Ka lawmpa leh kei:

Ka lawmpa ka cih pen ka laboratory vuah post-doctoral researcher ka seppih pa hi. Amah pen China pan hong pai hi a, zi neisa hi. Kumluiin hong tun tungin a zi tawh US pan a gam uh ciah masa lo in hong kiton in hong semsuak uh hi. Ahi zongin i theihsa mah bangin Taiwan tawh Sengam kiho theih kholloh manin a zi pen kha 3 sanga sawtzaw a om phal hi lo a, ut in ut kei leh a ciahsan phot kisam hi. Tua manin a hun ciangin a ciahsan hi.

A zi omlai in ka lawmpa pen nitak ak gilkah peuh leh innlam zuanin kikhawhsuk in, nitak an zong ka lab bup vua ka nekkhawm zel uh zong hong nekpih man ngei lo hi. Ko a dangteng nitak an nek khit ciang lab ah lut kik in, computer games peuh kimawl in, video peuh en in, email peuh en en lel in zan kim hong naih ciangin ka ciah zel uh hi. Khat veivei ka ciah ciangin zanlai peelta a, ahi zongin research lab pana ciah masa pawl ka hi veve hi.

Ka lawmpa zong a nidanga zan sawt hak ngei ngeeilo pen a zi ciah zawh hong kikhek gawp a, ciah hun mahmah thei nawnlo in, zankim a phak ding ciangin "ciahta ni" i cih hang a computer games kimawl nop tawh, a paulap ding mah bei nawn samlo a, tun a ciah hakpen hi ta a, zing sang lam nai bangzah in lum a, bang hun in ihmu man hiam kici ta hi. Lamdang kasa veve hi. "Bang hang ahi tam maw" ka ci ngeungeu hi.

Mihing nuntakna, nuntak dan pen i kiim i kiangah omte in zong hong kilamdang sak mahmah hih tuak mawk hi. Ei bek a om leh om loh zong kilamdang tuak mawk hi.

Hau Za Cin
Phuitong Liim