Dear Nu Haukhek, Phuitong, Zam Vung leh a kuamah peuh,

Lusei gal laiin leh tuhun tanin a kigen thang mahmah khat pen 'Israel te in bang ciin hong khangkhia kik thei uh hiam' cih hi. A tom in cileng Israel te Model in nei, Hero in koih, etteh in nei cihna hi.

Mihing khempeuh in Hero kisam a, Model, Etteh ding kisam hi hang ciin lungsim sinmite in gen uh hi. I etteh te bangin gamtat kisawm in, amau nuntak bangin kinungta nuam hi kici hi. Israel te suahtak kikna (1948 kuma suahtak kikna thu) bang hang hiam cih kanin model a omna pan tuni ciang a tung ahi hi.

Zomi te zong model khat nei in kal i suan pen kisam mawk hi. Tua dingin makaite in a sep ding kisam mahmah hi. Model leh Hero nei lo a mawk makaih ahih leh mimal deihna leh Tokhom luahden utna lungsim(dictatorshi p mentality) lut baih mahmah hi. Kei hih dan, kei thu, kei deihdan, ka thuneihna ka khahsuahlohna ding, etc. cih dan lungsim mihing sungah lian baih hi.

Tua manin kua hiam i model ding? USA etteh ding maw (amau tu laitak lian mawk uh hi, hau uh ahih manin leitung mipil tampi agam vuah pem sak in a hoih tampi la lut den uh hi), China etteh ding maw (amau a gam kipumkhatna dingin khut khauh takin a mite kiuk uh a, amau deihna mikhempeuh in a zuih ding thupi sak uh ahih manin leitung minam khat mihing tampen himah leh a kipumkhat den uh hi), Israel etteh ding maw (amau mihing tamlo, sila in kiman, kicil gawpgawp hi mah leh a minam uh it veve in minam lungsim pailo uh ahih manin a kisiik cipna pan hong thoto kik uh hi)? A dang tampi omlai inteh....

Tu laitak i tuak thu pen Nu Haukhek gen bangin Israel te tuak tawh kibang hi. Minam tawmte thuak pen Israel te in ana tuak thu tawh kibang kawikawi hi, leitung kiu li ah, tua man in amau ki etteh mahmah mawk hi, Lai Siangtho hun lai pek pan in.

I omna gamte pau i zuih khak leh zong i minam itna lungsim bei kei peuh leh pau leh lai pen Israel te mah bangin nikhat ni ciang kisin kik thei hi. Innsungah i pau ciat theih ding thupi a, siam ding pen kisin kik theih lua, picin zawh, graduate zawh, nungak tangval zawh ciang zong kisin kik thei hi (a neutung pan a theilo kha i om leh cihna hi). Mikang pau bek zangin kiho hileng zong Zomi i ihihna tel peuh leng tua in hong kaancip dinga ni khat ni ciang Israel te bangin kidingto kik dingin ka um hi.

Minam nasem pen leitung bup huamzo ding a omlo mah hi phot a, ei omna mun leh gam ciat a huam dingpen om mah leh kilawm, ahi zongin mi kicing hetkei mawk mah in um ing. Anuai a pawlkhat in Zum ah a tu ding omlo ci a, khat in 'a tu nuam tamlua zaw' ci a..... i theih dan leh muh dan kibang lo ahih manin a huamkim zo bel omlo mah hi dingin upmawh huai hi. Zomi hi ciin kumpi in hong ciamtehna kician tak i tenna gamgam ah omlo phot ahih cianga a nawngkai pawl bel om om lai leh kilawm.

Pasian nasem tam, minam nasem tawm cih zong hi phot mah ding hi. Tua dingin ei deihtelna zong hi masa khin lo in lampi tua bekmah kihong peen phot zong hi kha thei hi, i tenna gam leh kiukna khawng tawh kituak in. Bangbang hi leh a bul pan suut kiik in dotna tampi dawn sawm leng-

1. Bang hangin gamdang lunggulhna hong om hiam?
2. Bang hangin Zogam ah ten hamsa kisa hiam?
3. Bang hangin Zogam ah ann kikhamlo in mi sila natawm sem in gilpi kivaak hiam?
4. Bang hangin i pau leh i lai natawm ei leh ei puah ding zong hong kikhaktan hiam?
5. Bang hangin minam bup lungdamna ding sangin mimal lungdamna ding bek tam sepzaw dingin hong ki pattah hiam? (kipawlkhawm nopna lungsim, nasep khawm utna lungsim ki suksiat sak, mipi ngaihsutna a ka khia sak dingin policy hong kikhum or instigate om hiam)
6. a dang zong tampi omlai inteh.....

Bang hangin USA in independent na deih uh hiam, suahtakna ding kidona American War of Independence ah a Causes bang hiam? A kidona uh pan a thupiang bang hiam, Results or Significance. .... tua mah bangin ahang kan kik leeng... bang hangin Zomi te kipumkhat lo bangin kidawk hiam? Angsung theih man hi, Zum ah a tu ut tamluat man hi cih bang a tuam tuam kigen maithei, a tuabang lungsim banghangin hong piang hiam? BANG HANG IN TUA BANG LUNGSIM HONG PIANG HIAM? I pupa khangah kiza lo...... BANG HANG HIAM???

Sia Laangpu in Naga te minam hut nopna hangin temtawng tawh kuankhia acih pen thupi kasa a, minam itna hi a, biakna hilo in ka um hi. A minam uh hungzo uh ahih manin a biakna uh suakta tak in a zui thei uh hi dingin ka um hi. Huih tha bek hilo in a tak in sem uh himawk a, zahtak huai hi.

Bang hanga hibang eima ngaihsutna ciat kikum i hiam cih zong ngaihsun kik dih ni.

Ngaihsutna kikum thei ihih manin lungdam ing, gen khial a om leh kimaisak ni.

Hau Za Cin
Phuitong Liim