STB:

Tulai in a thang mahmah khat a kigen pen STB hi. STB a khiatna 'sungte beel' (STB = sungte beel) kici hi. Pasal khat in zi a neih ciang a sungte kiang lam beel cihna hi. A hauhna uh beel zong hi thei a, ama insung sangin utzaw in a beel zong hi thei a, a zi lungkimna zongin a sungte bel zong hi thei hi, a hang tampi om kha inteh, bangbang ahi zongin ama lamte sang belzaw cihna hi.

Zomi te ngeina hilo ahih manin a kilawm lo khat in a kingaihsun hi. A kilawmlo in kingaihsun cih ciang a hoih lohna zong om cihna hi dingin ka um hi. A hoih lohna a kigen tangtang loh hang mipi lungsim ah upmawh om khin dingin ka um hi. Mipi in tuabang ngaihsutna nei ahih leh ama kinaihpih, a lawmit, a nungthuap tawntung te in zong a lungsim tawng vuah awilo ding cihna hi a, ahi zongin a gen theih loh uh hi kha ding hi. A gen uh hangin a hoih ding hi tuanlo hiam, gen hi leh a kilawmtatna uh bei ding cih dan ahi zong hi thei hi. Awilo cih ciang thudik pen ki awilo ngeilo a, thumaan pen i galte natawm in hong awi ding hi tazen a, thusia pen i lawm it pen te in zong hong awilo ding hi mawk hi.

Bangbang hi leh mihing bel lampam sikkhial lo omlo a kicih mah bangin a khiallo, a mawhlo i om kei a, mi mawhna a liat zawk a, ei mawhna neuzaw in i ngaihsut hangin a hoih lampi ah i kihei kik zel kei leh mawhna neu zong khangin mawhna lian suak thei a, khialhna piangsak thei hi. Tapa taimang banga, 'hi nawn kei, kei tho in ciah ning" ci a lampi maan lamah i ki hei theih ding a thupi mahmah hi.

Hau Za Cin
Phuitong Liim