Ka ciah sung ka kikhopna te

i. Feb 18, 2007: Guwahati ah kikhopna: Ka u Dr. Neng Ngaih Lian, Secretary, Zomi Christian Fellowship tawh Nipini sun in kikhawm dingin CBCNEI Compound ah Auto in DownTown Hospital pan ka tai phei uh a, ka tun uh ciang sumpi khia in ka lutsuak uh hi. Amah'n lampi ah hong gensa hi a, "Den ciang sharing tom cik khat hong nei lecin maw" ciin hong genkhol zo a, kei zong ka hun hong tun ciangin ka omna lam thu deihtak mah in ka siamzah in ka gen hi. Ahi zongin ka nung zak kik ciang microphone pen ginglua hiam, ginglo lua hiam, kitello a, thugen a kiza mello hi a ci pawl om hi. Sound System khawng zong zang siam kei le'ng Noise System suak mawk a, zakna sang bil-am sak zaw thei hi maw ka ci hi.

Taiwan ah mi a siangtho dan uh, hun a maan maan in a zat dan uh, nek lim a thupi bawl dan uh, a ki discipline dan uh, zuau a gen loh dan uh, mi a cihtak dan uh cihte ka gen a, ka nasepna Laser Chemistry thu zong tomcik ka gen hi.

Tua ni Pastor te khualzin a, makaite zong khualzin om ahih manin mikhual te in hun tam ka tang zaw uh hi. Ken sharing hun nei in, Pa Thiau Za Khup in tawpna thungetna nei a, Thugenpa bek inntek ahi hi. Tua manin tua ni pen kei adingin hamphat huai mahmah hi.


ii. Feb 19, 2007: Shillong Zomi kikhopna biakinn sung en: Zomi te kikhopna khat ka kikhop man loh man in ka va hawh a, a gate tungah Zomi Baptist Churches, Mizoram cih na kisuang a, Pastor Quarter cih zong ka mu hi. Pastor Quarter ah kikhawm pah uh cihna hi.

Biakinn sung ka lut ciangin tutna na kilem dimdiam a, siangtho sitset in numei pawl in pak tawh a zemte uh ka mu pah a, meivak khau leh tumging khaute zong kikhung diat duat hi. Zunbuk 2 kilawm tak om a, inntual zaipi khat nei in, innlim a hun cia khat mah pha a, biakin sung zong mihing za val pawl nuamtaka tut theihna ding tutna nuamtak kilem hi. Ka omlai in tua zah hilo ahih manin kum 2 sungin Topa in Zomi te zong sangpi ah hong lamto hi cih ka phawk a, thupha hangin ka lungdam hi.

Pastor Quarter sung ka lut leu leu uh leh lupna, giahna, tutna leh anhuana cihte kicing takin om a, kisil buk leh van koihna te na om dimdiam hi. Zomi te khut tawh kilam lo Topa in Zomi hong zangsak a, Ama hoihna bek tawh hong lamto hi maw ka ci hi.

Laisim leh sangkah tampi om ta ahih manin zong khangto zel lai hi.

iii. Feb 25, 2007: Delhi EBC Biakinn ah: Upa Chin Suum in "na veng uh pan Bus om a, tua ah hong tuang lecin nong tung mai ding" hong ci ahih manin Munirka Bus Stand ah Niangbawi in hong kha a, Yellow Bus khat ah ka lut leh mi na dim zizei ta ahih manin NEHU Bus tuan bangin keizong a laizangah ka ding pah hi. Ka kiangah ka innvengnu uh Nu Vung na tu a, aman ka van hong tawi sak in, kei zong mi hong lut tam deuhdeuh ciangin a nunglam ka kikhin phei zel a, a tawptawp ah kikhin theih nawnlohna tan ka tunga, Zolia nih kiangah ka ding teta hi.

Ka mai ah (ka nung theih leh) Bus conductor pa hong dinga, a tha pan ding deng pian khat hi napi amah zong sum khon dingin a kileh mengmeng thei kei hi. Tuazah a tam Zomi te in Biakinn lam zuan uh a, lungmuan huai mahmah hi. Pasian i itna leh i ngaihna thupi ka sa a, lamdang hilo hi.

Ahang pen Biakinn pen ka paima in 'gamla pian hi' cih ciang Niangbawi in hong gen dan hi a, ka tai taktak uh leh a pian bek hilo, gamla taktak hi a, a mun tun dawn ciang bangin lampi kuaklua ahih manin moto ukpa conductorpa in 'kiging uau, kisiing ta ding' ci a, a nunga tangval te in wow, wow, wow hong ci duamduam uh a, ka siing nainai uh hi. Ka kiang a tu Zolia nih, puan light green silh te zong Bus a kisin ciangin leengkhia dekdek sam uh a, cihna ding theilo sam uh hi ding hi ven nui mai uh hi.

Bus sung ah ka nunghei leh Shillong ah ka theihsa pawlkhat zong na tu a, laphuahsiam khawng, lasa siam, laisiam ngeite khawng zong a tu uh hi in ka mu hi. Ka muh khial a hi diam thei kei ing. Tua banga kisiing nainai in, a tawptawpna ah Sabji Bazar khat kitungin Bus hong khawl a, ka kum uh leh veilam ah inn kilawm tak na om a, tua pen Evangelical Baptist Convention Church biakinn hi in, a gal a et sang a sung nuam zaw a, a zat kicing zaw hi.

Biakinn huang sung ka lut ciangin ka meltheihsa pawlkhat na om a, khut kilen in ka khatvei kikhopna ahih hangin ka mikhual het kei a, Upa Chin Suum in hong vaidawnna in a laibu khat hong present pah a, a kawm zong simkhin manlo in lawm leh gual in hong khutlet naunau uh a, "Tunkim ni hiam" (Hlunkim ni ham?... jokes khat na om ngei a) ka ci hi.

Biakinn sungah lasak kipan pah a, ka lut leh hun kipat zawh ciang thupulakna leh maitang lahna hun ah Pastor pa in thugen ding Siapa te maitang lahna hun ah kei zong hong dingsak a, hong VIP sak mahmah ahih manin kei zong ka inkuan un ka ding mai uh hi!

La makai pen Shillong veteran Sia Thang Za Lun na hi a, tangval lai bangin na kizang lailai hi maw ka ci hi. Shillong ah kizang theite Delhi ah zong na kizang uh cih ka muh ciang lungsim khat hong nuam hi.

Lapawl hong sa te siam uh a, video ka lak leh ka etkik uh ciang lawmte in etnop deuh khawng na nei uh a, lakloh ding lauhuai kasa liang hi.

Thugenpa Sia Rev Dr JM Ngul Khan Pau in 'Pasian in Ama Aksi dingin mi zonga, Daniel na tel hi. Tu ni in zong zonglai a, nang zong hong teel nuam hi, na kiman hiam, Pasian aksi dingin a cingzo dingin na nuntakna na ki kemsiangtho hiam, na ki uk hiam, na ki sin ngap hiam, na hanciam nuam hiam...." ci hi.

Kikhop tawp ciang kitelna om ahih manin kuamah biakinn pua piallo uh a, ko lah ZCF Silver Jubilee program lamah kikhawm dingin pai hun ahih manin Shillong omsa nungak pawlkhat biakinn sunga ka muh pakte zong hopih manlo in ka taisan uh hi.

iv. Zomi Christian Fellowship Silver Jubilee Program malepna ah: A thai mah ciang a ahunpi taktak Jubilee pen zang ding uh hi a, kei lah tuama zan in lengkhia ding ka hih manin amalepna beek limtakin zangnuam ing ciin EBC kikhop tawp bektak in Siate zuiin Upa Thang Za Khen te nupa Car ah kihen in, lawm Thang Za Lun inn ah niangtui dawn phei in, kikhopna ah ka lutsuak uh a, ka lut uh ciangin "Pasian melhoihna, itna maitaina leh Calvary khuavak nibang hong taang hen.... Zogam sungah Gospel hong taang hen cih la ZVF Youth Choir te in na makaih ziahziah uh a, khutliik phialphial in ka ding phei pah uh hi. A music lah nuam, a la lah ngaih, a sa te lah kilawp, a hun lah kicing ahih manin nuamtak in la sa ziahziah in hun ka zang masa uh hi.

Jubilee lapawlte in la thak sitset 2 leh la tul ngeilo khat hong sa uh a, Jubilee hong tungta, Lungdam in phat ve ni cihte a sak khit uh ciangin kuamah peuh in a ngak lah Jubilee malepna sermon Sia Rev Dr JM Ngul Khan Pau in hong gen a, dai khipkhep in mipi in ki ngai hi.

Siapa in David leh Goliath tangthu hong gen a, David in suangtang zol dikdek zanga, nang zong Pasian zat theih na hihna dingin na nuntakna a zol ding kisam hi ci hi. Goliath pen "too big to shoot, too big to miss" ciin Lai Siangtho siamte in gen hi ci hi. "Na haksatna pen na Pasian bangzah in lian hiam cih hilh in" ci hi. Ei hih ding pen thumanna hi. David bangin hangsan in Pasian muang in ci hi. I nuntakna ah Goliath om teitei a, tua i zawhna dingin Pasian thuman kisam hi ci hi.

Kikhop cim hetlo in hong bei pah a, a tom kasak leh a hun kipel diaiduai hi zaw hi. Thugen a nop ciang kikhop pen tom kisa a, ahi zongin a hun beizah kibang veve hi. Nop isak cianga hun tom a, nuam i sakloh cianga hun sau i sak mahmah pen leitungah a lamdang khat hi.

Kikhop tawp ciangin biakinn kongah maan kila ngeingai in kei adingin ka theihsa zong pawlkhat na om kik ahih manin ka maingal kik leuleu hi. Koi mun peuhah Zomi i hih nak leh i Zomi pih ding na om a, nuntak nuam semsem hi. (Taiwan ah Zomi dang omlo a, ahi zongin Zomite belh Pasian om hi).

v. Thukhupna: Ka ciah sungin kikhopna ka kihel khakna te hamphat huai sa ing. Khangno pilna sin lai te, sepna nei te, u lian te, insung nu leh pa te, naupang leh sia te - a kua mah peuh in amau hih theihna tan ciat ah Pasian bel in, Amah phat in, Amah kiangah kinga in Ama kiangah lamen den uh hi cih ka mu hi. Zomi te in Pasian it uh hi. Tua hi kei leh Dwarka tan pekpek ah Bus sunga kihen neinai in kuamah kikhawm khawm peihlo ding hi. A gamlat, a lampi noploh thu tuam, hun tampi beilua, sum tampi beilua.... ahi zongin Pasian mah bel phot leng, Ama'n hong taisan ding hiam. Amah zui phot leng Aman hong nusia ding hiam.

Kumpi David in Topa ah upna leh muanna na nga hi -

Na vai khempeuh Topa tungah ap in,
Amah muangin,
Amah in hong sem ding hi....

Hau Za Cin Phuitong Liim