"Foreigners shake hands":

"Once Upon a Time in China - I & II" cih i et leh Jet Li leh gamdangah ah a khangkhia Sen nungak khat kimuhna tawh kipan a, a kimuh uh ciangin Jet Li in a khutnih hum khawm in a lukun a, a gamdang om Sen nungak pen in khut kilen dingin a khut pia phei hi. Tua tak ciangin a nungak in Jet Li khut len in sing kheuhkheuh a, Jet Li lawmte in "Foreigners shake hands" ci uh hi. Tua ciang Jet Li in lamdang sa in nui hi.

Hih film ah Jet Li in Ching Dynasty hun lai a mihangsan Huang Fei Hong kici Chinese mihangsan lim a ciing ahi hi. Gamdang te in Sengam pan mihing tampi US ah zol in, its worth a life time = khatvei zin zong nuntak zahin manpha hi ciin "Gold Mine" ah sem dingin tonpih uh a, a tamzaw te Sex Slaves in zangin, ahih kei leh nasem (labor) in zang in zi neih ding natawm phallo uh a, numei te zong a Sex uh a zat theih nawnloh uh ciangin tuipi sungah khia lel uh hi cih pan a mite a hun khiapa hi ciin lak hi. Ahi zongin a kihona ah Jet Li (Huang Fei Hong) in bangci hiam cih leh " .... if there really is Gold in America, they would not have come to our land" ci hi. A Kung Fu siamna tawh a galte zo ziahziah a, ahi zongin America te in thau tang tawh a lawmpa a kap tak uh ciang si ahihh mani n, "Fist can't fight gun" (Khuttum tawh thautang kizolo hi) ci hi. Tua ciangin a man zong thautang zat dan sin a, khuttum tawh a kizatkhawm ciang nasep thupi dan a muh ciangin lamdang sa hi.

A tawpna ah "China has changes so much, its for a better or for worse, only time will tell" ci hi.

Part - II pen a tangthu a tuam deuh khat hi leuleu a, leitung khan tawh kituak in China gam zong a khan kisam hi cih a lahna hi kik hi. Leitung ah thahat dingin traditional siamna bek kicing lo a, technology tawh khankhop kisam hi cih zong lak pah hi. A thupi sak mahmah khat pen Chinese Accupuncture hi.

Le, thulu ah lut leng - "Foreigners shake hands" (Gamdang mite khut kilen uh hi) cih pen Zomi nuntakna ah zong ahi kha hiam ci ing. Khut kilet pen nidangin i nei kha tam? Christian Missionary te in hong tun uh ciang a kizang pan ahi kha tam aw ka ci hi. Ciimnuai leh Geltui ah kimuh ciang khut kilet a om tam aw ka ci hi. Ki ngawngkawi in, kinam cih pen Zomi te in i zat masak ahi kha tam ka ci hi. Khut kilet pen cik hun pan i zat pat hi ding hiam ciin ngaihsun ing.

Mikangte Sengam ah a pai uh pen amau Gold zong mah hi uh a, amau Gold pen tualai in 'mihing' mah hih tuak hi, nasem ding mi cheap labor pen amau adingin 'Gold' mah hih tuak hi. Ching Dynasty pen kum tul nih phial paisa hun hi. Exploitation nasia mahmah cihna hi. Tua ahih leh tu hun in tuabang exploitaitation om nawnlo ahi diam? Omlai maithei, a hun tawh kituak in neem deuh zong hi maithei. Zong a om nawnlo zong hi maithei, thei kei hang - leitung pen - Ngapi ngano a kivak cih Zomi paunak zong om hiven.

Gamdang mite kimuh ciang kikhut let a, tu lai ciang kitawp cih bang zong a kizatna mun om hi. Thagum bek tawh leitung siamna leh leh pilna kizolo ding cih kitel a, leitung khan tawh kituak in minam khangto kei leh nasem in om den uh hi cih zong kitel hi. Nasem khat pen si ta leh a tunga pa sangin a thupina om tuanlo a, Jet Li film ah a bat leh a cina leh damlo, a si te pen tuipi sungah khia ziauziau lel uh hi. Kithupi simlo cihna hi. A si khin zong kuaman it taak salo cihna hi.

Tua ahih manin leitung tawh kituak a mimal hilo, minam in kal a suan kei leh kizahtak thei ngeilo hi cih hong lak hi.

Zomi dinmun koi bang ahi tam aw ka ci hi.

Hau Za Cin
Phuitong Liim