Thursday, March 8, 2007

The Lord of the Rings...:

Times Magazine in, "Leitung ah mihing nam nih om, The Lord of the Rings laibu sim khin leh a sim lai ding te" ci hi. Bang cihna hiam?

Mihing ngaihsutna lungsim in a ngaihsut theih tawp, mihing khuak in a ngaihsut theih tawp, leitung ah a om ngeilo hiam a om ngei hiam khat peuhpeuh, akimu thei nawnlo, a kiciamteh hilo, lungsim bek a ngaihsutna ah a om thu, mihing khuak in a ngaihsut tawm theih thupi pen, the greatest fantasy of a human mind hi dinga a kingaihsun pen "The Lord of the Rings", JRR Tolkien in kum 1937 pan 1949 kikal a a gelh toh toh laibu ahi hi. A simkha te leh a simkha lo te ngaihsutna kibanglo hi kici hi.

A laibu bek hilo, limpiahna (movie) ah zong kum 2001, 2002 to pawlin Director Peter Jackson in Hollywood Film studio, USA pan hong suaksak hi. A thu, a cinema or movie te a vek in en man kei ni. A thupi mahmah pen mihingin lungsim ah i ngaihsut tawm khat pen thupi mahmah a, tua ngaihsutna pen laimal in kui in, laibu in kem in, a lim ciing leeng a piang thute sangin thupi zaw thamtham hi. A tua bangin zong hong piang thei hi leh a thupi ding hi mawk hi. Lungsim ngaihsutna pen maimai hilo hi cih hong lak hi.

Video Games ah i mu a, Cartoon ah i mu a, Cinema ah i mu a mikhat leh nih ngaihsutna kigawm a kilak tawm hi. Tom and Jerry ah Zusa leh Zawhngeu kidelh thu pen Life in London cih lai at siam Pierce Egan in 1849 ma in a gelh ahi hi. Popeye the Sailor pen Elzie C Segar in 1929 in a bawl ahi hi. Guai mite in Zomite khuavak muh ma in leitung na cil dimdem phial uh hi. A ngaihsutna uh, mihing khat lungsim pen a ki enen,a kisimsim hi mawk hi.

A taktak hilo, a ngaihsut tawm thu uh, a lungsim vua a ngaihsut pen a mitkha in bawltawm in, a taka mite etsak nopna in tua pen a lim in muhtheih dingin cinema ah hong bawlkhia in, pawlkhat in laibu in at in, pawlkhat in mite kiangah a thu in gen uh hi. "Huih tha bek tawh nasem" a kici phial zongin a thuneu hetlo ahi hi.

Lungsim ah i ngaihsut tawm tampi a thu in luikhia in, mite muh theih dingin a lim in lak thei in, a kisim thei dingin laibu ah at hi leng Zomite ngaihsutna zong a thuneu hi tuan lo hi. Zogam hong paal hun ciang Helicopter tawh Zawngtah lo ding cih khawng, Dahpa Khuang i cihte khawng, Penglam, Mauzuang te unau, etc...... hihte pen mi khat ngaihsutna kilawm tak in a gen khiat theih hi ding in ka um hi.

Tua manin na lungsim mitkha ah thu lamdang pipi na ngaihsut leh zong tua banga ngaihsutna, a omlo lungsim mitkha a bawltawmna (fantasy) pen micing miciim te thu suut dan hi cih phawk den ni. Gearge Lucas ngaihsut tawm cinema hangin USA leh USSR Cold War pen bei a leitung galmuang kik hi. Lungsim mitkha thupi a ngaihsun zote mi zahtak huai hi.

The Lord of the Ring lai atpa Tolkien pen kammal bangza zat ding i hiam cih a ngaihsun mahmah, a kin mahmah khat hi (philologist = love of words). Kammal thak leh kammal luite bangci zat leng kilawm ding hiam ciin ngaihsun hi. Oxford University ah kammal zat dan ding sinsak hi. University Professor ahih na sangin kammal zat danding lunglut zaw, kinzaw hi kici hi. Tua dingin a lawmte tawh kam kum zel in, English te lai at siam minthang CS Lewis tawh zong na kikhawl zel, kam kikum zel uh hi.

Kammal khat (a lui a thak phamawh kei) zatsiam ding, a kilawmna mun ah zat ding thupi hi cih hong lak a, lungsim mitkha in a bawltawm leitung (fantasy world or immaginative world) pen a thu in atkhia leng mihing khuak thupi dan kilang hi cih hong lak hi. Zomi te zong lu dim mah khuak nei hi hanga, sim theih dingin lai tawh i at nailoh man bek hi, i ngaihsutna neu tuanlo hi.

Hau Za Cin
Phuitong Liim

No comments:


Blog Archive