Khuavot in phalbi lap lo:

Leitung pen a thei ten a gen uh ciang khang hatlua, kinawh lua, manlang luata hi ci uh hi. Letung kimvial ??? Km in gamla mahleh khuasung khat, khuata khat bangin kiukhata thupiang kiu khat pan kiza pahpah a, kithei pahpah hi ci uh hi. Na khempeuh lamdang a, manglang in, hun manlang lua delh in mihing te khawlman lo hi. Tai den, kinawh den hi.

Khua hun zong kinawh gawp hi inteh, tukum khuavot in phalbi hong lap lo a, phalbi bei zawh ciang khuavot hong tung pan hi. Ko omna ah bel lamdang kisa hi. Global climatic change ciin leitung khuahun kikhek gawp ahih man in hih bang thu a piang hi dingin ki ummawh hi. Pasian lama kha thupha ngah te in Topa Jesu hong pai baih ta ding hi ci uh a, leitung beina naita hi zong ci thei uh hi. A taktak ding pen Pa bek mah in thei a, a gen bel tam mahmah lel hih tuak. Pasian hong pai ding zong ikigin loh laitak hi dinga, ahi zongin kiging tawntung a om ding ahi hi.

Tu kum khuahun kikhekna hangin Japan leilu (Northern Japan) lam ah vukkhal (ice caps) te tuisuak in luang khia a, tuipi dimlet in khualum hangin plankton (tuipisunga kiakno) te hing zolo in si uh ahih manin ngasa ann ding omlo a, ngasa mat ding tawm hi kici hi (Fishing Industry crashed).

A tom in cileeng i tenna leitung kikheel mahmah cihna hi. Tua lungkham huai sain gam khangto te leh leitung gam kipawlna lianpen UNO in khuahun tawh kisai in kamkupna nei uh a, (UK ah), ahi zongin gam khangtosa (developed nations) te in Carbondioxide emmission khiam ding kiciam nuam nai tuanlo uh hi. Hih a Green House gas emmission uh a khiam tuan kei uh leh leitung pen a ni, a kha, a kum in lum deudeuh dinga, tuzawh kum 20 sungin leitung tuipi tawh kinai gam pawlkhat tuipi in tuumcip ta ding hi kici hi. Tuipi khangding cihna hi.

Tu laitaka leilu leh leitaw ah tui volume tampi vukkhal in om a, mualpi bangin kiciang hi. Tuate hong tui dinga (tukum zong tuita kici hi) i ihmut kal in i innnuai ah tui na cing dinga, nitak lam ciang i inn tui in tuum mang man ding hi kici hi. Tulaitak a ki nan pak kei leh mai kum 20 hun cianga thupiang ding a kigen khol tua hi.

Tuipi sung lum ding ahih manin tuisung a ngasa ann kiakno po te (phyto-plankton) si si ding uh a, ngasa tawm in, ganhing leh sing leh lopate kibukkim nawnlo ding hi kici hi.

Tua ahih manin leitung ah khuahun kikhelna a om ciangin mihingnuntakna bek hilo, ganhing, singkung lopa, na khempeuh adingin haksatna piangsak hi. Tukum zong haksatna a piang sak cihna hi. Ki koihkhia theilo ahih manin sihna tuak mah bangin i phul suak mai ngai a, a kipelh theilo hi mawk hi.

Mihing nuntakna nuamsa deuh deuh, leitung lah nuamlo deuh deuh. Hau deuhdeuh, nuntak gimhuai sa deuhdeuh. Lungnopna omlo deuhdeuh, lungkimna omlo deuhdeuh. Nu leh pa tawh omkhawm man nawnlo, tate, tute keem man nawnlo deuhdeuh, mihing lah angsung thei deuhdeuh, lah nuamsa deuhdeuh tuanlo.

I tenna leitung hi bang hi. Lah pai thei khang, lah nolh thei khang, i deih kimu lo, i duh kine ngamlo, i ut ki sem theilo. Sial in siksik leh neknek thuah cih bangin i lungkimna ding themkhat ciat i zon kawm tekin i nuntaksung a nuamsa bang takin zatzat mai ding hilo diam.

Hau Za Cin
Phuitong Liim