Ne lo uh:

Ka lawmte ading ci, en zong a ki ne ngamlo, a ki lei mengmeng lo Indian Sweets 'Burfi' a tam mante Taipei ah ka puak leh lawmte in ciam a, "this is very very sweet" ciin ne lo hil hial uh hi. Tun zong a bawmpi in omlai. Kisuanlah huai phial hi. Ahang pen mi'n a khumlua khawng ne ut lo hilhial lel uh a, phatuam ngaihna sang, ama cidamna kep ding thupi sak zaw cihna hi. Zomi in bel mi'n hong deihsak ci dinga thauna ding, gawngna ding hi ta leh ne veve kha ding cih ka ngaihsun mawkmawk hi.

Ka lungsim ah ngaihsutna tampi hong om a, en muamkhum ci hanga, amau a khum luat man in nelo uh hi. A khum cih ah, a khum lo penpen ka teel hi lai hi ven. Delhi ah sweets zuakna minthang penpen te laka khat ka zon teekteek hi a, ka lungsim takin "pammaih kasa a, poi kasa kei hi".

Ka lawmte in zong phamawh sa lo, 'ka ne kei ding uh' cih gen lel uh hi. Aw! mite ann hoih thupi bawl dan lawmlawm. Deihsakna cih pen kizang theilo hi. Deihsak kisam lo hilo, sathau nellua, a allua, a khumlua cihte a pelh uh hi mai. Tua man hi inteh, pitek putek kum 70 tunglam ding te pawl pen zingsang sim in tha' la in (excercise) diang ziahziah uh a, a tek uh hang a ci uh dam velval, san velval uh hi. Zomi pawlkhat pen dup kihkiah lel hi. Amau sisan suah in cidam vilvel uh hi. Annek in sisan ah nasem ahih cianga.

Champhai ah Zomi ciamnuih bawl siam khat Pa Khoi Sian kici om a, aman "mikang te pen a annek uh zong hoih ahih manin ei ciacia zong lianpipi pha hi" ci se hi. Ei ciacia zong ei cia pha ci leh a kibang, lianpipi pha a cih ciang amau a lianzaw tawh kibanga ngaihsut pak theih hi. Annek hoih cih a gennopna hi.

A lim a al sa'ng a hoih ne zaw ni cih hong lunggulhsak hi.

Vawksa lim mahmah a sathau tampi tawh kine khawm hi. Zasan thak lim mahmah a gilzang pansak hi. Ci-al lim mahmah a pumpi tung electrolyte imbalance piangsak thei hi. A uih, a al, a khum, a thak, a thuklua cih te pelh ding a thupina pen Khansauna dingin kisam a, cidamna ding in kisam hi mawk hi. Mi khat in bel - "Zatep pen ka sihpih zongin tep veve ning" ci liang hi. Khatvei nuntak sung i duh ngaungau ngawl ding hi ka sa thei kei ci hi.

Tuma in Pu Tongseal in an hoih tampi hong at sa te ka phawk a, kong behlap nawn kei phot mai ding.

Heina peuhah Zomi,

Hau Za Cin
Phuitong Liim