Inn ciahna report - II:

Nipini hong bei in, Pizingni hong tun tak ciang lawm Suan a nasepna lam ah a kuan kisam ahih manin kei bek khuasung vakna ding theilo, vasa kha sattan bangin ka tunna inn tohlet pan ka khuadakdak lel hi. Gamdangah nasep khawlni a hih kei leh nasep hun pelhin kitutpih ki ompih, kivakpih cihte om theilo ahih manin Zogam tawh a kilamdanna tua hi.

i. Delhi zuan dingin: Nitak nai 4:20PM a Delhi zuana leng ding ka hih manin nitak nai 1.30PM in ka dingkhia a, Taxi khat la in Airport ka zuan uh hi. Ka lamet het loh, Shillong ah ka sangkahpih ngei, Christian Fellowship khawngah zong la makai in a kizang den Sia Thangno (S. Thang Lian Mang) tawh kimu in, amau Airport tan hong kha in nuamtakin ka tung uh hi. Ka kidot sau deuh uh leh amah zi nei tuung hi a, Honeymoon zanga Singapore ah a zi sepna mun ah hong zin hi a, hampha ka sa hi. Ki theician ka hih manun ciamnuih khawng gen in, 'kei bel honeymoon Japan ah pai sawm ing' ka cih leh amah zong nui a, 'kua tawh maw' ci in hong ciamnuih kik hi.

Changi Airport ah ka tun uh ciang nitak nai 2 hita a, McDonald ah zingann ne khawm in, (zingann nitak lama ne khawm in..haa), a samsau tawh a samtom tawh nui ngeingai in ka ciak ngeingai pian uh leh ka hun hong cingtoto a, ka lut hong hun ahih manin khelah pipi in Singapore nusia dingin Gate 52 kongkhak kaantan in ka lut leh lawmte tawh ka kimu kik thei nawn kei a, ka tuanna ding vanleng SQ 408 in hong maingat gega hi.

ii. Lengkhia takpi ta: Lungsim tampi, ngaihsutna tampi leh lungdamna, phawkna, itna, ngaihna leh khiatlah tampi nusia in nitak nai 4 ciangin vanleng sung ah ka tu a, manner nei khollo vaite khat tawh ka tutkhop pah khak manin hong deep ka sa pian pah hi. Lengtoto in Bay of Bengal ka pelh uh Kanpur tungsan ding khawng ka tun uh ciang ka nuai vuah guahzu meikai in keek kia satsat a, ka omna nuaipan keek kia ka khatvei muhna hi a, ka omna nuai pan guahzu ka khatvei muhna hi. Guahte buak khak loh, meipite liah bat loh, keek kiate kizak lohna vantungah Singapore Airlines vanleng tawh ka leen diaidiai ciangin Topa hong itna leh Topa hoihna ka phawk hi.

Changi Airport ah vanleng a lengkhia ding kigual dimdem ka muh ciangin khualam ah sangkah laia sangkah tawp ciang Bawng hawl a, inn tun ciang Bawng honte huangsungah i hawllut ding ciang khatkhat a kongkhak a lut ding tawh ka teh a, Cargo Plane, Emirates Plane, China Airlines, etc a lengkhia ding takpi a kigual diudeu pen muhnop kasa mahmah hi.

iii. Delhi vanleng tual ah: Zan hong tunga, nitum zawh nai 1 valta ahih manin khuamial cip a, nitak nai 7:30 pawl hong hih ciangin Noida tungah leng diaidiai in Delhi vanlengtual bawh dingin ka kithawi uh a, a kha veilam niamsak in, a kha taklam niamsak kik zel in tua bangin a kithawithawi zawh ciangin Delhi khuapi limtakin kimu in, meivak leh lampi te kimucian deuhdeuh a, laphuaksiamte in 'suangmanpha tawh kizem, a te ziahziah khuapi' a cih te uh tawh kibang ka sa hi. Vanleng tung pan tuipi tungah nitum hihiai a etlawm zah in a etlawm loh hangin zan khuamial ah khuapi meitang zong a thupi himawk veh e ka ci hi.

A nai a cin ciangin lei naih deuhdeuh in moto leh inn te ki lian muh deuhdeuh a, lampi te ki tel in, moto lian leh neu kikhenthei a, tua tak ciang ka tuanna vanleng in leizuut kha in a pei in leisiik hi cih ka thei a, ka dak khiat leh a keu niangnuang inn pawlkhat ka mu a, Delhi IG International Airport na hi maimah hi.

As usual, vaite bel a paikhia masa ding khawng hong kituh bawl pah uh a, ging ngeingai in, pau biakbuak uh hi. Vanleng sungpan i dinkhiat leh vanleng sung lutna lei (ladder) tungah zong niin kimu pah a, a building sung i tun leh vuikhu gim nampah henhan in, paper them leh kuhva tui leh cilsan kisia kimu pah zeizai a, 'hih bel INDIA hi takpi ding hi' ka ci hi. Ka pailama thupi ka sak mahmah Delhi Airport pen 'aw, hih khawngah zong airport na om toto lai sam hi maw' ka ci ta hi.

Mi gam leh ei gam kikhia a, mi vanzat leh ei vanzat kikhia hi. Gate ah checking sung khawt hong sawt lua mahmah a, na khempeuh a si or a khawlcip, stop or stand dan in ka mu hi. A tawptawp na ciang ka hun hong tunga, kei nunga kigualte in zong hong makhelhkhelh uh ahih manin a nunung pen ka suak phial hi. Khangkhat nungta ding ciatciat leitung zat dan kibang kei si e maw ci kawmkawm in Airport pua lam ka paikhia hi.

Pre-Paid Taxi ka lak leh Rs. 150 ding hi a, Rs.200 ka piak pen hong leh lo in a ticket bek hong pia a, lamdang ka sa hi. Ka nung theih kik leh Airport khawng, Mall khawng pan Taxi i lak leh a rate ngeina sangin themkhat tam kipia zaw zel mah hi hong kici hi. A tam ne manman a hampha cih dan deuh hong bang kasa hi.

iv. Innkuanpihte tawh kimu: Cidamin Munirka tungin ka zin sim a ka tunna amah a om nawnloh hangin ka Pa Khup (Rev Khup Za Go) inn ka tunga, tua san ah ka Nu Man inn hong na dawn a, lungdam maitai tak a nitak annkuang um khawm in ka tawldam uh hi. Ka nau Pau te inkuan zong Punjab pan hong zinsuk thei in, amau zong na om ahih manin Taiwan sangin ka gamlum zaw pah uh a, ka tawl hong dam hanhan hi.

v. Valentines Day Delhi ah : Feb 14 pen lovers day zong a kici khat hi a, ka kikna ding ticket ka buaipih manin ka zang man kei hi. Sun thapai ka buaipih hangin zo zoloin a zinciang ka delh kik a, Chinese New Year ahih manin China gama lut ding vanleng peuhmah ticket bei khin hi.

vi. Guwahati Airport ah ka Pa tawh kituah: Feb 15 niin kei Delhi pan zing nai 7.30 in Indigo Air tawh tungin, ka Pa leh Pa Dal (ka pa no) te Aizawl pan nitak lamin hong tung uh a, vanlengtual ah ka kituah uh hi. Tua san ah ka lungsim a hong om thu khat pen, mi adingin a thupi a hih loh hangin, khatvei teitei ka pa vanleng ah tuangsak nuam ing ka cih pen Topa in hong tangtungsak a hih manin kua phawk loh in kei ka lungdam hi.

Ni 3 ka tam sung un khuapi sungah a ki gen minthang Zoological Garden ah gamsa tuamtuam enin, Brahmaputra leipi leh Meileng khawlna cihte leh tua laitak India National Games kimawl enin khatvei ka hawh uh hi.

vii. Shillong lam ah: Guwahati ah innkuan a hun nuamtak ka zat khit ciangin ka u Dr Neng Ngaih Lian makaihna in Shillong lam zintoh ding ka lunggulh uh a, Monday niin ka dingkhia uh hi. Shillong ah ka Pa Khup Za Khai, NEHU ah PhD simlai kiangah kinga in aman Shillong ah a minthang Shillong Bawngsa tawh nitak annkuang hong umpih a, pate kiang tung pen nuam ka sa hi. Tua hun mah ah Shillong Zomi Khangno te in vaidawnna hong nei in Niangtui leh Moh lim mahmah tawh hong muak uh a, vaidawnna kammal khat khit khat hong gen ciauciau uh ciangin kei zong mipi takpi ka kisa phial hi. Hong itna uh leh hong ngaihna uh thupi kasa a, Zomi hih mah nuam zel ei ka ci hi.

Shillong Zomi khangno te pen sangkah lai vive hi uh a, kizen thei mahmah uh hi. Ka sangkah laia ka kikhopna zel pen uh a mun na kisuanta ahih manin Biakinn thak leh Zomi Pastor Quarter hong et pih uh a, tutna kicingin vanzat kicing a, a mun nuam zawta in, a inn lianzaw ta a, Topa in Zomi te hong domtoto hi maw ciin ka lungsim ah lungdamna hong om hi.

Zomi Pastor quarter ah Zomi Theitui ka dawn khit uh ciangin zan zong hong sawtpianta ahih manin cidama kimu kik dingin ka kikhen bawl uh hi.

Shillong ah ni khat taam in Guwahati ah ka laibu (KA LAIKUNG PANIN, pages 600 approx.) proof reading bawl zawh ciang Delhi tawn in, Singapore - Taipei mah ka pai kik dinga, Topa in hunpha khat hong ngahsak a cidam ka ciah kik mateng hibang hunpha ka mu kik kei ding cih ka thei hi.

"Gual ngaih teng tawh om cim nailo,
Sam gi bang khen ding hong tung ta;
Tangbang dam in vangkhua zuan ni,
Mel mu kik in Sian in hong siam hen."

Tu in Taipei ka tung kik ta a, ka ciah sung mitphiatkal bang ka sa hi. Hun leh tuiluangin hong ngak lo a, mihing nuntakna in zong hong ngaklo hi. Hun sim naisim in a beibei hi mai a, ei zong nikhat ni ciang beina hong tung ding hi. Hun hoih i nei lai in am ni. Tuni-a hi thei ding zing cianga dingin siit kei in.

Hau Za Cin
Phuitong Liim