Ka Siangapore zin ding kigen khol:

December 20, 2004 niin Sia Khoi Lam Thangin Zangkong pan email hong khak a, "......Singapore na zin thu ka zak ciang kong lungdampih hi...." hong ci hi. January 7, 2005 ciangin, "Ka thuzak pen a khial hi ing, Kanpur, India hi zaw cih na email pan na thei kik ing, ahi zongin mailam ah pai ding cihna hi.... " ciin hong gen hi. Tua deihsakna Topa in hong tangtung sak takpi ding tawh kibang hi.

Ka dam leh inn lam ciah kawm in ba'n pak ka sawm a, Feb 12 Nipini Zomi Inkuan Singapore (ZIS) te kikhopna ah kikhawm in amau tawh Pasian phat khawm ding ka sawm hi. Ka ngaklah a, ka lawp hi.

Singapore pen May 22, 2006 ni-a Taiwan ka pai laiin ka lambanna (transit) sa hi a, a sungah ka lut kei hi. A pualam vanleng tual ah nailang sung ka lusu ngeungeu a, vanleng a gin kik ciangin ka lu phongto in ka paisan hi. Tu'n ciah lam in tawm bang pak leng cih ka ngaihsun hi; innlamah hong ngaklah ding om, delh ngai cih lah hipah sam lo ahih ciang maw. Tua ciang November kha tawp lama gaw Beleng tangte zong kia khinta ding ahih cianga baan taak ta ding hi.... tua lai in gah panpan hi ven.... he he... ciamnuihna pak hi sam e.

Zomi Innkuan Singapore te in ZO HUIVA MAGAZINE a bawllai un hong phawk vangvang in, bangmah ka hih loh hangin hong deihsakin, a Magazine thupi tak vuah kei zong thului khat puak theihna ding hun hong ngahsak uh ahih manin hampha ka kisa a, ka nuam-a, ka angtang hi. Kamsiam hi leng ka nuamna, ka lungdamna thu beek gen leng zong a kilawm mawhlo hi. Ahang pen Zomite in Linguist Scholars i neih lak pan i zahtak mahmah, tu laitak Myanmar Bible Society ah Translation Consultant a sem Rev. Khoi Lam Thang te tawh kei naupang khutkaih siam nailo natawm Magazine khat sungah Thului hong gualkhawm sakin, tua bang hamphatna leh pahtawina hong ngahsak uh hi ven. Mipilte tawh hong kikhawlsak a, miliante tutna gual ah tokhom hong ngahsakin, ankuang khat hong sawkkhawm sak a, thukupna sabuai khat hong umkhawm sak ahih manin ka hamphatna ka gensiam kei hi.

Magazine hong suah ciang Magazine bek hong khak lo in a nungzui khat zong hong khak khawm uh a, tua pen Siapa Laibu thak liklek, Singapore omlai mah-a a at ngiatngiat hilai hi. Banghanga hia bang laibu hoih at thei hiam, ahih kei leh bang hanga hiabang laibu atnopna lungsim va ngah hiam cih khawng peuh ka ngaihsun mawk mawk a, a laibu min pen ka mangngilh pak hi, thei leeng zong ka gen siam pawl hi kei e.... ha ha..

Bangbang hi leh Changi Airport gate ka pelh mateng lametna bek tawh ka khuadak dinga, tua gate nusia a ka pusuah kik matengin tangval zawlhel ding mah bangin ka ngaihsutna kipei naunau ding hi. Nawhpai lua liang leng lah kimuktu thei, daklua leng lah ki ziakai thei ahih manin Topa tonpih mah kisam hi ing ciin ka ngaihsun hi.

Topa sathaunilh Siate thugen a tangtun na'ng, cidam lungnuam a innlam ah hun nuam leh manpha ka zat theihna ding, Zomi Nam Ni hun sunga laibu hawmkhiatna hun (Book Release Program) a kizat theihna dingin Topa mai ah nong phawk ding uh kong ngen hi.

Hau Za Cin
Phuitong Liim