Zomi innluah vai

Kuppihna:

Thu kituh leh kei a dikzaw cih hilo a, eima ngaihsutna ciat kup theihna ahih manin i lungsima omte kum mengmeng leng tawldam pah hi.

Nu Haukhek hong thusunte hoih thei mahmah a, tuma in Zomite ngeina bang teng kep ding cih thu tawh tu-a Zomi inluah vai tawh, a khangto leh khang kikhel a phuto laitak Zomite, traditional culture pan professional culture ah i luttoh laitak, khuata khat ah i tenkhopna i ngeina te pan leitung bup ah kithehthanga i khualzin i teen taak dan nuntakna ah thu hong kilamdang, nun hong ki lamdangin ngeina leh zuihdan, zat dan zong hong kilamdang a hih manin a hunhun, a munmun tawh kizui a i ngeina zong i khektoh, i ki adapt, modified, or tuned a kisapna thu ahih manin thupi kasa hi. Hih thu te thucing mahmah leh University level khawng ah genkhop taak liang ngeina ahi hi.

Ama gen bang leh a nuai a Zogam Tangval kici in hong gen bangin numeite zong ngaihsutna thak khat i neih a, amau zong mun khat i piak behlap pen hong hun mahmahta hih tuak hi. Ahi zongin Laitui paudan a phazee sa a, a "hon ci pheiphei, hon ci pheiphei" ding ahih leh lah tua zong kidop a kulna ciang om ding hi.

Thuthum a gente lak pan a nunung te gel thupi sa diak ing, amasa zong ami ah ki nga ding a, ahi zongin a thum in thucing ka sa hi.

Thu 1-na: Nu le pa a enkik lo tapa:
Nu leh pa a enkik lo tapa te bek cihna ahih manin 'ami ah kinga' ka cih masakna tua hi. A enkik lo ding ciatciat pen numei hi in pasal hi leh a kibang kasa a, numei khempeuh in zong en kik ding cih om tuanlo ahih manin 'a en kik lo te' vive ahih manin numei pasal vai hilo in, ami ah kinga a ci zaw ka hi hi.

Inluah pen pasal mah a om leh pasal mah in a minsia tanglai henla, ahi zongin a nu leh pa a et kik teitei ding cih bang khat omleh. Ahizongin en kik teitei hen cih a om theih lohna ding thu tampi om in ka ngaihsun hi.

Pasal pen zi nei leh a tangval lai mi hoihpi zong a papi zawh ciang a mizia kilumlet gawp thei hiam ka ci hi. Ko khua Pa Hau Za Nang in 'u nau zong zi i neih ciat khit ciang behkhat bek kihi ta' ci hi. A tangvallai uh tawh kibang nawnlo hi ci hi. Tua bang omthei hih tuak hi.

Tua manin pasal in a nu leh pa kem nuam ta mah leh a zi in thukimpih kei in hi leh a piang thei hetlo ding hihtuak mawk hi. Tua bang hun ah a pasal i mawhsak thei diam? A zi a thuzawh mahmah zong a zi nuak den in, a nu leh pa a sih zawh, a man zawh uh ciang, a nuntaklai a kepnop loh uh pen a gamh teng luah nuam kik si leh a hoihpen hi khollo maithei hi. Tua a hih manin a mi ah kinga hi. A lehlam ah a tapa in a nu leh pa kemnuam kei ta leh azi in itsak mahmah leh kem ding hi kik si hi.

Nu leh pa pawlkhat in bel a tate amau nuntak lai mahmah in a neih bangbang uh hawmsaka, a tanu te, a tapa te pia kim ciat in, innluah dingte zong siit nei veve hi.

Pasal a om nak leh pasal mah in luah lai veve henla, a zeek dan, neih leh lam khendan, hawm dan khat om leh a hoih tam ciing. Mi innsung khempeuh ah kisai pih theilo ahih manin a mi ah ki nga sa ing ei.

Thu 2-na: Tanu bek a nei inkuan:
Thupi leh kisam kasak penpen hi a, Thu 1-na ah koih zawk dingin hoih kasa hi. Tanu bek nei hilo in, tapa zong nei veve henla, inluah thei dingin mi ngeina bang hi kei zenzen leh amin in cilkhai ahih tei hang numei sangin zat theih loh zaw lai thei hi. A sia pen in ngaihsun leng Thu 3-na tawh hong kizawi tawn kik a, ta nei hetlo in om kha leh cih tawh hong kizom kik leuleu hi. A dang khat zom lai leng, zi neilo zong a nei thei khollo dingte leh, pasal neilo numeite zong bangci koih ding cih hong hi toto lai hi. Ahi zongin i thulu bek gen phot ni.

Hih pen ka lai at pawlkhat ah zong ka atsa hi a, 'A material Girl' cih ah zong themkhat ka hel hi. Unau pasal a om hetkei leh numei in zong a nu a pa neihsa luah thei hi ka ci nuam hi. Hong thukim lo zong om mai thei hi. A nu a pa neihsa a sum leh pai pen luah thei a, ahi zongin thu lian leh thu picing vaihawm ding ciangin numei bek hong hi khin theilo ahih manin a sanggam pasal te in a vaanpih bel kisam ding hi. A thu a la vaanpih te zong a gim a tawlna themkhat (amau a kisiamtan leh) a lemlawh uh zong kilawm veve a (but if he insist) akilawm khat bel sehkhiat sak kilawm veve hi.

Ka gennop takpen numei innluah lo ding ahih manin a nu lehpa neihsa khempeuh a sanggam dangtein a vun hawksak mawkpen kilawm khin lo, amau nuntakna ding ciang pen a khen ding, a piak ding uh leh a nu leh pa mahmah in zong a nuntak lai un a gen ding hi in ka ngaihsun hi.

Shillong (mah ci zel niin) Khasi te pen numei inluahza ngah hi uh a, (leitung ah amau leh Canada gama nam niam khat bek in tua dan zui hi) amau genna ah nidangin Khasi pasal te galdo in galphual aha sih ciang a inn alo a kem ding leh a tate a kem ding om nawnlo zel ahih manin khang kisam a, inmong hi ci uh hi. Tua pelhna dingin inmong lohna dingin numei inluahza na pia uh hi. Ahi zongin a loopholes (pengtheihna, a phih) na om zel veve a, sanggam numei om kei leh cih khat om zelveve hi.

Tua manin a ngaihsun siamte insung pen hih i gen ma pek pan mi a hoih hoih a kilawmlawm in na gamta khin ding uh a, i gente amau adingin nuihzak huai lel zong hi thei hi. Siam kituh cih nuntakna inkuan ah mi na khangkhia ahih manin hi te ah kinawngkaisak lo ding uh hi.

Tua banga a ngaihsun thei nailo te theihsakna leh a zui nuam lo (angsung theilua a, amah a kikhualte zong) te i gakna in thukhun khat om leh bel a kilawm ding hi mah hi. Tanu te nuntakna ding ciang bek a ngaihsut sak ding cih bang khat maw, ahih kei leh neih leh lam a kikim in a inlak sanggam pasal tawh a kihawm ding cih dan khat in (vunhawk dikdek hi lianglo in).

Thu 3-na: Ta neilo te mailam:
Tu lai ciangin numeite ki phatkhial in, leitung bup in zong ta khat bek neih ding anu adingin cidam huai hi. Ta nih leh thum ciang bek neih ding hi cih danin hong tangko uh a, i Amen dam dam mawk hi. Ta khat bek a nei tulai numei sangin tanu tapa sawm val a nei i pi leh pute sawt na nungta zaw uh a, na cidam zaw uh in, na sep mah asem zo veve uh hi. Thadah na ding leh hauhna ding bek a ki pattah leitung hong hita hiam cih nop huai hi.

Tuate thu tuam hi in, i thupi ah lut pah leng.

Tomcik a gen in meigong pen ama deihna gensak leng hoihsa pen ing.

Amah a hehpih huai hi ta a, a kamsia ahih khit loh hangin leitung paidan sihna, leitung ngeina a phut khak mah ahih manin ama lungkimna pen ding leh ama deihna pen dan teelsak pak leng (lungkim khit ding bel a om theilo leitung ah, meigong in gong ta kei leh mi khempeuh). Hanmual pana a nungsang a kizuatpih pah cih ngeungau bel a leitung dan a sihna tuak a hih teei hangin hong mulkim huai zaw deuh mah e.

Khangluiten bang ngaihsutna na nei uh ahi tam maw? Numei pen a pasal a bek hi a, a pasal inkuanpihte a hilo a ci nuam uh hi ding hi. A tua bang ci ahih leh bang hanga a mo uh a ginat leh ginat loh khanwg a inkuan, a beh taang khawnga ciltui kaai lianga gen ihi tam? A pasal a bek hi ci a a pasal sih ciang a nungsang ah i khaak kik leh a pasal deihna hi a, hoih in hoih kei taleh a inkuan khawzang vua a thanuam, a thadah, a uisan leh kampal na tawm i gen theih khat zong omlo hi. Mo pen ei inkuan thuthu a om dingin, a hi zongin a pasal a sih ciangin amah ei a hi nawnlo, a inn ah i khaak kik ding hi cih ngaihsutnna om cihna hi. Very contradicting idea hi.

A pasal a ahih leh a pasal in a nuntak lai, a kiteen tungvua a kigen kholhsa uh, sihna manna om leh na na tuacih ding ci a aki kam vaikhakna bangin a numei a omding thupi leh kilawm.

Ahi zongin thu 1-na tawh kibang pian a, a mi ah kinga ding hi. Meigongin a manawh lam ah omsuak ding kihta zaw in a nungsang ut zaw thei, a nungsang kihta zaw in a manawh ah taamsuak utzaw thei, ama deih teelna bang bang phalsak leng a hoih pen tam. Tua ahih kei leh lah, manawh lam lah taam tuanlo, nungsang lah ciah kik tuanlo in a tuam in amah kikem leh (a kikep theih a, a utzawh leh).

Thukhupna:
I khantohna tawh kituak in i ngeina, i paidan, i san dan zong khek pawl, bawlphat pawl i neih kisam ta hi cih hong theisak hi. Mizogam pen a lungdam huaina khat ah, tuabang tte ah mi lungsim lian mahmah hi (mi lungsim tangzai or flexible, adaptable). Thu pen a hamsa lo theithei dingin kiheek ngeungeu thei hi. Tua cih manin ngeina khempeuh a paisan hi tuanlo hi. Thu thak leh thu hamsa a om leh a hunhun in kikheek thei cihna hi. En zong tua dan khutliik a thukimna a om loh hang a huam kima hoih theithei ding i ngaihsut siam hong kisamta leh kilawm hi.

Genkhial a om leh kimaisak ni.

Hau Za Cin
Phuitong Liim