Lungzuan zatam sial khawm ni

Christmas lah nai, masi khuang lah ginging ta, lawm ten innlam zuan diaidiai, a honhon in kiniil niil, kei lah khattang hei ding aw....

Ngaih aw hong leng inla,
Ka nen ah hong khawl aw,
Tang kei zuan nuamtuam dingin
Na meel hong mu nuam veng...

ci a sap pak ding lah om kei ven... huiha... innlam ah masi lenkhop a nop theihtheih tawh maw, masi ankuang lui khawng a nop theitheih tawh maw... lusu kawmkawm a masi sermon i ngaih diai diai khawng i mang tawh helh suk neunau a.... masi zanhak dinga nute puanza sahsah teel a masi tunna inn ah meikiang teng i kual ciltel khawng ahun nuam hi mawk ei.... cik ciang aki mu kik tam maw?? Hih bang hun nuam miss den mawk zong leitung ah damman om hiam.... damsungin bangzah gualnopna i tuak a, nopsakna bangzah i tuak a....

Christmas ma ni a buhman tangho dinga i suk damdam a, a tunna ding nahla a iki pei vetvet hun khawng, singtang nuntak a nuam hi mawk ei... khuapi ah lu leh taw tello a luvai lianga music luheek dekdek lianga dianpih pong mawk sangin nuam tiuteu veve sam hi.

Christmas cih thei a, piteek puteek te lungleng a, biakin ah khut lamto a hong lam diaidiai khawng uh maw, a vanglai uh ngai in luankhi nul sam ding uh hi... a kumkum in lah zaitha patbang nem zel a... i hun hoih neih bangbang amtak a zat ding hi cih hong telsak mahmah hi.

Nupi te masi anhuan leh papite masi sa huan... a khu in biakkinn lam hong nawk kha, huih nun dan zong kikhop tawp mengmeng leh maw cih ding a hong gilkialsak hi.... masi phawkna a balloon naupangte in hong mutpuak ziahziah khawng uh maw...

(Gennop tampi tawh hunsak phot ni..)

Christmas a ciah theilo, a lungleng thei, eima bu ciat pan a zang ding teng aw... lungzuan zatam sial khawm ni.
---------------

Ko kiangah Phuitong pen vasa ten a pakzu bawm zaizai in TV ah hong suaksak den ta uh hiven. Tg. Zam Dal in la na phuak a (midangin zong a phuak om inteh, thei sam kei ing):

Phuitong pakte lah hul saan laitak hi pan a
Vangngaih sinthu sinlai pan phul den lai e
Itna pakbang palh silsial lumsung in maw
Phuitong liim ah dawn bang i tuah kik zo diam?

Sinlai hong phawng khangzamluang sai ka zak ciang
Maimit laukha maciang suan ing ngaih aw
Zo zaila leh lengkhuang tum ging ka zak ciang
Pianna Zogam lei ah sulhei nuam lua ing e

Phuitong pak ten zong tongciam phuh bang kho sak e;
Eizong nih gel tongciam kho sak ve ni ngaih
Sen ngaihno aw singdang tongdam na sang ke'n
Phuitong liim ah nihgel dawnbang tuahkik dong

Sinlai kho sak aw dawnbang tuah melmu kik ding
Hun leh nite lenkum kivei sawt zong maw
Sen ngaihno aw sinlai na lehluan ken maw
Phuitong liim ah nihgel dawnbang tuahkik ni

Hon leengto diaidiai thong leng!

Tuni "Cimphawng Laitui Paudan" laibu kua hiam khat in hongkhak pen ngah ka hih manin ka simsuk buatbuat leh nambat 89. Nupa kitawng kilemkik dan...Kham Za Ngulte nupa cih sim kha masa thong... tua mana Hon leengto diaidiai thong leng.... Innuai vok tuktehte mah hong bang thong leng...

Bawng sungkuah tawh Christmas Lungdambawl Pawi:
Hih thu ka zak ciang ka lungsim ah lawmte khat in anne in hong sam a, sa hong mehpih loh ka lungsim ah hong suak hi (hih thu a kicing zaw in Kumthak ciang at pan dingin ka siitlai hi). Sa sungkuah pen tam nek loh dingin a hoih tam cih ka ngaihsun mawkmawk hi. A sa mahmah zong cidamna dingin tam neek lua lo in, sa zong a siangtho a limci bek mah ne thei leng cih ka ngaihsun mawk hi. Khualam ah pen sa pen siangtho hi, ahi zongin khuapi ah sa pen inn ah i khawi ak leh vok leh gan dangte tawh kibanglo hi cih ka theihna khat om hi. Tua manin sa pen a siangtho, a sa tak bek mah neek dingin hoih kasa hi (kei personal ngaihsutna hi - Shillong ah vok gil ka nek uh ciang hoihtak in kipuah khollo thei ahih manin kamlim lohna lam hong piang thei hi).

Genkhial a om leh hong maisak unla,

Christmas cibai!!

Hau Za Cin
Phuitong Liim