Inn ciahna report - III:

Feb 10 leh Feb 27 kikal sung in ka khualzinna ah Zomi U lian pawlkhat tawh kimu kha in, amau tawh holim kha ka hih manin hampha ka kisa a, nuam kasa a, thupi kasa hi.

Pa Hang Khan Lian, Singapore: Mi holim siam leh honuam mahmah hi a, leitung bup Zomi te in Khuado Pawi leh Zomi Nam Ni kum thum hal ta bangin munkhat ah zangkhawm zel leng cih a lunggulh mahmah khat hi. Zong hong tangtung dingin ka um hi.

Pa Pau Khan Thawn, Singapore: Mipil leh laisiam innkuan pan piang leh khangkhia ahih mah bangin honuam a, thu limci ngaihsun ngitnget hi.

Singapore a Zomi uliante in Zomi khantohna ding leh nuntak noptuamna ding, minam suahtakna ding ngaihsun mahmah uh hi cih ka mu hi. A khua zong nuam a, ahun zong hoih a, a mite zong pil in, a thu uh zong dam hi. Khatvei pian tektek a hampha tuam om hi leeng kilawm ka sa phial hi.

Pa Thiau Za Khup, IRS, Guwahati: Khatvei ka muhsa hi a, tutungin Zomi kikhopna ah ka kimu kik uh hi. Ka muh masak in amah bek hi a, tutungin a zi tawh ka mu khawm a, kikhop tawp ciangin niangtui dawn kawmin a holim ka ngai uh a, nuam sa takin ka din kual leihlaih uh hi. Minuam ahihna ah milian ahihna kimangngilh phial in hong kikholhpih siam hi.

Rev. Dr. JM Ngul Khan Pau, Guwahati: Nidangin MA pen "lai tawp" kici a, doctorate pen kithei ban lo hi. Siapa in tuate a zawh ciang zong aban zom hilo in, a dang, pilna dang sin thuah in sang na kah a, "pilna a thupi bawlna" ka va mu hi.

Rev. S. Neng Za Khup, Shillong: Amah zong a tunga Siapa mah bangin "pilna a thupi bawl" pawl ah na pangin laikung mah tawh exam na gelh ngekngek lai uh a, damsung pilna behlap den ding ahihna hong telsak semsem hi.

Pu H. Chin Khenthang, IAS, Shillong: A quarter mah ah na omlai ahih manin kava kimu thei a, Haggai Trainning zo in Hawaii pan hong ciah sawt nailo ahih manin a pension hangin na ki fit mahmah lai hi. A holim siamna leh a kammal paih ding omlo te cimlo takin tomcik sung ka va ngai kha a manpha kasa mahmah hi. Ama laibu Against All Odds leh Obedience te ka leikha thei uh a, manpha kasa hi. Ama autograph ka lak khak loh pen pammaih ka sa hi.

Dr. B. Lang Kham, Delhi: Kumlui a nasep hoih mana Award thupi tak saang hi a, ka muh ding ka lamet hetloh hi mah leh biakinn ka tun ciangin hong cibai a, Rev Khup Za Go galna hun a ka kimuh bek uh hi napi hong na thei lai a, mi pilte in mi ciamteh thei uh hi akici pen ka phawk kik hi.

Pa Suak Za Thang, IRS, Delhi: Amah NECTAR Graduation Day 2004 laia ka kimuh cih loh kimuh kikna omsun hi in ka thei a, a felna leh a hopih nopna kidang nailo hi. Milian i cihte a let deuh deuh uh leh kiniamkhiat deuhdeuh uh ahi hiam ka ci hi.

Pa T. Roumuan, IRS, Delhi: Shillong sangkah laia u te (senior) hi in biakna makai khawng mah in na sem uh a, amau nung kizui hi. Tu in Delhi ah milian na suak in na om uh a, a tangval lai mah bangin mifel chitchet hi lai hi.

Pa T. Kai Thang, Delhi: Pa Thang pen, tu'n ken lai ka at ciang 'Shillong omlai in' ka cih cih banga amah zong Aizawl a omlai Shillong hong zin ciang 'Aizawl ah chu' a ci khat hi ciin Shillong Zomi thukizakna Ka Thaitong te-in ciamteh sak hi. Ka cihna ah mifel ahih manin a lian aneu in hopih thei in neel uh a, mipolhnuam ahi hi.

Lawm HK Suan Thang in a tanu ana tawi a, lawm Kapa in zong a khutvei lamah a tanu a kai diatdiat leh biakinn kikhopna zong family bek a kuan ta ding cih hiam aw ka ci phial hi.

Zomi ulian dang tampi omlai a, a vek un gen khin zo kei ni. Hun tomcik ka om sungin amau tawh holim kha ka hih manin ka lungdamna leh ka angtanna thu a gen pak nuam hi bek ing.

Heina peuh ah Zomi,

Hau Za Cin
Phuitong Liim