Zo Aktui a hoihna:

Zomi te van khat peuhpeuh pen a hoih hi zen veh aw. Kawl te bangin hoihsa lua, thupi sa lua mahmah, a gam kumpi bangin Zomi pasal khat amin a galkap nautang maimai, kawl dial gina mello teeng ningneng lel taleh na thupi bawl veve a, kawl nungak bang zi dingin a deih kha zenzen leh thupha ciin a lungdam lua uh a si lo bek, a anaaaaaaaaaaaaaaak lungdam dan kigen theilo, naak lungdam lua kisa a sepna natawm khangkhan pah hi (promotion pia pah) kici ta zen hi. Abang nei tuam i hi diam maw...he he... Zogam tangval a pian khak pen Lamka lam cih dan leh 'maimai lo' hiiiiiiiiiiiiiiiii. Ki maimai lo hi maw. Zomi is great. Tua zahta a mite hong zahtak pen ei sep thupi man hi in um kei ing, Topa thupha hi ciin ka ngaihsun hi. Sia Thawthawn paunak leh Thugentehna kaihkhop te ah "Vok khial gamta inntek suankhia" cih khat om hi ven maw, a tua dan lah hi samlo, 'a riau' khat om hi. Zomi te na khat peuhpeuh hoih kisa in ki thupi sim hi.

Zo Vok bang pen Khuado ciangin sa lim kine nuam ahih manin Khua Do vawk dingin kumbul pan kikhawi pah hi. Sai vawk i cih vok kahbia pen a ni a ni a khang hanhan hi a, Banlaluang tawh a khan kiton a kici liang hi. Ahi zongin Khuado Zomi te hun nuampenpen ah vok lian kideih lo in, vok sa lim ki ne nuam bek hi. Tua manin saivok kikhawi nuam lo a, Zo vok bek mah kikhawi tangtang hi. Zuak ding ahih leh Zo vok kikhawilo in sai vok kikhawi kik zeel hi. Ei ading Vaphual mi ading Va-ak cih dan hi lo diam. Ei ading a hoih ki deih masa cihna hi.

Zomi te a a hih naak leh a hoih pen hi pahpah hi. Tukum Champhai leh Mizogam sung peuhpeuh ah Chiristmas sunga Lenggahtui (grape juice) a kitam khawng penpen Tedim Grape tui hi kici hi. Tedim khuapi ah a kibawl hi kici a, Mizogam ah zong a minthang Hnahlah Grape tui in pha lo hi kici hi. Singapore Sia Hang Khan Lian in "inn lam ka va ciah pak leh" acihna sungah Zoheisa Hai khat khawng i dawn leh ...... a cihte hi dingin um mawk ing. Mizogam ah thei tui a ki deih penpen Zomite bawl ahi hi. Kumthak Masi hun sung pen annlim a kineek saan laitak ahih manin a tuasunga kikhawng tampen Zomi te bawl mah hi. Zomite bawl Zomite mah in lim kisa hi.

India kumpi in kumpi nasem ding a tam lak penpen (kei theihna ciangah) Lamka a Zomite hi. Kumsim a kumpi nasem a lut, gambup kidemna exam ah a tam cing penpen a mihing tamna tawh kituaka tawikhai ciang Zomite mah na hi kik hi. Sak leh khangah Zomi kideih a, kawlgam vaigam ah Zomi kithupi sim hi. USA, leitungah gam hausa leh gam thupi penpen na tawm in Zomi te thupi hong sa in hong muanga, Zolia, Nursing training a zo lian, ka sinna ni tuazah ka zangta cih zong anei nailo, a nasep sin a zo pan bek, a ma pumpi takpi zong a khangmoi mikmek, a no sitset lai ding pi "Zomi ahih nak leh muang lel ing, sem thei ding hi, mi pha ding hi, zo ding hi" ciin President Bush in a min gelh ngam ta zen hi ven. Bush cih a kizak nak leh 'bang a gen tam maw, kei lam hong en kha tam maw, bang a ne tam maw, .....' a gamtat dan neucik na tawm a kithei nuam leitung ah amah bekbek mihing hi tazen, tua zah a mi thupi in "Zomi ahih nak leh muang ing, zo ding hi, siam ding hi, sem thei ding hi" ci ngam a, ama min gelh ngam cih zen pen..... we should be proud of.... Zomi ihih hampha tak ve hang aw... Topa hoih hi Topa lian hi... kumpi David in "Topa aw, kei bang hi a, ka innkuanpih te zong bang hi peuhmah hiam? hi ci lawmlawm a nong thupi sakna dingin kei bang hi zen ka hiam..... ciin kiniam khiat taka Topa mai a kun ngawihngawih mai khawng hong phawk sak hi.

Zo ak ci leng lah ak laklak pan asa lim pen, a cidam pen, a khanto pen, a kep nuam pen leh a gilkah khial ngeilo ahi hi. Akkang (broiler) pen a sa a lim loh dan, a sa a naal ziapzuap dan, a gim a hat dan, a tuimawl a ciilloh dan, Zo ak tawh i teh khak ciang.... Sesihte cih dan in 'tihna vet om o' hi mai hi. Limlo lua, sa bel hi saam, ankam sang bel namtui zaw deuh, ahi zongin Zo ak tawh teh in bel... nang hong gen zaw ve...

Zo aktui leuleu pen hoih teu hi ven. Hnahlan ah tan 8 ka sim lai un Ninoni sang kikah lo ahih cianga meh man ding sum thalawh in Ciau luidung a taaksing ki atsa te pua in ka kuan zel uh hi. Ciau pen gamgi ahih manin a gallam ah Bapi om a, Dalkhai, cih khawng kimu dimdem hi. Ka sum thalawh uh zong Bapi Zomi te ankam leh baldol, beli leh tangkha, samphok, manta, zasan, beteh, a...... meh khempeuh ci mai ni, Dal leh Alu simloh.... leina ding hi tazen hi. Hostel ah mi 7 ki om a, mi khat in nikhat annhuan in ei an huan ciang tui leh meh i sik ding hi a, antang haikhat ciat kisuak kawn in, sing pen sangkhawl ciang kipua zel lel hi. That was life.... Tua banga sangkhawl ciang singpek puak ding sumthalawhna ka muh uh ciang lungdam in ka kuan khawm nainai zel uh hi. Rs. 30 thalawh pen kalkhat meh man ding cing a, nasep tun ciang aktui leina ding zong cing hi. Halleluijah. .......

Tua bang ciangin nitak lam kisil in, Mysore Snow cream kinuh nam vangvang in bazar lam ah Bapi leh Saipimual, Dalkhai cihte meh zuakna lam ah ka diangto uh a, Zo aktui a nei lai uh hiam ciin a banban in ka kan phei uh hi. Khatvei vei na nei lai uh a, khatveivei na khawng khin man uh hi. A khawt khit uh leh aktuibawm a te pawl tangnih ka lei uh a, khat sial dawn in khat meikiangah hailum in 'half boil' in ka ne uh hi. Sun a nasep thagimna teng a dawn kik ding cih ngaihsutna hi. A dawn ding mahin ki ngaihsun ahih manin zong dawn takpi a, Nipini zingsang pen nui vervar sa in ki zingtho vanglak hi.

Tua banga nitha Rs.30 tawh Hnahlan sumbuk phei a Hnahlan laisim lakah a pawl sangpenpen te kong kizui taktak uh bel khua kiphawk samlo hi inteh, Mizogam cih dan in ki "confi" mahmah lel hi (confi = confidence cihna hi). Kimuang mahmah lel, sum ah kua ki eng tuan samlo ahi tam maw, Hnahlan khua a khasum tam ngah pen Assam Rifles Captain pa khasum Rupees Tulnga lellel khawng ki phawk pha sam lo hi.

Football kimawl leng lah Hnahlan nungak te in hong mu nuam veve sam, Volley Ball kimawl leng zong ei hih dan khat peuh pen 'style' hi lianlian... nuam veve sam hi, khuakhata a pawlsang pen hih khak zong - tan 10 ciang bek sanginn omna ah!!

Ahi zongin Zo aktui hoihna leh nasepna pen ana kibang khollo hih tuak hi. Laitui te mah hi zeel vem (amah Pa Thawng, Washington DC cih dan tak in), amau leitung zatdan leh Zomite leitung zatdan pen a kilawm hoih mahmah hi mawk hi. Ko Zo aktui ka sial dawn uh ciang ka nasepna thagimna uh hong damsak hi. Tha hong guan kik in hong thadim sak kik hi.

Laitui tangvalpa bel a khualzinna ah vanpua in sum thalawh hi a, tawlpian ahih manin aman zong Zo aktui tangkhat zan a lup ding ciangin na sialdawn a, thu a nget khit ciangin lumsuk hi. Zingsang a thawh ciang a lamet bang hetlo in a lawmpa zong na tho vevaa hih tuak hi. Tua ciang amah zong lamdang sa ahi diam maw, kuun suk in, en a....Aw, tua lam tawn zaw maw?..ci hiat lel hi.

Leitung mihingte pen Zo aktui dawn ciatciat zong experience kibang lo hi. Lungsim a kibat loh mah bangin pumpi pianzia, nasep zia zong kibang lo ahi tam maw. Hih pen kei theihna in ban nawn kei, medical lamte tavuan hi.

Tua ahih manin Zo aktui, aktui ciatciat ah zong nasep dan nam nih a nei citciat pen aktui hoih hi ciin kiciam teh hi. Zo aktui.....Zo aktui....

Hau Za Cin
Phuitong Liim