From Nu Haukhek: Dear Dr. Cinpu leh a lunglut-te,

Na laigelh ka sim khak ciang' ka lungtang hong sukha mahmah khat om hi. Ka lungtang sungah ka vom den thu khat hi aa, bangci bangin ka mipihte' tungah ka pulaak thei di'am cih ka ngaihsu't de't thu khat ahi hi. Hih na lai gelh-te in, tua ka ngaihsu't thu hong tho sak ahih manin, hi thu tawh kisai-in behlapsakna cih tawh k'ong gelh mai hi.

Zomite ih gam le minam hong kikhen kham ahih manin, ih pau le ih ham kibang nawn loin, ih belhna gamte' paute ih tel baih theih nading-in ih zang ciat ta hi. Ahi zongin, Zomi cih leh Zopau pen a bulpi beisiang pah lo ahih manin, ih zang lai aa, Pasian hehpihna tawh leitung pen global village ci-in hong neu aa thuzakna hong nop tak ciang' Zomi sak le khang aa kikhente kimuhna leh kihona-te hong baihzaw deuh aa, tua hun ciang' ih theih loh kal aa, ih omna gamte' pau ih zatpih/zatkhak- te kibang nawn lo ahih lam, ih ki phawk pan hi.

Tu hun-in India gam lam aa om Zomite' tangthu paizia pen ka theih khit loh hang', Kawlgam lam aa om Zomite pen, leitung mun tuamtuam-ah ki thehthaang ta hi. America-ah pawl khat na tung hi. Tua-te Zopau mah na pau lai uh hi. Europe gam-ah pawl khat, Asia gam-ah zong honpi khat mah, Australia, New Zealand..... leitung mun khemepeuh-ah Zomite ki thehthaang mang khin ta hi. Japan gam-ah Zomite tampi a ki tun' pen kum 20 pha nai lo(Japan gam-ah Zomi a tung masa pen kum 40 kiim bang??? pha khin) hi mah ta leh, Japan aa Zomite'n zong Zopau leh Japan pau helh-in kipau ta ahih manin, " 'phanat', 'slippers', 'bombi', 'tavuan', 'letsong'... .." cih-te a lamdang hong hi nawn lo hi.

Isarael mite Egypt gam-ah sal aa a om laitak hun tawh kibang-in, Zomite gam tuamtuam-ah sal aa ih om laitak ahi hi. Gam tuamtuam-ah sal aa ih om lam ki thei loin, US-ah sushi zial-in, Japan gam-ah kuang sawp-in kam dimdim-in, ih pau ngam mahmah lel hi. Tu zawh khang (generation) tampi ciangin, Zomi kici minam sung panin, gam le minam it hong om ding aa, ka gam ka lei koi-ah om hiam cih hong kan tak ciang' India gam aa Zomite omna gam leh Kawlgam aa Zogam/Chin State pen, nidang lai-in, ka gam uh hi ih cih theih nading, bang mualsuang a na om lai ta'm? Tu laitak ih gam ih lei ih puah ih zuun kei aa, ka leitang uh hi ci'n, mualsuang kician ih neih zawh kei leh, hun khat ciang' ih tu ih tate'n, a proof nading uh bangmah om nawn lo ding hi. Tua hun tak ciang' "ka pu ka pate'n 'tavuan'/'responsib ility'/'sekinin' na la zo kei taktak uh ei"hong ci ding uh hi. Tua hun ciang' Zopau pen midangte' kampau pan aa ih tawk/lak tampi hong om ding aa, a kibang lo tampi hong om zaw lai ding hi.

Ih gam haksa'tna tawh, mi gam-ah tu laitak nuam ih sak hangin, hun khat ciang'(ih gam, ih minam, ih leitang kisam mahmah ahih lam a kiphawk hun ciang') ih tu ih tate hong hehpihhuai mahmah ding uh hi. Kei (numei khat) nangawn in bangmah cih theihna ka neih loh hang' ka ngaihsu't ciang bek inzong na ka sa mahmah hi. No( a ki pasal sak mahmahte'n) na ngaihsun kha ngei uh hiam? Tu le ta neite'n ngaihsu't huai phadiak sa hi'ng. Hi thei hi leh, ih gam mah ah, om geigai nuam peuhmah hi'ng. Vaimiim le gataam mah pet-in, ih leitang mah hum viuveu nuam hi'ng. Kapu kapa' leitang mah-ah teeng nuam peuhmah hi'ng.

A kisam masa pen, ih pau ih ham hi lo zaw hi. Egypt gam ih zua't ding hi loin, Canaan gam ih puah ding hi zaw hi. Bangci bangin, Canaan gam puah thei ding ih hiam? Bangci bangin, Canaan gam taisan loin, om thei ding ih hiam cih ih zon ding hoih zaw lo hiam? India gam leh Kawlgam sung aa ih Zogam pen gam khat aa ih gawm zawh nading bangci bangin hanciam zo ding ih hiam cih ngaihsun kha ngei lo ih hiam? ci'n, thu ngaihsun thei(a diakdiakin pasal)-te hong to(challenge) nuam ing. Ih gam puahin, ih gam ih keek ding hi zaw hi. Ih gam nusia le'ng, ni khat ni ciang' Zogam mangthang taktak ding hi. Kuamaa theih loh-in, kei tua ding a patau mahmah hi'ng. Tu laitak mi' gam-ah ka om hang' (annek tuidawn nuam mahmah ahi zongin) tua bang thu ka ngaihsu't ciang' ka ihmu't theih loh hun zong tam mahmah hi. Zingciang thu ding ke'n thei ke'ng. Zingciang hun zong kei' aa hi kei. Ahi zongin, khang tampi khit ciang' ih Zogam a lunggulh Zo tate ading-in, patau'h huai sa lo na hi uh hiam?

[A diakdiak-in pasalte ka cih ciang' pasalte na heh kei un. Lai siangtho sungah mi a kisim ciang' numei le naupang kisim lo ahih man hi. A mimal-in numei tamzaw phial ta leh, thuneihna ah pasal ki thupi sak zaw ahih man aa, k'ong thupi bawlna hi zaw hi ci'n, na lak sak un.]

Biakna tawh kisai-ah Pasian' nasem Zomi(Tedim kampau) ki tam mahmah hi. Gam vai-ah a ding ngam ki tawm(om lo phial) mahmah hi. Ih gam nuam leh panmun deih-in, ki tuh phangphang-in, ki khia ngeingai zel ding hi hang. Haksa't laitak mipi taang aa ding ngam ki om vet lo hi. Malaysia ah Zomite sal hih nading ki buai den hi. Moses ding kuamah ki kham om lo hi. Zomite aangsung thei (selfish) vive aa ih nuntak pen dahhuai mahmah hi. Makai thei ding mi ki tawm mahmah kawmkal-ah makai khat om sunsun leh a nungzui nuam loin, gensia't ding leh langpan' ding bek ih ngaihsun hi. Huh le'ng, tawm beek phatuam ding cih lungsim ih nei kei hi. Ih theih, ih neih thu hoih sunsun ih kikum nuam kei hi. Thu hoih khat ki vaihawm leh ih lehlak den hi. Leitung mun khempeuh-ah Zomite ih ki zeel hi. Zomi omna mun khempeuh-ah kilemlohna, kithutuahlohna, pawlkhenna tawh kidim den hi.

Zopau tawh ih pau ding sangin, minam dangte' pau tawh ih pau ding ih ut zaw hi. Ih kipha'tsakpih hi. Zopau in pau le'ng, ih ki siam sak kei aa, minam dangte' pau ih pau ciang' ih ki siam sak zalzal nuam hi. Leitung-ah Zomite sangin, a ki zeel masa zaw minam khat om aa, tua-te pen Sen-te hi. Ahi zongin, Sen-te pen a omna gam u'ah mi namdang tawh a kiteeng phial uh zongin, apau le a ngeina uh nusia het lo uh hi. A pau a lai uh ki hilh tangtang uh hi. Kawlgam sungah Sen-te' tamna khua khempeuh-ah Sen sang om hamtang hi. Zomi tamna munte ah Zolai, Zopau ih hilh tangtang ding thupi mahmah hi. Biakna kiba'tlohna hangin, kilem loh ding hanciam zaw loin, ih kiba'tpih kampau le ngeina-te ih tu ih tate'n a mangngilh loh nading-in, ih hanciampih khawm ding kisam mahmah hi. Ih biak Pasian pen khat bek hi aa, ih zuihdan a kibang lo bek hi-in, Pasian kibang lo kibia hi lo hi. Ki muhdah nading thu om lo hi. Pasian' hong piak thupha pen, ei' ngah ding tan mah a ki ngah hi aa, mi' aa hazat theih hi lo hi. Ih ngah zah thupha tawh Pasian' min ih phat ding hi aa, mi' ngah ih haza't ding leh, ih een' ding hi lo hi.

Ka neu lai aa kampau a kizang khat hoih ka sa mahmah hi.Tua in, "Ngaihsun thei le'ng a na mah hi." cih hi aa, Zomite' ih nuntak zia pen "Ngaihsun thei le'ng a na mah hi." cih nop huai hun tam mahmah mawk hi.

Ka theih ka theihloh leh ka behlapnop tam mahmah ta leh, hong sau pian ahih manin, hizah tawh hun sak phot ni. Midang in a sim khin zo kei zongin, Dr. Cinpu in bel sim khin hamtang kha ding na hih teh, ih muhna kikum to zel le'ng maw.

Khialhna a om leh, ki maisak ni. Kei' muhna ka gelh hi.

Man Ngaih Hau (Haukhek)
Tokyo, Japan