"Heina khatlo, a mual in hal ......." by Lengtong Pauno

Lasiam Lengtong Pauno in leitung nuntakna tampi tak na sin kha ahih manin mihing te nuntakna tawh akituak ding la tampi na phuak a, a tul thei ngeilo tampi lak pan hih la - "Heina khatlo a mual in hal na vang mubang hong ngai sing e maw" a cih bang thupi kasa mahmah hi.

Hih la ka zak cilna pen Murlen pan Champhai ah ka u Thang tan 8 simin a om lai in ka pa tawh Buhtang puak in Sakol hawl in, Sakol nung ka zui uh a, tuuk lai ahih manin buannawi in guah zu zel, Sakol vanpuak buhtang pen tuikawt leh sia ding ahih manin ka tuipuan neihsun uh tawh khuh in, ko ka thuak zaw uh hi. Lamkawi ah ka tun laitak un Jeep tawh kibiing tuak vat ka hih manun ka Sakol uh lamsak ah thakhat thu in lengto a, a van kia in a ippi keek a, antang tampi a kiluak kik thei nawn kei hi. Tua manin sakol delh in ka muh uh ciang ka pai kik uh leh ka sawmna uh tung zolo in Ngur ah ka pa Suang Khan Kap te inn ah ka tung uh a (ka pa Kap in January 19, 2007 niin Champhai zato ah leitung haksatna te phawk kha nawnlo dingin hong nusia hi cih ka zak ciang hih thu ka lungsim ah hong suak hi), amau Tape Recoder ci a i theih masak te nei uh ahih manin la hong ngai sak uh a, hih la hong kisa hi. Ka Pa Kap tapa ka nau Mungno in sakpih in zui thei ahih manin ka eng mahmah hi. A la ka thei lai diam hong atsawm dih ning:

Heina khatlo, a mual in hal,
Na vang mu bang hong ngai sing e maw
Sam gi bang i kikhen zong,
I heina peuhah lailung kingilh kei ni

Tung Pasian in hong siam henla,
Dawn bangin i kituah kik ciangin
Lungzuan sinthu khaubang sut khawm,???
Holung kum khawm Sian in hong siam hen aw???

Kha pham zong ka laukha'n lungah hong ngilhlo ding
Ngaih aw i pham leh thangvan ah
Zaila in naubang awiawi ni e
Thangvan tualnuam ah, i tun ciang ih laukha zong
Tuibang kigawm ding hi 'ngaih' aw

Nih gel lungtuak maciang suanna ding
Vaimang sesum ih zong
Heina peuh ah tangbang damin
Lungtup tung ding Sian in hong siam hen aw

............
............ ..

(thei khin lo hi mawk ing ei, hong huh thei na om uh hiam).

Hih la in mihingte lametna tawh nungta in nek leh tak zongin inlum nusia in khual kizin khia in, it leh ngaih tawh kikhen hun om a, ahi zongin cidama kimu khawm kik a, holim khawm a, nekhawm dawn khawma, lungdam maitai a kimu khawm kik dingin lametna lianpi kinei in tua zong i lungsim tawng ah i thungetna hi tawntung hi cih hong phawk sak hi.

Ahi zongin lametna tampi khasiat mulkim huai tak in hanmual lam ah a kha khia a, dahna kahna leh lunglen khuangaihna tawh i ki dim hi. Ahi zong la phuakpa in lametna dang khat hong pia kik a, i pham takpi ahih leh zong thangvan Sian anglai ah i laukha lungdam takin 'tuibang kigawm kik ding hi' ciin hong khamuan hi. Bangbang a piang zongin i tupna i maban tangtun sak ding ahi ciin tha hong pia a, heina khatlo leh sihna te natawm in i maban hong guallelsak dingin hong khakzo lo ding hi ciin hong thahatsak hi.

Mihingte ngaihsutna leh lametna ah cidam taka kimu a nuamsa khawm kik ding, Pasian phat khawm kik ding cih ahi hi. Ngaih Anglai Ah zong lametna lianpi tawh kalsuan in, "Laisim zawh ciang cidama innlum tungkik a, nu leh pa leh sanggam it leh ngaih lawm leh gual khuapih tuipih leh mi khempeuh tawh nuamsa khawm a, inn thak lut leh mopawi thuah khawm ding" ciin gelna a neih uh sihna hangin a kitaan, a tangtunglo, lametna tuisik suak a, huihmut bang in lengmangin tui taih bangin luangmang hiau lel hi. Mumang tawh kibanga mitphiat kal sunga khuaphelep a bei kik pah tawh kibang hi. Ahi zongin mihing in lametna khat omlai hi cih a lah kiikna dingun, hong it hong ngai kinepna ding khat om lai veve hi - tua pen mihing zong hithei a, muh theih loh vana Pasian zong hi thei hi. A silo, a nungta lai peuhmah in lametna thak om tawntunga, hong nusia hong paisan te hangin i kinemsak loh ding, i maban i matut zawh ding hanciam lailai ding hi cih hong mu sak hi.

Tua hi a, mihingin i it i ngaih, i theih cian mahmah i kikholhpihpih sa te in hong nusia cih i theih, i zak ciang khatveivei lunglenna hong om in, khuangaihna zong om thei hi. Tua bang hun ciang lametna khat i neihlai pen vangam nuam ah maitai taka kimuh kik ding ahi hi. Nitaang kimu den in, Ni tum ngeilo ding a, haksatna om lo in, nitna kici kitheilo in mi khempeuh siangtho sitset in Pasian khuapi sungah tualleng ta ding uh a, dahna kahna te om nawnlo ding hi.

[Ka pa Suang Khan Kap pen ka phawkna in 1991 April a tan 10 ka zawh a, college ka kah ding ciang ka pa neu tawh Lamka zuana ka pai dinguh a zak ciangin amah zong hong it mahmah ahih manin Lamka a meltheihte veh kawm ding cih paulap in hong zui a (a mintap kibatpih B. Kalzang khua ah Suang Tun, Suang Do Lian cihte hi), a taktak in ko pata bek khualzin ding gamlum kei nuteh acihna hi. Khua dangah ka omsan ka ciah sim in inn ah ka baang a, "Cinpu a khualzinna gim ding ahih ciang Ak gawh ding neilo na hiam" ciin ka Nu Ngaih kiangah a dong tawntung a, akpi nokai na tawm itlo hi. Khuaivum khuataw luisungah meipi zong kikhul theilo daam lak pi ah ka giakpih, Mizoram- kawlgam-Manipur paina lamsuk lamto tawna ka khualzinna vuah hong masuan ka pate lakah khat ahih manin ka phawk mahmah hi. A dam loh kiza ngeilo, ka zak leh hong nusiat kiton, leitung pen a ngeina ahih leh lamdang kicici ding tawh kibang hi.]

Lei ah ki mu kik nawnlo ding ihih manin vantung bek ah kimuh kiik ding lametna om hi.

Hau Za Cin
Phuitong Liim