Ka Nipi Nu Nem Za Ngai in hong nusia

Sanggam Zomi khempeuh aw,

Ka Ni Nem Za Ngai (kum 66) in Aizawl ah Feb 1, 2007 (8.00AM India; 9:00AM Kawlgam; 2:30 GMT) in hong nusia hi cih za ing. Hih lai ka at laitak in a kivui laitak hi ding hi (1:00PM India; 2:00PM Kawlgam; 9:30 GMT)

Mimal thu hi in, kilawm lo phial hita se leh Kawlgam, Tahan Munlai ah a om ka Ni Nuam Ngaih Cing in za nailo ding ahih manin hong kohsak thei na om khak uh leh ciin hong gen mai hi ing. Ka Ni Cing pen Sia Job Thawngno sepna Pawlpi ah kikhawm hi in, Biakinn gei mahmah ah teng hi cih ciang thei ing, zin ngeilo ka hih manin a kician zaw in gen thei kei ing. Sia Khen (Rev Dr Khen Za Sian) hong hilhsak thei om leh zong aman na hilh sawn thei ding hi. Ahih kei leh Zangkong ah Sia Khoi Lam Thang in za leh zong hong na hilhsak thei dingin ka um hi.

Budiman ah ka Ni Dimboih (a pasal ngang Ngo Khaw Nang alias Ngokawi, Sia GK Nang u) om a, amau zong na kihilh sawn thei ding hi.

Themkhat ka Ni Ngai thu hong gen ning. Pu Vial Suan leh Pi Nem Za Awi sung pan unau 5 pha uh a -

1. Nu Nem Za Ngai, Aizawl
2. Pa Pum Do Lian, Murlen
3. Nu Nuam Ngaih Cing, Tahan Munlai
4. Nu Zam Luan Cing, Lamka
5. Siapi Khai Za Dal, Murlen

ka pu in nusia baih ahih manin ka pi kepna tawh hong khangkhia uh hi. Ka pu hong nusiat in ka pa neu a suak zawh ni 3 pha pan a, ka pi in lupna tung nusia nailo hi. Tua in ka Nipi kum 9 pha pan hi. Ka pi tawh kithuah in inn nasep lo nasep pasal sep khempeuh sem thei in anaute na hiciang na tungsak hi.

2004 November kha in Lamka ah ki ensak a dam kik ding ki lamen nawnlo ahih manin Lamka meltheih te in misisa khak in a khak sa uh hi a, ahi zongin Topa in kum 2 bang a nuntakna hong behlap sak in, December 2006 kha in a unau kim un khatvei Aizawl ah kimu khawm kik uh a, ken zong phone tawh ka hopih kha hi. La khawng hong sam duatduat ahih manin nuam ka sa kei a, hong kamvaikhak nunung pen:

'Koi mun peuh ah i om zong bangmah lungkham lo ding. Lungnuam takin om ding....

ciin nui duatduat a, Kawl a ka Ni Cing in "Tun a ni nuisak ei...." ciin...

Kumlui, kum bul pan kumlang zong zangkhawm manlo nawn loin a pasal Z. Shoute in hong kha kik a, aman zi dang neihsan ahih manin ka pa vui ding hong suak a, Champhai pan ka Pa taang in ka U Suan Lian Thang paisuk in vai va hawmthei ahih manin innsung sihna tung hi mah leh ka omna pan ka lungkimna khat om hi. A sih kuan lupna tung zong peel zo nawnlo a a kimak zawh kumkhat cinglo nungak kik man bek cihna hi. Akimak hangin a tapa u pen in pute kiang a zuat ding phallo in kum 2 a lupcipna sa laikhun pan likkhiat ding phallo a, ama laikhun tung, Aizawl mah pan - a nu a pa omna lam Pa kiang hong zuatsan hi. MANGPHA NIPI.

Laigelh pai mel kei in tua zah in hunsak mai ning.

Hau Za Cin
Taipei, Feb 1, 2007.
------------ -

Ama laphuah - a pa nusiat pan a nu tawh Christian a suah thu uh, a naute lawh cinna pawlkhat leh Aizawl ah December 2006 a unau kim a a kimuh khop uh a nunung pen hithei cih ngaihsutna nei ahi tam maw lungdam thu leh thupha piakna khawng na nusiat hi.

Ni Nem Za Ngai La:

(No. 1-5 pen Dec 2006, Aizawl ah a unau un a kimuh khop lai vua a phuahte hi).

1.
(a). Tuai ten zin bang hong khakna aw,
Silh puan nel hoih no hi e,
(b). Kha ka pham ciang tung thangvanah
Zua kiangah hil masa vang e"
2.
(a). Zuanem kha a kiak ni-in e,
Tunnem in pham ning ci e.
(b). Zua mel thei lo von momno teng,
Tun in al bang hong tah e.
3.
(a). Albang hong tah ka tun ngaih aw,
Sian awi a kihek hi cia.
(b). Mim bang pianna ka tun nem in
Sian sinthu an bang muam e.
4.
(a). Zua mel theilo tuaingalliam in
Limlian sau tum suang thei e.
(b). Saungel bel bang vel ning ciing e,
Awmlaiin mang bang bawm e.
5.
(a). Sauneu ngia bang a zun dingin,
Von 2, 3, tawh kawi lia nu tawh,
Kum sawt tang bang dam ve aw.
(b). Siangsung zingvai a hawm dingin
Tung Pasian aw, tuai khan khau bang sau sak aw.
6.
(a). Vangkhua gualten lam bang pak ni'n,
Tung kawlva bang leng thei hi leng,
Na nen a khawl nuam ing e.
(b). Von Cin pak bang a tawi ding pen,
Sen na ninu an bang,
Nong hawmthawh hiam aw.

(2004, ka lai zawh lai amah hong zin theilo ahih manin a lupna tung pan hong phawk sam hilo diam)
============ ======