Topa Hoih Hi, Topa Lian Hi

Topa hoih hi, Topa lian hi,
Lungkham hun in hong hu a....
Ama kiangah a bel mite,
Ama'n limtak hong kem hi.

Hong phat ning maw, Topa hong phat ning,
Na vangliatna lamdang si
Thuk in zai veh,
Lamdang nong itna
Ka belh suangpi To Zeisu.

Lungsim tamkham, Lam et beite
Meigong tagah gentheite
Leivui panin hong lamto a
Zeisu hong itna bek hi.

Kha Siangtho mit hong vaksak a
Itna khut tawh hong len a,
"Kei nong sap leh kong dawng ding a,
Ka thusim kong hilh ding hi"

Nu ei, guai, lah ka gelhsuak thei lai tazen a!!

Hih la pen hoih kasak mahmah ahi hi. Delhi pan Upa Chinsuum in lai hong khak simin hihla hong hel thei zel ahih manin amah milungdam thei mi, Topa tungah lungdam a ko ngiitngeet mi (thankful heart) ahi cih ka ciamtehna la hi (E-mail pen 'laikhak' mah ka ci suak mai hi. A laidal taktak kikhak ahih nawnloh hangin a tua min omsa ahih manin laikhak cihsuak mah a Zolai ah kilawm a, english in bel 'email' mah cih suak ding hi). La phuakpa Sia JK Kam tawh a kimuh a kimuh thu uh a gen cim theilo, "Deih tel thei hileng" kheset bawla lasa siam Shillong Nu Ciinno zong hih la ka zak sim in ka phawk a, a TV nuai a CD a cianna ah zong hih la omna CD a tungnung sak khawng ka mitkha ah hong lang thei zel hi.

Kum 2005 October vai puja sangkhak sunga Mussoorie ah Evangelistic Camping nei dinga ka pai laiun Dehradun lamzuatna meileng sungah ka siapa in, "Now, can we request Chin and party to sing the Zomi songs" hong cih khiat ciangin a kal masa mahmah a Christian a suakthak, baptism a tang tung ka naseppih Kerela pan hong pai nungak nih Miss Maya leh Miss Bincy tawh, Kanpur te mahmah nungak Miss Avani te tawh India meileng ging luapluap sungah "Topa hoih hi, Topa lian hi, Lungkham hun in hong hu a..." ka cih buaibuai sam mah uh leh a kilawm diam thei kei ung, ko bel meileng ging luapluap zakei tuam ung. Tuni tanin hih nungak MSc zo thak liklek te in lai hong khak uh ciang hong kimaingapsakna in "Topa hoih hi, Topa lian hi" mah hong ci tangtang uh hi.

A la thu laidal tungah ka atsak a, a tua bek hun sa nailo a computer tawh ka peikhiat sak lai ciang amau zong a omna Hostel vuah na sasa uh hi ding hi ven, laboratory ah hun awng neih ciangin 'hong sakpih ta in' hong ci thei zel uh hi. A awmal a lawh siam lian loh uh hangin a thu kitheithei ahih manin Kerela nungak 2 leh UP nungak khat in zong hih la amau bekin sa thei hi ciin ka ciamteh hi. Amau omna ciat ah zong a Christian Thu upna uh a kip a kho ding ka thungetna hi.

Kanpur ka tun tungin kei adingin Christian suak tung, Pasian thu a za tung cih khawng thuthak hi a, Mizogam ah tuabang akiza nawnlo ahih manin a lamdang ka sak khat hi. Ahi zongin a taka va mu kha ka hih manin Sawltak Paul te hunlai khawng ding ka mitkha in ka bawltawm pongpong hi. Taiwan ka tun ciang zong tua bang mah na hi kik a, "Kal masa a Christian suak ka hi" cih khawng ka maitang ah hong gen uh ciang ka nakngek khawng hong nuamlo pian thei hi.

Topa hoihna a thei panpan ding, "Topa hoih hi, Topa lian hi" amau zong a cih theih hun uh hong tung pelmawh in ka um hi.

Hih la phuakpa in Topa na mu cian mahmah a, zong na sin takpi hi cih ala thu pan in kithei hi. Ama tuak taktak mah ahih ding ka um a (a la hong pian dana kicingin ka zak nai loh hangin) tua hang mah in vangnei in, mite in deih uh a, mite lungsim zo hi dingin ka um hi. A la siam man bek hi leh kuaman hizah in a thupi bawl tuan ding ka lamen kei a, hih sanga la thu hoih zaw a hi zongin vangneilo om hi. Hih la in thupha sangin, nungta a, hing hi. Lamdang ka sa mahmah hi. Sasa ta leng kicimtak lo, za za ta leng i bil kham lo, a lamdang kasa hi. Kha Siangtho ompih la tampi lak ah khat hi dingin ka um hi.

Ama kiangah a bel mite, Ama'n limtak hong kem hi.... ci hi. Belh ding dang a om nawn hetloh ciang, deihsakna kammal zong samsiatna zah a kimuh phial ciangin lamet ding om nawnlo a, kilungkham hi. Tua hun ciang laphuakpa in Pasian na bel hi cih hong musak hi. Pawlkhat in sum bel a, pawlkhat in zuhai peuh bel kha ding hi. Ahi zongin Topa a bel cinten a tate khat om hi cih hihla pan kilang hi.

Meigong, tagah, genthei, ...... hih bang a tuak kha lo tampi om ding a, a tuakkha zong om ding hi. A tuakkha lo te in a haksat dan theilo dinga, a tuakkhate in a haksatdan kitheihmawh bawl nuam ding hi. Tua manin Sia Thawthawn in "Tagah khuasuak kuamah in dem zolo" ciin hong hilh zo hi. Meigongte, tagahte, gentheite pen leitung ah mihing in a tuak theih haksatna lianpenpen te ahi hi. Kumpi te, vaihawmte, mihaute, mipil, misiamte leh thutheite in na aangvan ciat uh hi. A haksatna uh huh in tuabang gimna pan honkhia nuam uh hi. UNO na tawm in hihthute na thupi bawl hi. Ahizongin laphuakpa in, hihte khempeuh lak pan Topa in a lapsang, a kaihkhiat, a domsang khempeuh adingin teci na pang hi. Na gensak hi, na ciapsak hi. Na muhpih hi.

Mihing nuntakna a nuam penpen kha thu ah lungdamna ahi hi. Leitung thu ah lungdamna sangin kha thu ah lungdamna pen kim zaw a, a hau a zawng in a neih khempeuh piakhia ngam hi. Tua zahta in Kha Siangtho hong om ciang lungdamna kingah thei hi. Laphuakpa in tua bangin mitvaksakna, Topa piak lungnopna mitvakna ngah hi ciin kiciamteh thei hi. Tua a mitvak bek hilo in Topa sam leng Ama thusim na tawm hong hilh ding hi ci a Pasian in Jeremiah kiangah a gen bangin ei zong tuni in Topa in "Kei nong sap uh leh ka thusimte natawm kong hilh ding, kong theisak ding hi" ci hi. Mihing mit in a muh ngei nailoh, mihing bil in a zak khak ngei nailoh, kuama ta in a khut tawh a lawnkhak ngei nailoh...... . vanglian Pasian thusim kithei ding hi tazen hi.

Thupi in manpha hi. Tua ahih manin, thukin zai a, itna lamdang hi. A hoih mahmah tawh a khupna pen "Ka belh suangpi To Zeisu" ci hi.

Tuni in kua i bel hiam, mihau milian khat i bel kha hiam, sum leh letna te bel in i khamuan pih kha hiam, la phuakpa in bel.... a muan Zeisu na bel hi.
Hau Za Cin
Phuitong Liim