Zomi Numeite thupi hi:

Khat veivei ka ngaihsut kik ciang i nuntakna hong nop tak dan, i tawldam tak dan, leitung khantohna in Zomite nuntak hong khek dan lamdang ka sa a, khangthak te i hamphat dan cih khawng ka sutsut hi.

Tulai khangno khat ading ka nu, na nu, i pianna nu leh pa leh pi leh pute nuntak hamsat dan i ngaihsut sak kha tam ka ci hi. I mangngilh loh dingin hoih leh kilawm hi. Tu hun a kum tamzaw diakte zahtak huai a, pahtawi huai kasa hi. Mihai ci a, thusim lo leh thu theilo mimawl dan in i koih a, i ngaihsut leh kilawm hetlo dingin ka tuat hi. Nu leh pa leh u zawte kiko ngeilo kizahtak zaw cih pen bel Zomite ngeina omsa hi a, tua bel gen ngailo hi leh. I neu muh loh ding i kipatna ka phawk hun ciang Zomi Numeite Thupi kasa semsem hi.

Kei ka khankhiatna singtang khuata ahih manin tan 10 ka zawh tanin electric nuai ah lai ka sim ka kha kei a, moto tawh ka laisimna ka zuan ngei kei hi. A hun tamzaw ah antang khua pan lu in kipua in tua zong ansu khawl in a hek hilo in, ka nu suksa hi zaw lai hi.

Ka ngaihsut ciang ka nu in zingsang ak masa khuang peuh leh ihmut cim leh cim loh genlo, a pumpi in thuak ding maw, lel ding maw cih zong ngaihsun lo a zingsang zingtho a, buh su a, vaimim su a, inkuan nek ding bek hilo, lo lam nasem pasal te nek ding zong Nipikal khat kham ding kholsa in koih a, tua bek hilo kei sangkah na ah kha khat ka khom ding a siangsa a hong koihsak cih ka ngaihsut ciang ka nu thupi kasa semsem hi. Ama pumpi kilawm ding zong kizem manlo, a lim a al ne leh manlah den, khawl hun mahmah neilo, inn om leh sun thapai mah a nasem, lo kuan leh zong tua mah .... i Zomi numeite bangzah tak in pahtawi huai hiam?

Tuni hih ciang i tunna dingin i nu te, pite in nakpi takin a mau thatang leh hatna na zang uh a, sep cih takin na sem uh hi. Khangluite in pilna sinte thadah hi a cih uh pen ahi thei ding hi mah hi. Nu leh pa thanuam zah in khangthakte thanuam zolo tawh kibang hi. A nuam ding bek deih, a olno bek zong kihi ta hi. Zahtak na taang thei leng zahtak huai hi.

I nu leh pi te khangah singtang lo nei in sun nisa thuak in nasem in khua-ul luanga, nitak a ciah uh ciang lampi ah singkang kuai in, meh ding annteh pua in, vok ann ding dolteh natawm suangsawn in na nungta uh a, nunnop a muh sunsun uh Sialsawm leh Khuado hi a, Christian suah zawh ciang Christmas Leh Kumthak Pawi te hi pan hi. Kum khat sung tawntung khawl hun neilo in, a ihmut sunguh natawm na tom sak mahmah uh hi.

Tua banga a hanciamna hang un ei a tate un khuavak mu in mi laisim bang sim thei in, mi paina lampi tawn khawm thei in i om ciangin ei hong pattah Nu te, pite, sanggam numei te phawk huai mahmah hi ciin ka ngaihsun hi. Amau sep bangin tulai khangthak ah zong i nek zonna lam i hanciam a, hong itna uh i thuk ding, i loh khin zo kei zong i sepsak ding ahi hi ciin ka ngaihsun hi.

Muhdah leh ko, thusim lo cihte pen Zomite zat ngeiloh thu ahih manin a zang om kha a om leh koihna khat a kinei hizaw hi. Mipi omkhop cianga a tuamtat nuam mihingte zong koihna khat kinei in mi pha loin a kituat ahih manin thu tuam sat nuam den, kipawlna ah mi tawh kipawl theilo, kituak theilo, mi lungsim koppih theilo cihna hi a, kuaman kizah taklo in, mi picingin kingaihsun lo hi. Ama thubek, amah bek thu thei kisa cihna hi a, thutak a lak taak lo hi cih mikim in thei lel hi.

Tua ahih manin tuabanga thupi Zomi numeite pen pahtawi huai mahmah a, Nute ni khawng i zat cianga a thu a kigen bek hilo pahtawina pakkhi leh van tuamtuam amau lungdamna ding i piak pen thupi kasa a, lianlua cih om thei dingin ka tuat kei hi. Pasal te in a kap lian, a mat lian, a sep lian bek a kisial pih thapai a, a sia hi kei, ahi zongin a tuabang a pian theihna dingin a zi in a nungah thuap hi, a nungah sawn in panpih hi cih i mangngilh loh ding thupi kasa hi. Pasal te sun thapai gamsungah sa benga, numeite in lo kho hi a kici khawng om hiven. Inkuan pen papi bek thupina ding hih tuak tuanlo hi.

Hau Za Cin
Phuitong Liim