Inn ciahna report - I:

Pasian hehpihna tawh February 10, 2007 a Taipei-Singapore- Delhi zui a dingkhia tua lampi mah lehzuih kik in Taipei cidamin zanni February 27, 2007 niin na tung ing. A zaknop ding ahih loh hangin ka zinna ah ka tuak, ka phawk, ka lungsim hong lawng pawlkhat hong pulak nuam ing.

i. TTI Airport ah: Friday zan, February 9 zan nai 11 in ka omna National Taiwan University pan Taiwan Taoyuan International Airport (ka tun tunga Chiang-Kai Shek International Airport kici pen a min kikhek ta) zuanin Bus tawh ka pai a, zan hak in zingsang nai 5 in ka 'check in' leh "Singapore Visa neilo na hih manin na lut thei kei ding hi" hong ci uh a, Singapore ah a zingcianga Zomi Inkuan kikhopna ah ka thugen ding vai khawng ka mitkha ah hong lang vangvanga... . Singapore Airlines ah ticket ka lei laiin VISA ka kisap loh thu hong gen uh ka gen hangin hong sang theilo uh hi. Ahi zongin sawtpi ka kinial zawh uh ciangin "Kei research scientist Taipei ah sem hi ing, Singapore ah ni 2 ka taam zawh ciang Delhi zuan ding hi ing" ka cih ciangin hong sang thei kik bilbel a, ka lungsim ah thungetna ka samsam khin zo hi.

Tua ni Delhi direct ticket om hi leh hong piak sawm a, tua ahih kei leh Monday ading hong khaan sak sawm hi. Ahi zongin Topa in hong ompih a, Singapore Changi Airport ah zong themkhat thudot ka tuak kik zawh ciang ni 4 sung lut theihna ding permit hong pia uh a, ni 2 bek ka zang hi.

ii. Changi Airport ah lawm Suan in hong dawn: Cidama zing nai 7:10AM a leng khia in Singapore sun 11:45AM in ka tunga, gate teng ka pelh ciang nitak lam nai 1 hong naih ta hi. Tua ciangin lawm Suan (Tg. Vung Suan Mang) in ama moto thak liklek tawh Airport ah hong pui a, khuasung lam zuanin ka tai uh leh lampi hoih dan, lampi let dan, a siangtho dan, a nop tuak dan te ka mit mahmah tawh ka mu a, Changi Airport mahmah zong a pualam pan a etlawm dan ka tel semsem hi. A theite in a genna vuah leitung Airport hoih pen lakah kihel hi a cih uh ka um pah hi.

iii. Peninsula Plaza ah Kawl ann ne: Lawm Suan in Singapore ah a minthang penpen Kawl ann omna Peninsula Plaza ah hong paipih pah a, ka gildim tak un Kawl ann ka ne uh hi. Ka nekkhit uh ciang aman ka piak sawm leh "Kei a inntek hi ing a, zindo pen Zomi ngeina hi" hong cih ciangin ka nialzo kei hi, aman Zomi ngeina tawh hong makhelh hi ven. Ni 2 ka taam sungin vakna peuhmah ah kei sum zat ding hong phal vetlo a, zo takin zin hong do in, Zomi ngeina hong lak zo mahmah ahih manin Zomi in ka pian hampha ka kisa semsem hi.

iv. City Harvest Church ah kikhawm: Singapore ah a minthang penpen leh biakpiakna kikhop a lian penpen, mihing zong a tamna pen leh khangno te lunglut leh a ut pen uh City Harvest Church ah ka lawm Suan in hong kikhoppih a, mihing tul 7 (seven thousand) khawng pha ding hi kici hi. Tua ni ka hamphat dan uh pen present khawng kingah bilbel hi, Chinese New Year ahih ding man hi.

Singapore mun hoihna pen pen Singapore Exhibition Centre kiangah a om hih biakinn pen a pastorpa zong khangno vai tak in Jeans pheituam, hair style punk dektak, dress zong a freak pian hong silh a, amah pen movie star dan deuh in kichei hi mai hi. Ahi zongin a thugen pen hoih mahmaha, evangelistic mahmah in ka mu hi. A zi lasa siam hi a, Hollywood ah om in, Billboard Chart khawng ah zong hong kilang ban zeel hih tuak hi.

Hih biakinn ah Zomi nungak leh tangval tampi kikhawm zel uh a, tuani in Zolia nih - Cingpi leh Nem ka va mu uh hi. (zop lai ding)

v. Zomi Innkuan Singapore (ZIS) ah thugen: Singapore ah ka lam baan ding a theih uh ciang ZIS in kikhopna ah thugen dingin hun hong pia khol uh a, kei zong a theisa in ka tungsuk a, thugen ngei hilo ka hih manin ka gen ding ka thei het kei hi. A tawptawpna ah Zomi Gamdangah i om ciang bangci gamtat ding cih Lai Siangtho sunga Daniel leh Joseph nuntakna tawh tuhun Zomi genteh in ka gen a, ka ngap loh na banglo in, ka hun ka hawmthawh kik phial hi. Taiwan ah khattanga hei kimlai Zomi biakinn dim a kikhopna leh Zomi la vive kisakna ka tun ciang nuamsa lua in ka inntek suk pah lel a, Zomi hih mah nuam veh aw ka va ci kha pah hi. (nidang ciang zop lai ding)

vi. Singapore Night Safari ah: Singapore ah a minthang vangvang ganhing khawina leh gamsung ah a tenlai taktak bangvua etna, Zoological Garden sangin a thupi zaw ah lawm Suan mah tawh ka pai kik uh a, tua ah lamdang ka sak pen ka khatvei muhna Ngalmuksau ci mai ing (Tapir) tua mah pakta pen mai ing. A dang India Zoo hoih pen 2 ka etna ah zong a om lo te kimu a, ettak mahmah hi. Ahi zongin pasal nih bek kizuih sa'ng samsau khat leh nih tawh hi leeng a nopzaw tam cih khawng zong gamsa et kawmkawm in ki ngaihsun thei hi..... tua pen a nopna hi. Sial ahiam, bawng ahiam, a ki sau cihtak sau, anglang tan or 3ft bang pha thei inteh...tua zong lamdang ka sak khat hi....

Hun in hong ngak lo, Tembawpi khawlna munte leh khuasung mun thupi teng en kawikawi in, zan hong sawt a, khuapi sung kihawl kim pianta cih ciangin Rangoon Rd, Ang Mo Kio, Mandalay Rd, etc..... peel toto in.... a zingcianga Delhi lam zuan a leng ding vanleng delh dingin zan ka ihmu phot a... a zingciang Airport lam zawtna ah.......... ..

(zop lai ding)

Hau Za Cin
Phuitong Liim