'Ka star nu uh' mu kik:

Amah kua hiamte cih dan takin ka Shillong om lai un mah ci kik zel mai ni. Tua lai hi mawk ahih manin a dang kici theilo hi.

THUPHA NGAH MINAM cih VCD hong kihawm khiat tung lai hi a, hoih kisa in kien kikkik, kisakpih damdam zel hi. Ka Paboih uh leh Khaipu te natawm a BA exam uh hun ding naita hinapi, hih la khatvei a ngaih masak kei uh leh laisim in tukho theilo, concentrate theilo, tua zah donga tangvalnote natawm lungsim a la la thu hi.

A tutna mualtung nisuahna lam hek a suang kiciang, a puansan Zohuihkhi siang in a mut hiauhiau, kihuang deudeu a Tamngai a tum laitak a taklam pan Sakhi suaklu gah kia tawm ding banga hong paiphel hialhial Zogam tangval tua Zolia kiang atun ciang suakta tak kisuanglah hetlo, ahi zongin kisuanglah mel kilangsak dingin a tutsuk kawm in amaisan a kiakpak khat botto zauh a, a tutna ding en in a tuphei hi [Tua lian ciang hivaw, ka Paboih un a khuttum a lik dekdek liang]. Tua ciang hih Zolia in a mel hong kidawk sak in kilawmtakin hong kihei phei a Zogam tangvalpa liangko tungah a lu hong nga pheiin hong nehphei a, kingai huang ngeungeu, ki ngaai hialhial in Zogam ngaihla hong pan khia hi, a maitai etlawm a, a lasak siam hi .....

"PHUALVA BANG" by Tg. Zam Dal :

Mimbang i pianna Zogam nuam,
Lung hong ngilh ken maw
Theih loh singta gamlei pan
Gal hong don kik vaw

Phialva namcinte nun nuam a,
A lenna Zogam nuam pan
Kholpih gual ten hong lellel in,
Hong sialsial ung e maw

Phualva bang ciampel kei ni,
Meitei gun in hong theihpih lai e

Sabang i tatna Zogam nuam lung hong ngilh ken maw
Tulsing nim dildialte lak ah Muikhua zam zilzial
Vabangin in hong lengin la aw,
Khaubang hong ciahkik dih vaw

Phualva bang ciampel kei ni,
Len nupa in hong theihpihlai e

Etlawm mualkuam i Zogam lung hong ngilh ken maw
Heisok pak sansial lak ah zunloh i Zogam
En zun kei leng kuan zun dinga, Sesum minthang pallo leng
Zogam pakbang tawi kik dinga nihgel tong i ciamsa

Phualva bang ciampel kei ni
Thangmual dungin haibang hong ngak e

'Theih loh singta gam lei pan...' cihsan a tun ciang amah bek hong vakkhiata ahih manin Paboih zong hong nui kik a, a tawp dong ka lungkim suakta uh hi. La lah siam, a mel lah hoih, a lungsim lah maitai, a kivei dan, a lampai dan lah ngaihhuai sa ka hih manun hih Zolia pen, 'ka star nu uh' ciin ka ciamteh uh hi. A la sakkhit uh ciang a bul pan khatvei ka etkik uh leh lasa: Tg. Zam Dal leh Lia Nu Sung cih na kigelh a, alasa te min leh video sunga kidawkte ami a kibat leh hampha si uh e ka ci uh hi. Tongsan loh melmuh hi ei hih pen, mawk a!

'Star' cih pen Mizogam ah kithang lua a, nungak hiam, tangval hiam hoih a sakte uh tung thangvan aksi tawh teh in a siang sitset, a pak silsel, a etlawm, a ngaihbang genna in 'star' kici a, 'aksi', ahih kei leh 'hoihsakte', 'cih simsimte' cihna in ki zang hi. Tua mana, 'ka star nu uh' kaci mai uh hi. 'Star' cih ciang lungsim lama kinai zong hi tuanlo, a taka kinai zong hi tuanlo, kua theih loh a agal pan hoihsa cihna hi mai hi.

A dang khat leuleu pen, "ZOGAM NUAM" cih lasa te hi a, Lasa: Tg. Lianpia leh Lia. San Lun (Lia San Lun cih zawk ding tawh kibang).

1. Mimbang pianna Zogam nuam
Lung ah hong ngilh ngei kei ning
Singta gamlei nun in nuam mah leh
Mu banghong ngai ing

Mualcin sangte gal in don leng
Ngeisok pakte san silsial
Zo lengthe te a khuan ciaiciai na,
Lungah ngilh mawh Zogam nuam

Zo vontawi lia leh tang hanlung ciam ve ni
Zogam kil bang a khanna dingin
Diam diam in semkhawm ve ni
Ingua hahlo gamgua hah kei ni
Va ak utong kineih bangin
Ka sisan laih thei kei ning
Ka minam khek thei kei ning

2. Etlawm mualkuam Zogam nuam
Maimit suan cim thei keng e
Annek tuidawn nunna haksa zong
Anbang hong it ing

Mualcin sangte galin don leng
Phuitong pakte sansilsial
Zoheisa pakte a pal lutna
Etcim theilo Zogam nuam

3. Ngabang lenna Zogam nuam
Laitual khia zo ngei kei ning
Nopna dahna ki uap liailiai a
Deih teng li bang a cinna

Lenmual dawna muikhua zam zilzial
Unok pakte palh lihleh
Zolawkta te a khuan ngeungeuna
Lunga ngilh mawh Zogam nuam

Zo vontawi lia leh tang...... cih san taka Zolia hong maitai pen hoih kisa kik leuleu ahih man in hih zong 'ka star nu uh' mah ka ci kik uh hi. A tawp kuana mualtung khat a lia leh tang hong kidelh zuaizuai pen Sakhi nupa kikhawl hialhial tawh kibang ahih manin etlawm kasa uh a, en huai zong ka sa uh hi.

Zolengthe te a khuan ciaiciai na....Zolawkta te a khuan ngeungeuna a cih siam pen laphuakpa siam kasa mahmah hi. Zogam hoihna behlap to kik in Unok pakte a apalh lihlehna, Phuitong pakte sansilsial in Zoheisa pakte a paallutna hi ci kik a Zogam hoihna siit neilo in gen giapgiap ngam mai hi. Mihing nuntakna zong nuam kisa in midang ki eng lo a - Nopna dahna ki uap liailiai in deih teng li bang a cinna ciin leitung zak dingin pulak khia a; Etcim theilo lunga ngilh mawh Zogam nuam... ciin a kikhiatlah dan tawh hong khupsuk hi. Hih bang la hoih tampi omlak pan thupi kasak mahmah hi a, a lasate siam in a vidoe kituak a, a nungak leh tangval zong melhoih uh hi.

Hih banga hoih ka sak 'ka star nu uh' tuni Zomi ciin google pan ka zon ciangin ka mukhia kik a
(http://www.zominet. org/zomivcd/ thuphangahminam. htm), ka ngaih leh ka lungbang hong leeng pah duaiduai mawk hi. Cim mana lai ka at kawmkawm in ka ngai a, a lim zong ka en kha kik zel a, 'ka star nu uh' mah etnuam ka sa lai veve hi. Heina dang zong lailung kidanglo.

Hau Za Cin
Phuitong Liim