding bek hilo' in 'Inkuan laibupi' hi mawk hi. Tua manin thuneu loin minphuahdan zong paidan khat na nei uh hi. Saman lo pi, sa go lo pi in Za Kap, Za Go cih min phuak thei lo hi (deih in hoih sa ta leh min nuihsan ding hi).


2. Min at dan tuamtuam:

English, German, Dutch, French leh adang pawlkhat in min pen kammal nih hiam thum bek nei uh a, a tawpna ah behmin (family name, surname or last name) na zang uh hi. e.g. Gearge Walker Bush (Bush pen a beh min cihna hi). Spain te in min nih hiam thum hiam nei uh a, a nu leh pa behmin tuak tawh zong min nei uh hi. Italy te in min kammal khat leh Behmin na bulh ziauziau uh a, olsak mahmah uh hi. Portuguese te in bel min nih leh thum leh behmin 1 pan 4 bang na nei mawk uh hi.

Tu laitak i zat dan pen nu leh pa min phuak (pi leh pu, pate, ni leh gangte hizaw) pen kizanga a tawpna ah behmin i koih hi. e.g. Zam King Mang Bawmkhai (hong na theisiam henla). Behmin a tawpna ah koih pen a tunga i gensa te banah Russia te zatdan zong na hi hi.

Phillipines te leuleu in tuni tan in zong behmin neilo om uh ahih manin kumpi in A, B, C, laimal tawh a kipan dingin a gamkhen hi. e.g. Leilu lam te A tawh kipan ding, Leitaw lamte C tawh kipan ding, a gam laizanga omte G tawh kipan ding cih bangin a gamkhen na hawm a, A tawh a kipat nak leh a ut peuh behmin kiphuaktawm thei uh cih dan om kha hi. Nupa in a tate min ah a nuleh pa behmin hyphen koih in zangsak uh hi. Zomin phuah dan in gentehna khat zang leng, gualnam leh guite tanumei min ding pen Lian Cing Gualnam-Guite, (a numei gualnam hizaw leh a tanu uh min pen Lian Cing Guite-Gualnam) etc cih dan hi ei.......

China, Korea, Japan, Vietnam, etc te leuleu in min kammal 1, 2 or 3 nei uh a, ahi zong in a gelh uh ciangin behmin gelh masa hamtang uh hi. e.g. Mao Zedong pen Mao (behmin) Ze-dong (Ze leh Dong pen a min kiphuak pen hi). Hi dan in gelh ding hi leeng (Sia King Mang mah in hong na theisiam henla) Bawmkhai Zam King Mang cih ding hi. Bruce Lee ci a i theih pen a min taktak ah Lee Siu Lung hi, Lee pen a behmin, Siu Lung pen a kiphuak min hi. Jet Li zong Li Lian Chie hi a Li pen a behmin a dangte a kiphuak min hi kik hi.

Leitung bup paidan (Shillong a Khasi leh Canada ah namkhate cih loh) ah nupa kiten ciang pasal behmin kila hi. Ahi zongin mikangte pasal 10 vei a nei bang om leh a tate behmin kibanglo ding cihna hi.

3. Zomite min leh a atdan:

Zomi te pen min phuah dan ah a mindap (foundation, base, a kingakna, a bulpi, a kibulpatna, a dapphah) aki nei ngeingei ahih manin kammal khat (a bul patna) pen a kineisa hi pah a, a phuakte in a ban a deih dandan a deih zahzah kammal phuak thei hi. e.g. Mindap + Za Hau, Za Kap, Za Go, Lian Thang, Lian Tual, Lian Kham, Lian Tuang, etc

Min at ciangin official peuhmah ah Lamka lamte in behmin tawh a at pahpah uh pen a hoihna khat om kasa mahmah hi. Official ka cih ciangin kumpi min khumna leh lai pawimawh khempeuh ah behmin khum pahpah uh hi. e.g. Rev. Pum Za Thang Tombing.

4. First name; middle name; Last name; Family name; etc.....:

US, Australia, etc te cih dan zuih ding ahih leh i Zomi ngeina pen nusia ding cihna hi a, i kisiamtan a, pha i sak leh ei mimal ngaihsutna hi henla, minam bangin bel i zuih nailoh mah a hoihzaw tam ci ing. Zong i thupi pih veva ding a om ding ka um kei hi. Gen hoih sawm teitei leh mipi lak ah zuak teitei dingte pawl in zong ka ngaihsun kei hi. I supna ding, i meetna ding bang om hiam ciin kan phot in, mi hih dan tawh a kilehbulh lua leh thongkiatna ding, liau lawhna ding a hih leh khek dingin dama ngaihsut ding hi. Tua ahih kei leh a ling peuh bawh kei ni, Sia Hau Go cih bangin 'Huih mut bangin suk hoi, to hoi doidoi lo ding' hi hang cih ka ngaihsutna hi.

Englishten atdan na nei uh a, Spanish ten at dan tuam na nei uh a, Mongoloid lamte in amau at dan nei kik uh a, tua bang mah in minam tuam in atdan tuam tek nei hi..... tuate atdan dik cih om tuan lo hi. Zomite min at dan pen Zomi te atdan hi mai a, dik, diklo a ci thei kuamah omlo hi. Zomi min atdan diklo mikang min atdan zuih ding hi, Sen min atdan zuih ding hi cih sese a ngaihna ding ahang (reason) thei tuan kei ing. A tom a gen leeng 'l Zo ngeina kaikawi in, deih kaih in mikang cih dan zui ni' cihna hi a (let us conform into the western way of writing, naming or practice), kisam i sa taktak hiam thei kei ing.

Last name pen a buaihuai in ka ngaihsun kei hi. Behmin pen last name ah atsuk ding hi mai hi. e.g. Siate, Hau Go leh Khup Za Go min at ding hi leng:
First name = Hau / Khup
Middle name = Go / Za Go
Last name or Family name = Sukte / Suante

India President pa min pen Avul Pakir Jainulabdeen Abdul Kalam hi a, bangci gualh ding, a masa, alaita, a nunung ding koi pen zang ding?? Tony Blair, Nelson Mandela, Kofi Annan, Billy Graham, Than Shwe, Khin Nyint, U Thant etc a middle name uh bang hi ding......?? ????

5. Inkuan min nunung kibangsak ding, etc....:
Gentehna hong kizang pen mah zang vet leeng amah cihna hi tuan lo in: Pu Khen Za Mung te in inkuan in Moong a koih ciat uh leh bang scale zang uh hiam cih ka thei kei a, amah Pu KZ Mung pen a upa pen cihna hiam?

A upa pen min kila ahih leh hi ciin ngaihsun leng.

Sia Laang Pau dotna...."Tua ahih leh Doctor pa aw, gul in I tal tang hong tu leh i gawl ah gak ding i hiam?" a cih dan deuh in a upa pen numei hong hi zenzen leh, a mintawp zong tangsak ding i hiam, e.g. a mintawp Niang hi leh, a nau pasal teng in zong a min tawp vuah Niang a koih uh kisam vem mawle. e.g. Khup Za Go Niang, Zam King Mang Niang, Hau Za Cin Niang, Hau Go Niang, etc.... Pasal bek zang ding ci leeng unau pasal om kei kha leh min tawp neilo in om ding cihna hiam??

Behmin i koih kei leh Sia Tg, Sianpu cih bangin Zomi cih koih leng bel kizo lian mawk ei. Taang Zomi in zong zang a, Shillong ah ka sangkahpih K.T. Zomi kici in zong zang hi. A zang dang zong om in um ing.

6. Kuppihna pawlkhat:
Korea lamte Hmar ci a kisap pen zong hoihna ven, Zomi 100 bang om leh i vek a Zomi hong kicih ding zong hi khin thei samlo dinga, tulza bang om leeng hong piang theisam lo ding hi. Sia Suanpi in Korea, Japan, China gamte cih dan a Suantak Khup Suan Pau a cih zong a sia hi kei in, ahi zongin Khup Suan Pau Suantak mah kilawm sa zaw veve ing. Khualzinna ah akisap leh amasa dan in zui leng zong (kei zong hih lai ah Suante Hau Za Cin ciin hong atsak uh hi, ka official documents teng ah India leh Zomite style in behmin a nunung hi khin hi).

Nu Luan Za Cing in Sukte Chronicles editor semlai cih pen kum hizah in zong nasem zo lai cih pen thupi sa ing. Ahi zongin Behmin tawh Newsletter, Magazine bawl cihte pawl Beh dangte kidaang koih pah ahih manin Zomite kigim neihna khat a piangsak kha tam cih hong ngaihsun sak hi (kei mimal ngaihsutna hi). Kum 1953........ ..

7. Behmin khek vai ah:
Behmin pen khek theih hi dingin ka um hi. Khek cih ciang numei pasal bang hi lo in, behmin thak pat theih hi dingin um ing. Tua hi kei leh Zomi khempeuh 'zangkhat suan, sulkhat kual' ci hi ve hang maw..... i beh zong ki bang leh kilawm hi. Ahi zongin ki lamdang ta hi. Zomi te pian zawh kum 3030 val deuh bek ding in kituat a, tua sungin beh hi zah piang ahih manin behthak pen kipan thei hih tuak hi.

Ahi zongin gamdang i tun man khawng bek in behmin khek cih pen thupi kei leh kilawm hi. Khek nuam i hih leh zong i behte kiangah theihsakna 'kihil' beek leng kilawm ding hi. (Kei thu bel hi kei).

E.g. Suantak, Suanman, Manghil, Khupmu leh Suante pen unau hi kici a, Suante pen a naupang pen, Suantak a upa pen hi kici hi. Amau unau pan a pa in amau suan ciat behthak suang dingin na hilh hi ding hi.

Sia Thawngno thugenna khat ah mi khat a omdan kilawm salo a behte in thu a hilh sawm leh, "Naulak beh pan ka tawp hi" ci hi ci hi. Behthak nei ding cihna hi maithei hi, beh pen numei pasal neih banga lut theih hilo a maw.

UK ah English kampau te in Behmin pen a nasep (ngabeng - Fisher, siksek - Smith, thalkap - Archer, etc), a tenna mun (mualtung - Hill, lo ah teng - Field, gamsunga ah teng - Woods, etc), a pianzia (mitom - short, brown, redneck), tenna khua (london ah tengte - London, Hamilton ah tengte -Hamilton, etc), a nu leh pa min la (Richard ta - Richardson, John ta -Johnson, etc) cih bangin na zang uh hi. Russia te in zong tua bang mah in tua tapa, tanu (Ivanov, Ivanova, etc) na ci uh hi.

Zomite in zong mun min i tapsak om sam hilo hiam?

Hau Za Cin
Phuitong Liim