"Sianglo":

Khangluite in "Sianglo" a cih uh ciangin hih loh ding, sep loh ding, khoih loh ding, zuih loh ding, pelh ding cihna hi. I hih teitei leh damlo thei, cina thei, natna haksatna leh sihna ciang dong hong tung thei ci uh hi. Tu lai ciang Christian hi hang cih manin i phu teitei diam, i kidop mah ahoih lai diam. "Sianglo" pen sianglo mah hilai veve leh kilawm hi. A theilo pen ding ka hih hangin a theite hong behlap tohtoh dingin ka theih bangbang hong gen sawm ning.

1. Inn peh sianglo: Inn pen khatvei a kigeel zawh, a kilam zawh ciang zauh kik, behlap kik pen khangluite in "Sianglo" na ci uh hi. A behlap a zauh kik ciang tua inn ah mi kita nawnlo, mi dim kisa cihna hi a, tua banga kita lo pen inteekpa hiam, inteeknu hiam kivui teitei kici hi. Champhai ah tan 10 ka sim lai, 1990 kum in ko vengte khat in ka laukei, Christian kahi ta a, lusei pau in 'puithuna atthlak' (khanglui ngeina hai vai) ciin a peh leh tua kum bei manlo in amah kivui hi. A in peh pen zoman ciamciam hi.

2. Tungtun tunga innlam: Tungtun pen Leikhamangpa omna hi a, a kem dang khat om hi kici hi. Tua ahih manin tungtun to khia a, tungtun tui kibuak ding, guahtui hiam, daitui hiam, a momsak ding a dalte pen insung nu hiam pa hiam laang in zui hi kici hi. Tua manin kuamah in tungtun tung ah inn lam nuam lo uh hi.

3. Ki sa seng leh: Inkuan nih mo in a kilaktuah leh ki sa sengleh kici a, kideih lo hi. Ka sanggam numeite lutna innkuan pan zi ka lak pen ki sa seng leh hi a, kideih lo hi.

4. Pute huankhang a inn lam: Sungte huan khanga inn neih pen 'huihsia kithuak zolo' kici a, sianglo in kingaihsun a, sung leh makte inn kizom in teng ngeilo hi.

5. Kam sia - 'tam si u cia': Mi in ah hawh ciang 'tam si u cia' cih pen kam sia in kingaihsun a, kideih lo hi. 'Tam na sak leh nang si pah ve' khawng ciin ki leh ngam a, tua lehna pen kamsia in ki ngaihsun nawnlo hi.

6. Gamsungah ihmu: Gamsung pai a thu omlo a ihmut suak, ihmu, khanlawh ciang inn ciah pan cih pen sianglo in kingaihsun a, sisan tawh thoih teitei ding hi kici hi. Tua ahih kei leh gamsungah lawm nei thei a, tua a lawmte in nikhat ni ciang hong sam kik dinga, a zui kha dingin kituat hi. Tua siangsuahna dingin sisan luan kisam hi. Khatvei ka ute khat a vasa vai pen luidung khat a tun ciang a ihmut suaklua in paizo nawnlo in ihmu hi ci hi. Hong ciah ciang a gen leh a pa in, aw, na nu in i aklui na man pah hen aw, ci-a akgo in a kha hual uh hi. Ka theih pak teng hong at hi ing. (zop lai ding)

Kei theih dan le Sia Thawthawn paunak hong pulakna ah "Pute tawh teng aksa kham thei" kici a, tu te tawh teen pen saseng kileh hi lo in thei ing. Ni nungzui a kideih dan mah in, pute tawh ten ding pen na kihanthawn zaw uh hilo hiam ciing. Khan kikim, gual khat sungah zi ding aki lahtuah te bek saseng kileh hiin thei veng aw...

Aban zom ni:

7. Minlian lua pua zo lo: Mi khat in min a phuah ciang ama hihna sanga lianzaw, a vallua a phuak leh tua naungekin pua zolo thei hi kici hi.

8. Pau phalua sianglo: Sia Thawthawn paunak hong pulakna ah "Tu nailo khe khuang, man nailo tulsui" cih i sim ding ka lamen hi. Tua dan pen 'sianglo' in a kingaihsun hi. Sa man nailo a saphehna ding siktul sui pah cih pen sa man nawnlo hi kici hi. Sa in thei ahi tam, a keemte in thei ahi zaw tam, Sian in awilo ahi zaw tam. "Never count your chicks before they hatch" ciin mikangte in zong na nei uh hi.

Ka seppih post-doc fellow mah khat, Sente hi, zi nei, a zi gai, US pan post-doc khat zosa in hong ciah uh hi. "Tu zawh sawtlo in ka zi in nau nei dinga, tua ciang papa hita ding ka hi" ci keei, gengen mai hi. Kha khat a om zaawh uh ciang a zi hong ngaplo in, a nau a kha cinglo a ki la khia, a kikepkep hangin misuaklo in, dam zolo hi. Pau pha lua pen khangluite in a deih loh khat uh 'sianglo' a cih lakah kihel hi a, Zomi sung beklo, mikang, misan lakah zong na tung veve hiam cih theih hi.

Sia Lian Za Tuang hong genna 2na- Kisengleh ah: ....kigam lat khak ding
launa tawh kisengleh cih kammal a nei i hi..... cih pen a gennop tel lian
kei ing.

A ban zom to lai ni:

9. Cik lak lo a neihna: Cik lak pen dawi te tenna dingin ki ummawh ahi tam
kuamah in niinsak nuam lo in, a kiim a kianga sing leh gua zong phuk nuam lo in, lo in zong na nei nuamlo uh hi. Na paisan teitei uh hi. Ko khua ah papi sakhi pang thei zel khat, sa man thei mahmah khat hi, cik deek ah sakhi a pan leh nitak khuazin tung pan kipan a kim a kianga singteng hong ling in, meipi kai in, huihpi mut bangin nawk gawp a, a ciklak pan naupang kiho in, "ka pa nang tuah bang hih na hia?" ciin hopih in, a hopih
khit ciang a gal mual ah ciahto danin paisan uh ci hi. Tua tak ciang amah
zong a sa panna singkung pan kum in inn a ciah leh koi mah ah guahzu lo,
kuaman huihnung lamtheilo, khua a na siangmahmah, a tate kuamah lah gamsung na pailo. Tuapa in a thau zuak pah in, tuni tanin khatvei zong gamsung pai nuam nawnlo hi.

10. Mai zam na delh kei un: Logi ah mai a kituh ciangin lovengte lo sung ah
zong a zam kha pawl na om thei hi. Tua pen khangluite in 'na delh kei un, ei mai gahlo in, ann kihaulo thei hi' na ci uh hi. Khialhna a om leh genkhawm zel ni.

Hau Za Cin
Phuitong Liim