Siamsinpawlpi website pahtawina in:

Zomi te adingin Zomi mah in website i bawl, leitung kiuli ah olno a kizop ziauziauna ding i neih tampi om zo a, ahi zongin Siamsin te tawh kisai kinei nailo hi (ZOMI website ka muh pak theih teng a nuai ah kong lak hi). Tua manin hih www.siamsinpawlpi. org pen a thupi mahmah leh Zomi te pilna siamna sinna lam ah hong phung vuh ding khat, hong kizomsak ziauziau ding ahi hi.

A lai at dan, a design, a mel, a kigualh dan cihte ka gen sawm kei a, a thupina leh a phattuamna ding ka ngaihsutna ka sung nuam hi.

Zomi te pen sim leh mal ah kikhen in mihing khun tawm gamgi in hong khen mah leh lungsim, pau leh lai in hong khen theih lohna leitung ah kiteng a, siamsinna nekzonna leh nasepna zong gamgi kikhung thei lo hi. Tua banga i nuntak laitak in eima omna kuam ciat ah khantoh ding kisawm in, hun khat laia kikawmtuahna (communication) hamsat luat manin i khantohna kikim lo hi. Tua bang hamsatna pan in i suahtak theihna dingin khuapi zaw, munpi zaw leh mi khangto, mipil gamte nuntak gamtat dan a mu masa te in i minam hehpih huai sa in puahnopna, dopsang utna lungsim nei in hih kipawlna Siamsinpawlpi (Siamsin Pawlpi cih ding hizaw leh kilawm tak) hong kipan khia hi.

A Home Page ah i muh mah bangin ngimna Aims and Objectives hoih tak tawh kibulphuh in pattah a kisam zaw te, panpih a ngai zaw te, dopsang a ngai zaw te kidom sangin, a sang tungte zong kipahtawi tawmtawm in damdam in a khualzinna leitung hong kipan a, tuni in leitung khan tawh kituak in Lamka, Manipur bek hilo information High way natawm ah sawk bat in hong omta a, a lungdam huai ahi hi. A bul pan te leh tuni ciang a masuan makaite, mipi te hanciamna zahtakna ka pia hi.

Ut khempeuh kikhum zolo ding hi mah leh a kisam pha diak teng kisim thei a, a nasep masa te uh, a bul pan masa makaite, mailam vision cih khawng tawh hong kihelh suk zihziah ciangin 'eh' ciin i lung hong nuamsak hi.

Hih pawlpi leh website in leitung kiuli ah om Zomi te pilna siamna sinna lam ah hong thanuam sak zel dinga, i Gam leh i Minam hong tawisang ding hi. I suahtakna ding, minam banga kal i suan khopna ding kingakna bulpi khat ahih manin phungvuh in zuun ni.

Itna leh deihsakna tawh Zomi makai hen (Lead the Zomi).
Siamsinpawlpi damsawt hen.

Hau Za Cin
Phuitong Liim