Sai in Canon ci:

Saipi a thupina ki dong hi leh 'ka non' or canon or Canon ci ding hi. Japan te lungdam ngial lo diam!! Ahi zongin sai pen a lianpi hi in Japan te in bel a neu theithei na deihse uh hi. They specialise in small things kici hi. American likes big, Japanese like small cih khat om hi veh aw... Hollywood film en le hang, a puak kham zuaizuai, a ging dumdum, a hi fufu khawng thupi sa uh hi. Japanese te in a kilawm citcet, a mam sitset, a nal dildel, a te keuhkeuh cih khawng, a siang kelkel cih khawng deihse uh hi. Sai non pen kikhai ngengngong mai ahih cianga a nak sau peuhmah hi. Canon pen a camera uh a lens hoih ahih manin kideih diak se hi. Casio pen electronics hoih ahih manin calculator leh nai (watch) ding in leh electronics machine dingin ki deih deuh se hi. Tua mah bangin Computer hardwares dingin AMD sangin Intel aki teel masak lamdang lo hi. Camera ah a lens pawimawh a, machine ah a elctronics pawimawh a, computer ah a hardwares pawimawh hi ven. Tua mah bangin amau hoihna lam ciat na nei uh hi.

Semiconductor Industry ah Samsung world number one ahih lai tak in, vanleng bawlna ah Boeing na minthang a, Mobile phone ah Nokia na minthang kik hi. Amau hoihna tek nei uh hi.

Mihing zong i hoihna a tuamtek hi ciin mihing tangthu sin mite in gen hi. Tua manin tulai leitungah i siamna lam ciat sem in, i siam loh lamte kilei a, i siamna min hong lei uh hi, ki lei kawn tek cihna hi. Leitung nuntak zong zuihna lam ciat kinei ta a, nasem khawm ding, inkuan khat suak ding, pawlpi khat suak ding khempeuh in zong amau kibatpih lam mah na zong ciat ta hi. Pasian nasemte in a nungthuap thei ding a cih zel uh pen specialised kisapna leitung hi cih hong telsak na hi. Gam pawlkhat ah nasem pawlkhat pen a inn ah ciah ngei lo ahih manin a inkuanpihte tawh kimu ngei lo in, a tate bangcia pha cih zong theilo uh hi kici hi. Pawlkhat leuleu pen nasepna ah sum Pound tul tampi sangin ahi zongin a zatna ding hun awng neilo hi kici hi. Siamna dingin a sum a tam teei hangin nuntak thaman kei tuak sa mawk ing. Synchroton Radiation study ahih uh ciang leinuai ah kalnih, kal thum sun tawh zan tawh omsuak uh hi, a nasep uh kinusia theilo ahih manin. International Space Station ah Indian- American numei Williams pen kha sagih sung om ding hi. A siamna lam ahih manin.

Leitung nuntak lah tom, nuntak nopna dinga nasep hun lah tam, nuntak taktak hun bangtan ciat i nei tam maw. Mihing leh mihing kikhawlh, gualnop, holim hun, pawi i cih hun pen mihing khat nuntak sungin bangzah - kum tua zah sungah kum tua zah ciin tuat leng - a pha tam maw, civilized world, globalized or advanced world ah..... zi nei manlo, pasal nei manlo khawngin nasem a buai den khawng zong om theih mawkmawk ding hi..... nawh pai lua muktu, nasep haulua nui man lo.. he he.......... .

Hau Za Cin
Phuitong Liim