Breaking News - Laibu thak suak ding!

Zomi sanggamte aw,

Hih lai-ah thuthak hong pulak nuam ing. Tu sung teng Dr. Hau Za Cin in Zonet ah lai hong gelh nawn kei si e i cih leh amah laibu bawlin a manlah mahmah a na hi a, a lungdam huai hizaw hi. Feb. 20, 2007 cianga hawmkhiat theih dingin India pan "KA LAIKUNG PANIN" kici Zokam tawh kikhensak ding hi.

"Cinpu" ci-in zong a kino phuah Taang Hau Za Cin pen Suante beh Pu Pum Do Lian leh Nu Ciin Zam Cing (Samte beh) tapa nihna hi. Sanggam pasal nih leh numei khat nei hi. A u pa in amau khua Murlen ah sangsia semin a naupa Indian Air Force a sep laitak hi. Mizogam ah Tan 10 a zawh ciangin Shillong ah College kahin North Eastern Hill University panin Chemistry tawh BSc (1996), MSc (1998) leh Ph.D. (2004) zo hi. Tua khit ciangin India gam Institute hoih pen "Indian Institute of Technology," Kanpur (www.iitk.ac. in) -ah kum 1 leh kha 6 sung sem leuleu a, tua panin tu laitak a sepna "Insitute of Atomic and Molecular Sciences, Academia Sinica, Taipei" leh "National Taiwan University, Physical Chemistry Department" ah May 2006 panin sem hi. Taiwan ah a sepna zong amau gamah sang hoihpen hi kik hi.

Shillongah a laisim kawmin Zomite kikhopna Union Christian Fellowship ah Youth Wing Chairman, Secretary, Finance Secretary, Sunday School Superintendant leh SS sia khawng sem kha ngei hi. Zomi Baptist Church a pian ciangin Baptist Youth Fellowship ah President masa pen sem a, Upa lakah Finance Secretary zong sem ngei hi. Sangnaupang kipawlna "All Zomi Students Association" (ALZOSA) ah General Secretary sem kha in "Tyrannas Hall" kici Baptist Hostel ah a om lai-in zong makai (Prefect) zong sem hi.

Laigelh uk mi hi. Scientific paper 20 val "International Journals" ah published a, Conference tuamtuamah Paper pia ngei in, India President Dr. Abdul Kalam in NEHU, Shillong a hawhlai National Academy of Sciences, India (NASI) Annual meeting ah zong Oral Paper Presentation neite lakah kihel hi.

Shillong pan kihawmkhia PHUITONG MAGAZINE ah Editor sem in, Magazine tuamtuamah ah English, Lusei leh Zo kam tawh lai tampi a gelh zo hi.

Tu-a a laibu bawl pen laimai 400 kiim hi dinga, hong tung ding Feb.20 (Zomi Nam Ni) cianga hawm khiat theih dingin kikhen ding hi. Amah zong tua hun zang kawmin inn lamah ciah pak ding hi. Laibu man ding leh a kingahna ding kithei nai lo a, a saite in hong zasak lai dingin ka um hi.

Tuhun khangthak sungah hih banga tangval lai a laibu picing gelh thei ding khangno sungah tam nei lo i hih manin hih laibu pen thupi diak, tuam diak a, simtak mahmah dingin ka um hi. Hong kihawm khiat hun ding ngaklahin ka gal-et ciang hih thu a za-a a lunglut khempeuhte zong kilawp ciat dingin ka um hi. Topa makaihna tawh ama ngaihsutna banga hong pian theihna dingin Pasian mai ah phawk kawmin na gal-et ciat leng ci-in hong ko, hong pulak nuam ing.

G.K. Nang