Kuppihna: Election ciangin

A nuaia Pu Siamno hong gen 'mipi te sum deih a dangtaak...' a cih pen in ka lungsim hong su kha mahmah hi. Bang hanga sum deih a dangtak diak i hi diam 'kitel ciangin'?

[Khawhsa nekna economy pan sum muh tawh nek zonna ah i lut ciangin sum pen a kisam mahmah hi mah a, a tualo in kihing theilo hi. Mi khawhsa nekpihna dingin sum i neih kisam a, tua sum lah a mawkna in hong pai lo ahih manin sum deihna pen kuamah peuh in kinei hi. Ahih hanga "dangtaak" cih liang ding pen i nek tawm ding sanga van hoih, na hoih i deihna pan hong piang hi dingin ka um hi. Gual ki eng tek ahih manin, ahi zongin a diktaka sum muh sawmlo pung cihna hi a, 'easy money' pen a galet kitam kha hi dingin ka um hi.]

Zomi te tenna Lamka District pen All India ah zong competitive exams success rate a hoih mahmahna mun, laisimna zong a hoih hun tawk mahmahna mun hi a, laisiam leh educated percentage Mizogam sangin a sang zaw hi. Ahi zongin election ciangin educated tamna gam hi cih a kidawk ngei lo tawh kibang hi (a detail ka theih loh hangin news zak bek zong nuamlo hi).

NEHU ah Graduation Day a kizat ciang "laisiam in hong kisang ta ahih manin koimun peuh ah na gamtat na luhek ah laisiam na hihna mite musak in" ciin hong kivaikhak hi.

Laisiam tamna, kumpi nasem zong a kilawm hun khat mah a omna, i mi tawm, i cihtham loh hang Kumpi in zong hong phawk khak i hihna ah laisiam ihihna election ciangin zong lak thei in, mipi ading, minam ading, i gam ading 'etteh' hi thei leeng. I tenna neucik bek hi mahleh - kilawm tak, nuam tak a i ten theihna dingin lampi om tham hi, tua dingin mipi lamlak thei leng thupi mahmah dingin ka um hi. Laisiam tamna gam hi cih mipi muhtheih in a kilat tuan kei leh a thupina om lo a, laisiamna huthe (leak), um tawvang bang bek hi a, a manphatna om tuan lo hi.

Ka gen nop pen ahih leh - thu thei, khua mu, graduate ciangciang in mipi hamphatna pen mimal hamphatna hi cih mipi a lah theih ding thupi sa ing a ci nuam hi ing.

Hau Za Cin
Phuitong Liim