National Palace Musuem, Taipei ka hawhna leh Zomi thu:

Hawh Ni: February 4, 2007 (10 AM - 4.30PM)

Taipei ka tun tung a ka seppihte in ka et dinga hoih hong sak pih uh a masa penpen National Palace Museum (NPM) hi. Hih innpi, Gu Gong zong a kici pen October 10, 1925 kum a phuan hi a, hih innpi sungah Dynasty 4 - Sung, Yuan, Ming, Ching te hun lai a kibawl van tuamtuam 650,000 om a, 10,000 Km a gamla Forbidden City, Beijing pan a kila a tamzaw hi in, a van upa pen kum 8000 (eight thousand years old items) phata hi. Kum 2001 pan hih innpi a puah kik uh pen 2006 December in zo in, February 4, 2007 niin kihong kik pan hi. Tua tawh kiton in British Museum, London te in zong Exhibition nei uh a, mihing tam peuhmah a, miksibu holh bang hi.

British Museum Exhibition ah: Ka Post-Doc seppih pa tawh zingsang thawh hun ngei ma in kikhawhto in ka delhpah uh leh amun ka tun uh ciangin mi ana tam lua ahih manin a tawpna lam kigual in ka din thapai uh leh nai khat val deuh ka din zawh uh ciangin ticket bel ka ngahsam uh a, a sung lutna dingin a tuasanga sawt zaw deuh ka ding kik uh a, Chinese nungak mel hoih taktak hong kilehleh lo hi leh kicim mahmah ding hi.

Confucius lim, bronze statue a bawl uh kiang ka tun uh ciang bel 'tun bel sawt nawn kei inteh ka ci uh a, maan khawng kilak pih in, minit 15 zawh ciangin ka ticket uh kuaihtanna ding mun ka tung uh a, ka khua-ul bel a kam pah tuan kei hi. Confucius lim nuai ah nupi te in a tate uh bial sak in, vak sak in, a mel a theihsak sawm uh a, Confusius banga pil ding cih a deihna uh hi leh kilawm hi.

Hih British Museum Exhibition ah bel Mummy khat numei a kikem cing khat om bial bual a, tua sim loh pen sangkah laisim bu a Egyptian Civilization, Chinese Civilization, Greek Civilization, Indus Valley Cilivilization, Mesopotamia gam Civilization cihte tam a, Africa gama mite van zong tam khop mah om hi. India pan a kila tampi zog om kha ahih manin lamdang ka sa hi.

Chinese te pen arts a thupi sim mahmah hi uh a, nu leh pa in a tate uh paipih in sanginn te in zong naupang paipih in nak et mahmah uh a, lai mah tawh at pah ngiat ngiat uh hi. Ka lawm pa zong a lunglut peuhmah ahih manin a lai ki at khempeuh sim khit sawm hiam cih ding zah in lunglut hi!!

Tua te khempeuh ka etkhit uh ciangin lawmpa in hong ciahsan a, kei bek in GU GONG ka en kik hi (aman a etsa ahih manin hong ciahsan hi). A inn kizom pah hi mah leh ticket a tuam lak kik kisam ahih manin kei zong ticket ka lei kik a, ka lut to pah hi.

GU GONG ah nai 3.30 sung:

Ka lawmpa ciah zawh ciang ka luttoh pah hangin nai 3.30 zawh ciangin zong museum sung ka en khin zo kei a, ka khe khamlua mahmah ahih manin ka ciah mai hi. "Ni khat kisam" acih peuhpeuh uh hi a, ken British Museum Exhibition tawh thuah ka hih manin a zo lo ka hi hi. Hih ka muhna pan Sen te pen na thupi mawk uh hi cih ka mu hi. I pute pen na maimai lo uh hi. Technology na nei pah le uh leitung pen ana zial takpi ding uh hi.

Zomi in lai a neih zawh kum za pha nailo a, tan 10 zo masa pen kum 100 cing nailo lo hi, lai at siam masa pen kum 100 a pha nailo hi. Sente in kum 8000 paisa in lai at dan khawng na neita uh a, thu ciamtehna dingin na zangta uh hi. Van hoih nono, porclein, crockery, metal works, etc na nei ta uh a, lah hoih mahmah, et et dinga kilawm hi. A gen in siam kei ing, muh a theih ding te pawl hi.

Tulai Zomi a kici eite Kumpi innkuan ana hi ngei mah ding hi hang:

Gu Gong pen Beijing a Forbidden City a kici, Jet Li, Jackie Chan, Bruce Lee film leh a dangdang ah zong a kimu den Tianamen Square zom lian a om kumpi inn pen hi a, Ancient Palace zong kici hi (Gu = Ancient, Gong = Palace). Hih innsungah Dynasty tuamtuam te hunlai a van te a tuam ciat in kikoih a, tua lak ah "Chou Dynasty" zong Classical Civilization hun ah ki koih in, Chou mite pen 'Rituals and Warfare' a thupi bawlte hi ci hi. Rituals cih pen Biakna vai ci pak leng, Warfare cih ciang gal kido mi.

A van neih lak vuah ka muh pawlkhat ka at suk zuai zuai a:

1. Hei (Axe): Hei pen singtan na ding, gal satna ding, inlamna dingin kizang hi kici a, kumpi inn a lamna ding uh in sing hoih gamsung pan kaikhawm in a mipite semsak uh a, tua manin Hei in Chou Dynasty hun in kilimzat diak hi ci hi. Chou zawh a hong pai Han te in Hei tuaci zat lua nawnlo hi ci hi.

2. Teipi (Spear): Teipi pen gal delhna ah kizanga, sabetna ah zong kizang hi kici hi. Tua manin gal nei uh hi cih ki cian hi.

3. Belpi (Pot): Belpi lianpipi nei uh a, thambel i cih tui kholna leh zu kholna in kizang hi ci hi. Banghangin tuibel lian, zu bel lian kisam hiam cih leh "lengla dona hi" ciin ki at hi. Biakna hun leh galzo a mi hong ciah ciangin Kumpi innsungah mipi in na dawn uh a, tua hun ah Tui leh Zu a kicing a zat ding, dawn ding a om kiphamawh a hih manin Chou Dynasty in Big Pot na nei uh hi ci hi. Luxurious items in ki ngaihsun hi.

Tua bek hi lo in galman te pen pahtawina kipia a, gal tam man te a pahtawina sang deuhdeuh hikici hi. Tua in ka neu thumang mawh a ka theih Zomi te in galman saman te Haipi tawisak in mipi mai ah kipahtawi hi, zahtakna kipia hi acih pen ka phawk hi.

4. Cilsiatna Kuang (Tongue spitting Vessel or Yen): Cilsiatna pen Kumpi te in a vaihawm uh ciang ding khiakhia lo a cil a siat ziauziau theihna ding bel killi nei, tong tan khawng a sau, (1 x 2 fts rectangular shape) sumngo (Copper) tawh akibawl na nei uh hi. I theih sa mah bangin Chou Dynasty pen 1027 BC - 221 BC hun sung hi. Tua manin luxurious items na hau uh hi. Cilsiatna bawm pen Leel tawh kibang dektak hi.

Ka neulai un ka pi te, ka pu te in zong cilsiatna bung nei uh a, vut guangin vut tungah a cil uh sia hi. Nidang laiin zatep, buk tep ahih man un za sunga Nicotine in cilgial sak a, a polhteh man uh hi lo in a zatep un cil sia sak hi.

5. Namsau (Swords): Kumpi peuhmah in namsau na nei uh a, ahi zongin a namsau neih dan uh kibang lo hi. Zomi te namsau deih dan te leh Chou Dynasty hun a namsau mel te kibang mahmah hi. A bul sik, a bul kiangah a meng khat kaisak cihte pawl. Dynasty danga te namsau pen a sau mahmah cih khawng hi a, a bul a bawl dan khawng uh tuam se se hi. Dynasty khat leh khat kibang hetlo mawk hi. Zomi pen gal do mi ihihna hong lak hi.

6. Samsih (Hair Comb): Samsih pen Kumpi te adingin van thupi hi, luxurius items. Bang hang in maw? Nasemte in sam hiat man lo a, nasem in kuan den hi. Gal do te in zong gal delh in bua den ahih manin a sam hiat man cih thadah zong tan manlo hi. Tua manin Zomi te in nidang pek pan numei ahih nak leh Samsih a neih teitei nopna pen Kumpi innsung pan a zatsa ahih manin akisam khat (essential items) lak ah hel ahi tam ciing. Tua manin i numeite zong kumpi tanu, kumpinu na sem ngei uh a, luxurious items na zang khin lua uh a, a lungsim vuah a bei thei nawn lo hi ding hi.

7. Bakilh (Hair clips): Hih zong a tunga mah bang hi.

8. Kuangpi (Big Container): Pawi tam zang uh ahih man in Belpi mah bangin hih kuangpi pen tui siangtho dawn ding leh Zu pen a siangtho bek mah dawn ding ci uh ahih manin na limzat uh hi. Hih vante mi nautang neih hilo a, Kumpi innsunga om van te vive hi.

Chou Dynasty hun sung in Chou inkuan in - Biakna lim zat mahmah a, Zunun leh Gualnop ni in mi hangsan te pahtawi uh a, Lengla do kin mahmah uh a, a tuate khempeuh zawh ciang Thupha Kipiak uang zat mahmah uh hi kici hi. Tu lai Zomi tawh i ki batna a om hiam, na thei ding hi.

9. Limlang (Mirror): Limlang pen na neita uh a, a bem a tawina om na limzat pen uh hi. Limlang, samsih, Bakilh cih te a zatna kibang hi - Kumpi insung mite bek in a zat van hi.

10. Bilbah leh Suangmanpha (Jaded ornaments): Numei peuhmah bil vut vang pahpah cih pen a lamdang hi mawk hi. Nam dang a tuaci tam thei kei ing Zomi pen tuaci mawk hang. Tua bang a kizem man dingin Kumpi innsungah nungta hi kei leh a piang theilo thu hi.

11. Square Platform "Kuei": Hunpi khat peuh ah Mipi lam nga a tu te, thu gen dingte dinna ding in dawhsang a bawl uh ciang a killi nei bek in bawl uh hi (Use only square platform) ci mawk hi. Mikang te stage bawlte khawng, van bawlte khawng en leng a bem, a kawi cih khawng lim zat hi. Chou Dynasty hun sunga Kumpi in a killi nei bek zang hi (only squares) ci ta zen hi.

12. Niangbel Khaina om zang (kettle): Kumpi in Niangtui lim dawn ahih manin Niangbel kisuang den a, sa den ahih manin a khaina kiguan hi ci hi. Niangbel khaina zang Zomi hih tuak uh hi.

13. Ciangkawi leh Sumbawm (Hook and containers): Van khat peuh bat duatduat loh na dingin ciangkawi tawh kai ziauziau uh hih tuak hi. Sumnen khollna dingin bawm or bung khat peuh zang uh hi.

14. Saiha Bilbah (Ivory Earring): Numei te in thupi a sak mahmah uh pen Saiha bilbah hi kici hi. Amau zawh kumpite in sik nam tuamtuam leh Suangmanpha (stones) khawng limzat uh a, Chou Kumpi hunsungin Saiha bilbah kithupi bawl hi kici hi.

15. Khi (Necklace): La pau ah Awhkhi a kici khitang pen Chou Dynasty sungin a si peuhmah a pahtawina un khitang kikeng sak a, a damlai peuhmah in Khitang tam awh sawm uh, a tuamtuam neih sawm uh hi ci uh hi. Chou zawh a Kumpi sem, Chin leh Han te in zong tua pen zomto suak uh hi kici hi.

16. Lukhu (Helmet): Lutuamna helmet zong sik tawh bawl in galsim te in khu zel uh hi.

17. Temta (Knife): Pasal khat in tem a neih teitei ding kici hi.Tua pen galte hong lut vat leh kihutna ding cih hi. Tua manin Pasal in Tem, numei in Samsih na ci uh hi.

18. Galhangte pahtawina in Namsau: Hsiao-Chien- ai in galzo in hong ciah kik ahih manin Namsau galhang pahtawina in kipia hi cih khat na nei uhhi. Zomi ngeina tawh aki bang hiam?

19. Siampi nei ciat uh (Each clan has a priest): Amau beh Siampi ciat nei uh hi ci hi. Beh nih in Siampi kikop ngeilo hi ci hi. Zomi Siampi neih dan tawh aki tuak hiam. Siampi thupi bawl ahih manin Biakna zong thupi sak cihna hi pah hi.

20. Kizahtakna, kipahtawina: Hun khat peupeuh ah pianna Nu leh Pa zahtakna pia den uh a, pi leh pu zahtakna pia den uh a, phawk den in, a innkuan tuahphatna uh, a innkuan matutna te ciamteh in tate hilh in, tate zong ngeina a mangsak lo ding leh a keem ngitngeet dingin kihilh tangtang uh hi ci hi (Honor ancestor, record achievement, and received their reward simuslteneously, pay respect to them. And wish their decendents to keep the family tradition's honor).

21. Biakna (Rituals): Biakna pen misi te tawh kihona ci uh a, kidona pen sih leh hin ding kikal hi ci uh hi (Rituals are conversation with deceased through times, warfare the battle of life and death).

22. Biakna ah zong galvan lak zel: Galvan pen kidona bek ah kizang lo in gualnopna, biakna, pawi khat peuh ah zong kizang ziahziah lel hi ci hi. (Weopons - shields, daggers, axes, battle axes - not only use during warfare, but were also used during rituals or in ceremonies). Hun thupi khat peuh ciang thau i lawt, hanla i sak khawng pen Chou hun lai tawh kibang hi mawk hi.

23. Galvan nei teitei: Pasal khat ahih nak leh galvan khat neih teitei ding hi ci uh hi (Weapons are indispensable) .

24. Galhang dan kiciam teh dimdiam: A citung vua ciamteh khausan, khauvom tuamtuam tam neih leh neih loh in galhang ahihna uh a liatna a neuna na nei uh hi. Zomi in galman te ciamtehna in Haipi tang masa ding, a zom ding, a nunung ding cih bang na nei uh hi. Tua pen ranking hi mawk hi. Tua pen Chou hun lai in zong na zang uh hi. Tuni tanin Zomi in zong i zat pen hi. (the difference in their weapons decorations singnify - rank and elevated status of honor. The inscriptors of these records of historical rituals and past warfare).

NB: Zo cih pen China gam ah Zhou ciin at uh a (Simplified Chinese), Taiwan ah Chou ciin at uh hi (Traditional Chinese). Simplified Chinese pen Chinese a theih nuam dinga Original or Traditional pan a simphified pen uh genna hi. A zat dan kibang napi a atdan kibang lo hi - gentehna in: Li = Lee, Zhang = Chang, Zhou = Chou, etc.

Hih NPM or Gu Gong a van om te pen 1949 a Chiang Kai Shek in China a taisan lai a tembawpi tawh Beijing Gu Gong pan a puak khiat tam zaw hi. Beijing Kumpi Innlui ah van manpha khempeuh Taipei ah a taipih hi. Maan lak phalloh ahih manin mit tawh i muh teng bek a kimeet hi mawk hi.

Lim gelh siam khat in ka lim hong gelhsak a, ka min leh Gu Gong Feb 4, 2007 niin en hi cih a gelh zawh ciangin maan hong kilak pih a, a FREE in hong pia hi. "Kei India pan hi ing, Chou Dynasty thu theih behlap nuam a hong pai ka hi" ka cih ciang hong pakta tuam in ka mu hi. "So we are brothers" ciin hong kawi keei a, a kim a om khempeuh in zong maan hong la kei uh hi.

Pute kiang mah ki lunggulh tek a ngeina hi ven maw! ka ci mai hi.

Hau Za Cin
Phuitong Liim