'Simlei luah ding omlo' by T.S. Khai

Simlei luah ding omlo, a luah lo dingte in luah phot... mihaute'n hauh nuamsa lo, a hau lo te hau nuam, a minthangte minthan khak suakta kisalo, a minthang lote lah minthang ut....... nuntakna pen khatveivei a lamdang hi veve mah hi. I muhte ki umlo in, i muh loh tata khawng ki um zawsop. 'Muh loh .... bek kilei' kici na ven, khat veivei ciang i muh loh tata khawng peuh a hoih zaw dingin um mawk hi le hang kilawm. 'Zia leh tong kitheisa kaan omlo' zong na om zel si. Sei o song hang ei... simleitung poh...

I it lawm ten hong nusia ta e,
A omlai teng luankhi puan bang nul
Sian anglai ah mel kimu kik ding
Lung ka sial ciang luankhi dai bang theu

Simlei luah ding om khang e
Pham ding hai bang ngak hang e..
Pham nua ciang lengvan ah mel kimu kik ding
Luankhi dai bang theusak aw
Pham ding hai bang ngak hang e
Simlei luah ding om khang ei, luankhi nul vaw

Lametna neilo te dah bangin
Albang dah ding Sian in lungawi lo
Simlei tungah mel kimu mah bangin
Kimu kik ding hai bang ngak hang e

Milun zata sesum lamte zong
Kulsin zal e albang dah ve uh
Jesuh naubang a sang i hih leh
Kimu kik ding lengvan nunnuam ah

Hih la ah bel Sia TS Khai in nuntakna ah i tuak a taktak thu vive hong gen a, lametna leh lungkimna tawh hong ihmu sak hi. Sihna pen i tuak ding hi mah, ahi zongin kimu kik ding hi hang 'nui un, maitai un' ciin hong hansuah a, 'zawnglua, genthei lua kisa kei in, milun sesum lam te zong sihna tawh kipelh tuanlo hi' sihna ah kikim khin hang ci hi. Sihna ah zong milian si leh mineu si bel kibang lo zel hih tuak ven, ahi zongin simlei luah tuanlo ding uh hi ci hi.

A lakam zat te pen kituak lianlian se in a lasak nuam hi... dai bang theu, puan bang nul, hai bang ngak (zu hawm ciang hai a kual pai pen ei kiang hong tun ding i ngak banga ngak, hong pelh lo ding, hong tung teitei ding cihna hi), albang dah, etc...

Hih la in pianthakna zong gen a Jesuh naubang a saangte adingin kha suahtakna, kha damna kingah hi ciin hong hilh a, 1970's.....hunlai a pianthakna thu kigen lai hi in um ing....... (Zomi Revival Khatveina hilo diam).... tua laia la minthang khat pen.....

'Na pianthak ding ahi,
Hun hoih na neih lai in...."

cih late a kithan lai ahi dingin ka um hi (ken bel ka nung theih hi)

Hih 'Agape' la pen, aga = ga, gataam cihna ah 'ga' gin in ging ding, tuga cih a ga ginin ging lo ding, aga..... pe = pee, peengkul cih a pee gin in ging ding, AGAPE hi pepa mawk hi. "Hong it mahmah ing" cih hiauhiau dana it mahmah na Topa hong itna genna hi. Itna diktak, true love, condition omlo, true love, nong tua cih leh hong it ding, nong tuacih kei leh hong itlo ding cih dan hilo in, 'sihna ding ah hi in, damna ding ah hita leh hong it ing,' cihna itna pen hi. Sum tampi nong hop leh hong it ning, anteh lomkhat hehpihna tawh nong leisak leh hong it ning cih dan hi lo a, amau pop singers te la khat -

'I don't care who you are,
where your from,
what you did

cih dan zong hilo in.... ahang pen, amau -

'as long as you love me'

ci uh hi ven. A it kei leh it tuanlo ding cihna hi. A it leh bel it thuk ding, it teitei ding cihna hi. Laitui te khat cih dan a "kei bel nong hehsak kei uh leh dik mahmah ka hi aw" cih dan hilel ai ve.

I Topa in bel 'nong it leh hong it ing' ci lo a, 'nong cilphih zong kong itna kiam tuanlo hi, hong it mahmah ing' ci zaw hi. Amah i sut theih lohna tua hi. Amah i bang semsem ding a, leitungah Amah i bang thei kei ding hi. Ahi zongin vantung ah bel Amah i sun ding hi.

Luankhi nul zong itna hi a, van kipiak zong itna hi a, neih leh lam kihop zong itna hi a, ciangduai tawh kisat zong itna ahih hun om hi. Itna pen a lamdang hi mawk hi. Ahi zongin Topa in bel AGAPE itna, ITNA SIANGTHO nei dingin hong lamen a, a tua lam ah i khan ding hong deih hi.

Gensiam haksa mahmah ei ITNA thu pen. Behlap sawm ciat dih ni ei guai....

Hau Za Cin
Phuitong Liim